Search form

I SAMUELE 13

Puso ya Saule, 13 — 31.

Ho lwanwa le Bafilesta. — Setjheso sa Saule. — Jonathane o kena qhobosheane ya Bafilesta. — Bafilesta ba hlolwa. — Jonathane o kena tsietsing ya lefu ka baka la kano ya ntatae.

1Saule o ne a le dilemo tse mashome a mararo mohla a qalang ho busa. Eitse hobane a buse Iseraele ka lemo tse pedi, 2Saule a ikgethela kete tse tharo tsa Baiseraele; kete tse pedi tsa dula ho Saule, Mikmashe, le thabeng ya Bethele, se seng sa dula ho Jonathane, Gibea wa Benjamine; haele ba setseng ba setjhaba, a ba kgutlisetsa e mong le e mong tenteng ya hae. 3Jonathane a qhala ba qhobosheaneng ya Bafilesta, e leng Gibea, mme Bafilesta ba utlwa. Ebile Saule o letsa terompeta naheng yohle, a re: Baheberu ba utlwe! 4Baiseraele bohle, ha ba utlwa hobane Saule o qhadile ba qhobosheaneng ya Bafilesta, le hobane Baiseraele kaofela ba fetohile ntho e nkgang hampe ho Bafilesta, setjhaba sa memelwa ho Saule, Gilgale.

5Haele Bafilesta, ba phutheha ho futuhela Iseraele ka dikete tse mashome a mararo tsa makoloi, le kete tse tsheletseng tsa bapalami, le ka setjhaba se ka ka lehlabathe le lebopong la lewatle. Ba tla, ba emisa Mikmashe, ka botjhabatsatsi ho Bethe-Avene. 6Eitse Baiseraele ha ba bona tsietsi eo ba leng ho yona, kahobane setjhaba se tsietswe, ba ipata mahaheng, le merung, le mafikeng, le diqhobong, le mangopeng. 7Baheberu ba bang ba tshela Jordane, ba tshelela naheng ya Gade, le Gileade; Saule yena a dula Gilgale, le setjhaba kaofela sa sala ho yena ka thothomelo.

8A lebella tshiu tse supileng, ka ho lekanya motsotso o beilweng ke Samuele, empa Samuele a se ke a fihla Gilgale, le setjhaba sa qhalanela Saule ke hona. 9Jwale, Saule a re: Ntlisetseng setjheso le mahlabelo a teboho. Ebile o etsetsa Jehova setjheso. 10Eitse ha a sa qetella ho etsa setjheso, a bona Samuele a hlaha; Saule a tswa ho ya mo kgahlanyetsa le ho mo dumedisa. 11Samuele a re: O entseng? Saule a re: Eitse ha ke bona setjhaba se nqhalanela, le wena o sa hlahe ka ditshiu tse beilweng, le Bafilesta ba se ba phuthehile Mikmashe, 12ka re: Bafilesta ba se ba ya theoha ho ntwantsha Gilgale, mme ha ke eso ho bee thapelo ho Jehova; ke ikgothaditse ke hona, mme ka etsetsa Jehova setjheso. 13Samuele a re ho Saule: O entse ka bothoto, ha o sa ka wa boloka taelo ya Jehova, Modimo wa hao, eo a o laetseng yona; athe Jehova a ka be a tiisitse borena ba hao Iseraeleng ka ho sa feleng. 14Jwale, borena ba hao bo ke ke ba tiya; Jehova o ikgethetse monna e mong ya pelong ya hae; Jehova o se a mo kgethile hore e be morena wa setjhaba sa hae, kahobane ha o a ka wa boloka seo Jehova a o laetseng sona. 15Yaba Samuele o a ema, a tloha Gilgale, a ya Gibea wa Benjamine. Saule yena a bala setjhaba se fumanweng se sa setse ho yena, ya batla e eba batho ba makgolo a tsheletseng.

16Saule le Jonathane, mora hae, le setjhaba se fumanweng se sa setse ho bona, ba itulela Gibea wa Benjamine, Bafilesta ba ntse ba emisitse Mikmashe. 17Ebile banna ba ratang ho hapa ba tswa diahelong tsa Bafilesta ka hlopha tse tharo, hlopha se seng sa ya ka tsela ya Ofra, sa ya naheng ya Shuale; 18hlopha se seng sa nka tsela ya Bethe-Horone, mme se seng sehlopha sa nka tsela ya ho ya naheng e mabapa le sekgutlo sa Tseboime, pela nahathothe.

19Mehleng eo, ho ne ho sa fumanwe lelala naheng yohle ya Iseraele, hobane Bafilesta ba ne ba itse: Baheberu ba se ke ba iteela disabole leha e le marumo. 20Ke kahoo Baiseraele bohle ba neng ba ntse ba eya ho Bafilesta, hore e mong le e mong a leotse sekara sa hae, leha e le mohoma wa hae, le selepe sa hae, le kgarafu ya hae; 21e le ha dikara tsa bona, le dikgarafu tsa bona, le mehoma ya bona, le dilepe tsa bona, di le botswa, leha ditsenene tsa bona di rata ho otlollwa. 22Ha ho le jwalo, tsatsing la ntwa, ha ho a ka ha fumanwa sabole leha e le lerumo matsohong a setjhaba kaofela se dutseng ho Saule le Jonathane, tsa fumanwa ho Saule le ho Jonathane, mora hae, feela.

23Mohlang oo, ba qhobosheaneng ya Bafilesta ba tswela lekgalong la Mikmashe.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index