Search form

I DIKRONIKE 13

Areka e iswa ke Davida ka tlung ya Obed-Edomo.

1Yaba Davida o etsa morero le balaodi ba dikete le ba makgolo, e le mahosana wohle a setjhaba. 2Davida a re ho phutheho yohle ya Iseraele: Ha le ka dumela, mme ha taba eo e ka tswa ho Jehova, Modimo wa rona, a re romeleng kahohle ho banababo rona ba ahileng naheng tsohle tsa Iseraele, re romele le ho baprista le Balevi, metseng ya bona le metsaneng ya bona, hore ba tle ba phuthehe le rona. 3Ha re boeleng re itatele areka ya Modimo wa rona; hobane ha re a ka ra e hlokomela mehleng ya Saule. 4Phutheho yohle ya rera hore ho etswe jwalo; etswe taba eo e ne e bile e kgahlehang mahlong a setjhaba sohle.

5Yaba Davida o phutha Baiseraele kaofela, ho tloha Shihore wa Egepeta ho tla fihla pela Hamathe, hore areka ya Modimo e tle e latwe Kiryathe-Jearime. 6Davida le Iseraele kaofela ba nyolohela Baala, e leng Kiryathe-Jearime wa Juda, ho lata teng areka ya Modimo Jehova, ya dutseng hodima dikerubime, e leng yona areka eo lebitso la Jehova le rapelwang ho yona. 7Ba lata areka ya Modimo tlung ya Abinadabe ka koloi e ntjha; Ussa le Akio ba ne ba tsamaisa koloi. 8Davida le Baiseraele kaofela ba ne ba letsa pela Modimo ka matla wohle a bona, ba bina ka diharepa, le diviole, le meropa, le disimbala, le diterompeta.

9Ba fihla jwalo seotlong sa Kidone; yaba Ussa o isa letsoho ho tshwara areka, kahobane dipholo di ne di tlola. 10Yaba Jehova o halefela Ussa, a mmolaya, kahobane a isitse letsoho la he arekeng, mme a shwela hona moo pela Modimo. 11Davida a swaba ke hobane Jehova a entse sekgeo Iseraeleng ka Ussa, mme a rea nqalo ya teng Perets-Ussa (sekgeo sa Ussa); le kajeno ke la teng. 12Tsatsing leo, Davida a tshaba Modimo, a re: Nka isa areka ya Modimo jwang ha ka? 13Ka baka leo, Davida ha a ka a isa areka ha hae, motseng wa Davida, a mpa a e faposetsa tlung ya Obed-Edomo wa Gathe. 14Areka ya Modimo ya dula ha Obed-Edomo, tlung ya hae, kgwedi tse tharo; mme Jehova a hlohonolofatsa ntlo ya Obed-Edomo le tsohle tsa hae.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index