Search form

I MARENA 6

Ho hahuwa tempele.

1Ya be e se e le dilemo tse makgolo a mane a nang le mashome a robileng meno e le mmedi bana ba Iseraele ba tswile naheng ya Egepeta, ha Salomone a qala ho haha ntlo ya Jehova, e le ka selemo sa bone sa ho busa ha hae Iseraeleng, ka kgwedi ya Sife, e leng kgwedi ya bobedi.

2Ntlo eo morena Salomone a ileng a e hahela Jehova, bolelele ba yona ya eba ditswe tse mashome a tsheletseng, bophara e le ditswe tse mashome a mabedi, bophahamo e le ditswe tse mashome a mararo. 3Mathule a ka pele ho tempele, bolelele ba wona ya eba tswe tse mashome a mabedi, ho lekana le bophara ba ntlo, bophara ba wona e le ditswe tse leshome pela ntlo. 4A etsetsa ntlo difensetere tse haheleditsweng ka dithupa. 5A haha leboteng la ntlo dikamore tse kallaneng tse le potang, a di haha maboteng a ntlo, tsa sika tempele le sehalaledisiso; a etsa dikamore tse kathoko kahohle. 6Kamore tse katlase bophara ba tsona e ne e le ditswe tse hlano, tse hare bophara ba tsona e le ditswe tse tsheletseng, tsa boraro bophara ba tsona e le ditswe tse supileng; hobane o ne a hahile ka majwe a ntshang dintlha lerakong lohle la ntlo, hore difate di se kene marakong a ntlo. 7Ntlo ha e hahuwa, ya hahuwa ka majwe a lokisitsweng a eso ho tliswe teng, ho se ke ha utlwahala noto, leha e le selepe, leha e le mosebetsi o mong wa tshepe, ha ntlo e ntse e hahuwa. 8Monyako wa dikamore tse hare o ne o le lehlakoreng le letona la ntlo; ho ne ho nyolohelwa kamoreng tse hare ka methatinyana e matswedintsweke, mme ho ne ho kenwa dikamoreng tse boraro, ha ho tsuwa ho tse hare. 9A haha ntlo jwalo, a e phetha, a kwahela ntlo ka difate le ka dipolanka tsa kedare. 10Haele dikamore tse kallaneng, tse potang ntlo yohle, a di etsa di ena le bolelele ba ditswe tse hlano; di ne di kopane le ntlo ka difate tsa kedare.

11Yaba lentswe la Jehova le tlela Salomone, la re: 12Haele bakeng sa ntlo eo o e hahang, ekare ha o tsamaya ka melao ya ka, o tiisa dikahlolo tsa ka, o boloka ditaelo tsa ka tsohle, o tsamaya ka tsona, ke tla o etsetsa ka pallo eo ke e boleletseng ntatao Davida. 13Ke tla dula hara bana ba Iseraele, ke se ke ka furalla setjhaba sa ka sa Iseraele.

14Salomone a haha ntlo jwalo, a ba a e phetha. 15A sireletsa mabota a ntlo ka dipolanka tsa kedare, ho qala ka fatshe ho ntlo, ho isa sehlohlolong sa marako, a a sireletsa ka difate; le fatshe ho ntlo a kata ka dipolanka tsa kiprese. 16Hara ntlo, a kgaola sebaka sa ditswe tse mashome a mabedi maboteng, a sireletsa mabota a sona ka dipolanka tsa kedare ho tloha fatshe, a se etsa sehalalelo, e leng sehalaledisiso. 17Ho setseng ha ntlo, e leng tempele e kapela sehalaledisiso, bolelele ba yona ya eba ditswe tse mashome a mane. 18Dikedare tse kahare ho ntlo tsa betlwa dithola le palesa tse thuntseng; e ne e le kedare feela, ho sa bonahale majwe.

19A lokisa sehalaledisiso ka tlung, a tle a bee areka ya selekane sa Jehova ho sona. 20Boholo ba sehalaledisiso ya eba ditswe tse mashome a mabedi, bophara ba sona e le tswe tse mashome a mabedi, le bophahamo ba sona e le ditswe tse mashome a mabedi; a se maneha ka kgauta e hlwekileng; le aletare a e apesa ka dikedare. 21Salomone a maneha le lebota la ntlo ka kgauta e hlwekileng; a feha lesela ka mahlaahlela a kgauta pela sehalaledisiso seo a se manehileng ka kgauta. 22A maneha ntlo yohle ya kgauta, a ba a phetha ntlo yohle; le yona aletare yohle e pela sehalaledisiso, a e maneha ka kgauta.

23Kahara sehalaledisiso, a etsa dikerubime tse pedi tsa mohlwaare; bolelele ba e nngwe le e nngwe e le ditswe tse leshome. 24Lepheo le leng la kerubime, bolelele ba lona e ne e le ditswe tse hlano, bolelele ba lepheo le leng la kerubime e le ditswe tse hlano; ho kgutla pheletsong ya lepheo le leng, ho isa pheletsong ya le leng, e ne e le ditswe tse leshome. 25Kerubime ya bobedi, bolelele ba yona e ne e le ditswe tse leshome; dikerubime tse pedi di ne di le tekano e le nngwe le bolelele bo le bong. 26Bolelele ba kerubime e nngwe e ne e le ditswe tse leshome, le ba kerubime ya bobedi bo le bokalo. 27A bea dikerubime hara ntlo, di otlolotse mapheo a tsona, lepheo la e nngwe le kgitla lebota, mme lepheo la kerubime e nngwe le kgitla lebota le leng; a mang mapheo a tsona a ne a amane mahareng a ntlo. 28A ntoo maneha dikerubime ka kgauta.

29A ntoo betlela maboteng wohle a ntlo ditshwantsho tsa dikerubime, le tsa dipalema, le tsa dipalesa tse thuntseng, ho qala kahare, ho isa kantle. 30A maneha fatshe ho ntlo ka kgauta, ho qala kahare, ho isa kantle.

31A etsetsa monyako wa sehalaledisiso mamati a mohlwaare a bulwang hare, fate tse hodimo le tse mahlakoreng tsa nka karolo ya bohlano ya lebota.32Mamati a mabedi a etswa ka mohlwaare; teng a betla ditshwantsho tsa dikerubime, le tsa dipalema, le tsa dipalesa tse thuntseng, a di maneha ka kgauta; a maneha le dikerubime le dipalema ka kgauta.

33A ntoo etsetsa monyako wa tempele difate tsa mohlwaare, tse nkang karolo ya bone ya lerako. 34Menyako e mmedi ya etswa ka kiprese; mamati a mabedi a monyako o mong a bulelwa kahohle, le mamati a mabedi a monyako o mong a bulwa jwalo le wona. 35A betla teng dikerubime, le dipalema, le dipalesa tse thuntseng, a di kwahela ka kgauta e manehilweng hodima ditshwantsho.

36A thea lebala le kahare ka majwe a betlilweng a kolohantsweng ka boraro, le ka lethathamo la difate tsa kedare.

37Motheo wa ntlo ya Jehova wa thewa ka selemo sa bone sa ho busa ha Salomone, ka kgwedi ya Sife; 38ka selemo sa leshome le motso o mong, ka kgwedi ya Bule, e leng kgwedi ya boroba meno e le mmedi, ntlo ya phethwa hohle le ka tshwanelo yohle. A e haha ka dilemo tse supileng.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index