Search form

I DIKRONIKE 11

Davida o bewa morena wa setjhaba sohle.

1Yaba Baiseraele bohle ba phuthehela ho Davida, Hebrone, ba re: Bona, re masapo a hao le nama ya hao. 2Leha e le maoba le maobane, Saule ha e sa ntse e le morena wa rona, e be e le wena ya futuhisang Baiseraele, le ho ba orosetsa hae. Le Jehova, Modimo wa hao, o o boleletse, a re: O tla disa setjhaba sa ka sa Iseraele, o be molaodi wa setjhaba sa ka sa Iseraele. 3Baholo bohle ba Iseraele ba tla jwalo ho morena, Hebrone; Davida a hlaba selekane le bona Hebrone, pela Jehova; mme ba tlotsa Davida, ho mo etsa morena wa Iseraele, ka polelo eo Jehova a neng a e boletse ka Samuele.

4Yaba Davida le Baiseraele bohle ba futuhela Jerusalema, e leng Jebuse, moo ho neng ho le Bajebuse ba neng ba ahile naheng eo. 5Baahi ba Jebuse ba re ho Davida: O ke ke wa kena kwano. Empa Davida a kena qhobosheane ya Sione; ke wona motse wa Davida. 6Davida o ne a itse: Ya tla qhala Bajebuse pele, e tla ba kgosana le morena. Joabe, mora Tseruja, a hlwa pele, mme a etswa kgosana. 7Davida a aha qhobosheaneng; ya rewa ke hona lebitso la motse wa Davida. 8A ba a haha motse ka nqa tsohle, ho tloha Millo le ho isa ka nqa tsohle: Joabe yena a lokisa ho setseng ha motse. 9Mme Davida a nna a ya a hola, kahobane Jehova wa makgotla a nna a ba le yena.

Dinatla tsa Davida.

10Ke tsena dihlooho tsa banna ba bahale ba Davida, ba nnileng ba mo emela boreneng ba hae, ba ena le Baiseraele bohle, ba tle ba mmee morena, ka polelo e neng e boletswe ke Jehova bakeng sa Iseraele. 11Ke ena palo ya bahale bao Davida a neng a na le bona.

Jashobeame, mora Hakmoni, ke hlooho ya dinatla. A lwantsha banna ba makgolo a mararo ka lerumo la hae, a ba bolaya ka nako e le nngwe.

12Ya mo hlahlamang ke Eleasare, mora Dodo, wa Akoke, e mong wa dinatla tse tharo. 13Ke yena ya neng a emele Davida Pase-Dammime. Bafilesta ba ne ba phuthehetse teng ka ntwa; teng, ho ne ho na le lebatowa la tshimo le tletseng harese; ke mohla setjhaba se neng se balehetse Bafilesta. 14Ba ema hare ho tshimo, ba e tseka, mme ba qhala Bafilesta; Jehova a namolela Iseraele ka hlolo e kgolo.

15Ba bararo ho bao e leng dihlooho tsa dinatla tse mashome a mararo ba ne ba theohetse ho Davida seqhobong, lehaheng la Adullame; diahelo tsa Bafilesta di ne di hlomilwe kgohlong ya Barefaime. 16Mohlang oo, Davida o ne a le seqhobong, mme sehlopha sa Bafilesta se ne se le teng Bethlehema. 17Ke ha Davida a qala ho lakatsa, a re: Ke mang ya tla nnosa metsi a sediba sa Bethlehema se pela kgoro? 18Yaba ba bararo bao ba phunyeletsa hara diahelo tsa Bafilesta, ba ekga metsi sedibeng sa Bethlehema se pela kgoro, mme ba a nka, ba tla le wona ho Davida; empa Davida a hana ho a nwa, a mpa a a tshollela Jehova; 19a re: Ka Modimo wa ka, ha nka ke ka etsa hoo. Na ke be nka nwa madi a banna bao ba ileng ba tetse bophelo ba bona na? Hobane ba a tlisitse, ba sa re letho ka bophelo ba bona, A hana ho a nwa ke hona. Hoo ha etswa ke dinatla tseo tse tharo.

20Abishai, moena Joabe, e ne e le hlooho ya ba bararo bao. A lwantsha banna ba makgolo a mararo ka lerumo la hae, a ba bolaya, mme a iketsetsa lebitso hara ba bararo bao. 21Hara ba bararo, ya eba yena ya roriswang ho ena le ba babedi ba bang, mme ya eba hlooho ya bona, a mpa a sa fihle ho ba bararo ba pele.

22E mong ke Benaia, mora Jehojada, mora monna wa senatla wa Kabsteele, ya neng a entse diketso tse kgolo. A bolaya tau tse pedi tsa Moabe; hape, ke yena ya neng a theohe, a ya bolaya tau ka lemeneng, e le mohla lehlwa le kgethehang. 23A bolaya le monna wa Moegepeta; monna eo boemo ba hae e ne e le ditswe tse hlano. Moegepeta letsohong o ne a tshwere lerumo le neng le le ka ka sefate sa selohi; a theohela ho yena ka molamu, a amoha Moegepeta lerumo, mme a mmolaya ka lona lerumo leo la hae. 24Tseo tsa etswa ke Benaia, mora Jehojada, mme a iketsetsa lebitso hara dinatla tseo tse tharo. 25A roriswa ho feta ba mashome a mararo, a mpa a se ke a fihla ho ba bararo ba pele. Davida a mmea monna wa lekgotla.

26Haele banna ba dinatla ba makgotleng a Davida, e ne e le Asaele, moena Joabe, Elkanane, mora Dodo wa Bethlehema; 27Shammothe wa Harore, Heletse Mopalone; 28Ira, mora Ikkeshe, wa Tekowa, Abiesere wa Anathothe, 29Sibbekai wa Husha, Ilai wa Akowa, 30Maharai wa Nethofa, Helede, mora Baana, wa Nethofa, 31Ithai, mora Ribai, wa Gibea wa bana ba Benjamine, Benaia wa Pirathone, 32Hurai wa Nahale-Gaashe, Abiele wa Araba, 33Asmavethe wa Baharume, Eliahba wa Shaalbone, 34Bene-Hasheme wa Gisone, Jonathane, mora Shage, wa Harare, 35Akiame, mora Sakare, wa Harare, Elifale, mora Ure, 36Hefere wa Mekera, Akija wa Palone, 37Hetsro wa Karmele, Naarai, mora Esbai, 38Joele ngwanabo Nathane, Mibhare, mora Hagri, 39Tseleke Moammone, Nahrai wa Berothe, lehlahana la Joabe, mora Tseruja; 40Ira, wa Jethere, Garebe wa Jethere, 41Uria Mohethe, Sabade, mora Ahalai, 42Adina, mora Shisa Morubene, molaodi wa Barubene, a ena le ba mashome a mararo, 43Hanane, mora Maaka, le Josafete wa Mithni, 44Osiase wa Ashtharothe, Shama le Jehiele, bara ba Hothame, wa Aroere, 45Jediaele, mora Shimri, le Joha ngwanabo, wa Thitsi, 46Eliele wa Mahavime, le Jeribai, le Joshavia, bara ba Elnaame, le Jithma Momoabe, 47le Eliele, le Obede, le Jaasiele wa Metsobaia.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index