Search form

I MARENA 15

Abijame le Asa, marena a Juda.

1Ka selemo sa leshome le metso e robileng meno e le mmedi sa ho busa ha Jeroboame, mora Nebathe, Abijame a qala ho busa Juda; 2a busa ka dilemo tse tharo Jerusalema; lebitso la mmae e ne e le Maaka, moradi wa Absalome.

3A tsamaya dibeng tsohle tse entsweng ke ntatae pele, pelo ya hae yohle e se ya Jehova, Modimo wa hae, jwaloka pelo ya ntatae Davida. 4Leha ho le jwalo, ka baka la Davida, Jehova, Modimo wa hae, a mo nea lebone le tukang Jerusalema, ka ho mo hlahlamisa mora hae, le ka ho tiisa Jerusalema. 5Ha eba jwalo, kahobane Davida a ne a entse tse lokileng mahlong a Jehova, a sa ka a kgeloha taba le e nngwe ya tsohle tseo a mo laetseng tsona, tshiung tsohle tsa ho phela ha hae, haese tabeng ya Uria Mohethe feela.

6Ntwa ya nna ya eba teng mahareng a Roboame le Jeroboame, tshiung tsohle tsa ho phela ha hae.

7Haele taba tse ding tsa Abijame, le tsohle tseo a di entseng, ha ke re, di ngodilwe bukeng ya ditaba tsa ho phela ha marena a Juda?

Ntwa ya nna ya eba teng mahareng a Abijame le Jeroboame.

8Abijame a ntoo orohela ho bontatae, a patwa motseng wa Davida; mme Asa, mora hae, ya eba morena tulong tsa hae.

9Asa a qala ho busa Juda ka selemo sa mashome a mabedi sa ho busa ha Jeroboame, morena wa Iseraele. 10A busa ka dilemo tse mashome a mane a motso o mong Jerusalema; lebitso la mmae e ne e le Maaka, moradi wa Absalome.

11Asa a etsa tse lokileng mahlong a Jehova, jwaloka ntatae Davida. 12A leleka Basodoma naheng, a tlosa ditshwantsho tsohle tse entsweng ke bontatae. 13Esita le mmae Maaka, a mo ntsha sefumahading, hobane a ne a entse setshwantsho sa Ashtarothe; Asa a heletsa setshwantsho seo sa hae, a se tjhesa molatswaneng wa Kedrone. 14Haele nqalo tse diphahameng, ha a ka a di tlosa; leha ho le jwalo, pelo ya Asa ya nna ya kgomarela Jehova hantle tshiung tsohle tsa ho phela ha hae. 15Hape, a tlisa ka tlung ya Jehova tse kgethetsweng Modimo ke ntatae le yena, silefera le kgauta le dipitsa.

16Ntwa ya nna ya eba teng mahareng a Asa le Baesha, morena wa Iseraele, tshiung tsohle tsa bona. 17Baesha, morena wa Iseraele, a futuhela Juda; a haha Rama, hore ho se ke ha eba motho wa Asa, morena wa Juda, ya dumellwang ho tswa le ho kena. 18Yaba Asa o nka silefera yohle le kgauta tse setseng polokelong ya ntlo ya Jehova le polokelong ya ntlo ya morena, a di bea matsohong a bahlanka ba hae. Morena Asa a di romela ka bona ho Ben-Hadade, mora Tabrimmone, mora Hesione, morena wa Siria, ya ahileng Damaseka, a re: 19Selekane se teng mahareng a ka le wena, jwalokaha se ne se le teng mahareng a ntate le ntatao; bona, ke rometse mpho ya silefera le kgauta ho wena; tloo, o kgaole selekane sa lona le Baesa, morena wa Iseraele, hore a tle a ntlohele. 20Ben-Hadade a utlwa morena Asa; a roma balaodi ba makgotla a hae ho lwantsha metse ya Iseraele; a kena Ijone, Dane, Abele-Bethe-Maaka, le naha yohle ya Kinnerothe, le naha yohle ya Nefthali. 21Baesha, eitse ha a utlwa, a lesela ho haha Rama, a ya dula Thirtsa. 22Yaba morena Asa o mema Bajuda bohle, ho se ke ha siuwa le a mong; ba ya, ba nka majwe le difate tseo Baesha a neng a haha Rama ka tsona; morena Asa a haha Geba wa Benjamine le Mitspe ka tsona.

23Haele taba tse ding tsa Asa, le matla a hae, le tsohle tse entsweng ke yena, le metse eo a e hahileng, ha ke re, di ngodilwe bukeng ya ditaba tsa ho phela ha marena a Juda? Boqhekung ba hae, a jewa ke maoto.

24Asa a ntoo orohela ho bontatae, a patwa ho bontatae motseng wa ntatae Davida; mme mora hae, Josafate, ya eba morena tulong tsa hae.

Nadabe, Baesha, Ela, Simri, Omri, marena a Iseraele.

25Haele Nadabe, mora Jeroboame, a qala ho busa Iseraele ka selemo sa bobedi sa Asa, morena wa Juda; a busa Iseraele ka dilemo tse pedi. 26A etsa ho leng hobe mahlong a Jehova, a ya ka mehlala ya ntatae, le ka sebe sa hae seo a sebisitseng Iseraele ka sona. 27Yaba Baesha, mora Akija, wa ntlo ya Issaskare, o a mo fetohela; mme Baesha a mmolaya Gibbethone wa Bafilesta; ke ha Nabathe le Baiseraele bohle ba futuhetse Gibbethone. 28Baesha a mmolaya ka selemo sa boraro sa Asa, morena wa Juda, mme a busa tulong tsa hae. 29Ha e se e le morena, a bolaya ba ntlo yohle ya Jeroboame, a se ke a siya le a mong ya phelang ha Jeroboame, a ba a ba qeta, jwalokaha Jehova a ne a boletse ka mohlanka wa hae Akija wa Silo. 30E ne e le ka baka la dibe tseo Jeroboame a sitilweng ka tsona, a ba a sebisa le Baiseraele ka tsona, a halefisa Jehova, Modimo wa Iseraele.

31Haele ditaba tse ding tsa Nadabe, le tsohle tse entsweng ke yena, ha ke re, di ngodilwe bukeng ya ditaba tsa ho phela ha marena a Iseraele?

32Ntwa ya nna ya eba teng mahareng a Asa le Baesha, morena wa Iseraele, tshiung tsohle tsa bona.

33Baesha, mora Akija, a qala ho busa Baiseraele bohle, a le Thirtsa, ka selemo sa boraro sa Asa, morena wa Juda, a busa ka dilemo tse mashome a mabedi a metso e mene. 34A etsa ho leng hobe mahlong a Jehova, a ya ka mehlala ya Jeroboame, le ka sebe seo a neng a sebisitse Baiseraele ka sona.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index