Search form

I DIKRONIKE 10

Tsa Davida 10 — 29.

Ho shwa ha Saule.

1Eitse ha Bafilesta ba lwana le Baiseraele, banna ba Iseraele ba baleha pela Bafilesta, ba wa ba hlabilwe thabeng ya Gilboa. 2Bafilesta ba phallela Saule le bara ba hae ka matla, mme Bafilesta ba bolaya Jonathane le Abinadabe le Malkishua, bara ba Saule. 3Jwale, Saule a imelwa ke ntwa; ba fulang ka diqha ba mo fihlela, mme a tsieleha haholo ke ba diqha. 4Yaba Saule o re ho lehlahana la hae: Pshemola sabole ya hao, o ntlhabe ka yona, esere mohlomong maqai ao a tla, mme a ntshoma. Empa lehlahana la hae la hana, kahobane le ne le tshohile haholo. Yaba Saule o nka sabole ya hae, a itihela hodima yona. 5Eitse ha lehlahana la hae le bona hoba Saule o shwele, le lona la itihela hodima sabole ya lona, mme la eshwa. 6Ha eshwa jwalo Saule le bara ba hae ba le bararo; ntlo ya hae kaofela ya eshwa hammoho. 7Eitse banna bohle ba Iseraele ba ahileng kgohlong, ha ba bona hoba ho balehilwe, le hoba Saule le bara ba hae ba shwele, ba furalla metse ya bona, ba baleha. Mme Bafilesta ba fihla, ba aha ho yona.

8Hosasane, ha Bafilesta ba tlile ho hlobodisa ba bolailweng, ba fumana Saule le bara ba hae ba wele thabeng ya Gilbowa. 9Yaba ba mo hlobodisa, ba nka hlooho ya hae le dihlomo tsa hae; mme ba romela kahohle naheng ya Bafilesta ho ya behela medimo ya bona le setjhaba. 10Ba bea dihlomo tsa hae tlung ya modimo wa bona, mme ba fanyeha hlooho ya hae tlung ya Dagone. 11Eitse ha bohle ba Jabeshe-Gileade ba utlwa tsohle tseo Bafilesta ba di entseng ka Saule, 12banna bohle ba matla ba ya, ba tlosa setopo sa Saule le ditopo tsa bara ba hae, ba di tlisa Jabeshe. Ba pata masapo a bona tlasa sefate sa terebinthe se Jabeshe, mme ba itima dijo ka matsatsi a supileng.

13Saule a shwa jwalo ka baka la boikgantsho ba hae, boo a neng a ikgantsheditse Jehova ka jona, bakeng sa lentswe la Jehova leo a sa kang a le boloka, le bakeng sa hobane a ne a botsitse ba bitsang bafu, hore a ipotsetse ditaba ho bona, 14a sa ka a botsa Jehova. Jehova a mo timetsa ke hona, mme a fetisetsa borena ho Davida, mora Jese.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index