Search form

I SAMUELE 23

Batho ba Keila ba lwantshwa ke Bafilesta, ba mpa ba namolelwa ke Davida. — Davida o phallelwa ke Saule mafeelleng a Sife le Maone.

1Ebile ba tsebisa Davida, ba re: Bafilista ba futuhetse Keila, ba thotha tse diotlong. 2Davida a botsa Jehova, a re: Na ke tla ya, ke hlole Bafilista bao na? Jehova a re ho Davida: Eya, o hlole Bafilesta, o namolele Keila. 3Empa banna ba Davida ba re ho yena: Bona, haele moo re tshaba re sa le kwano, Juda, re tla tshaba hakakang, ha re ka ya Keila ho makgotla a Bafilesta? 4Davida a eketsa hape, a botsa Jehova; Jehova a mo arabela, a re: Tloha, o theohele Keila, hobane ke tla neela Bafilesta matsohong a hao. 5Jwale, Davida le banna ba hae ba ya Keila, ba lwana le Bafilesta, ba hapa kgomo tsa bona, mme ba ba bolaya ka polao e kgolo. Davida a namolela ba ahileng Keila jwalo.

6Mohla Abiathare, mora Akimeleke, a balehelang ho Davida, o ne a tlile Keila, a ena le efoda. 7Saule ha a tsebiswa hobane Davida o ile Keila, Saule a re: Modimo o mo lahletse matsohong a ka, hobane o thibelletswe ha a kene motseng o nang le mamati le mekwallo. 8Saule a mema setjhaba kaofela ho futuha, le ho theohela Keila, le ho thibella Davida le banna ba hae. 9Davida ha a utlwa hobane Saule o mo otsitse, a re ho moprista Abiathare: Tlisa efoda kwano. 10Davida a re: Oho Jehova, Modimo wa Iseraele, mohlanka wa hao o utlwile kannete hobane Saule o batla ho tla Keila, le ho fedisa motse ka baka la ka. 11Hleka beng ba Keila ba tla nneela matsohong a hae na? Na le Saule o tla theohela kwano, jwalokaha mohlanka wa hao a utlwile na? Oho Jehova, Modimo wa Iseraele, o ke o tsebise mohlanka wa hao hle. Jehova a re: O tla tla. 12Davida a eketsa, a re: Hleka beng ba Keila ba tla re neela, nna le batho ba ka, matsohong a Saule na? Jehova a re: Ba tla le neela.

13Jwale, Davida a tloha, a ena le banna ba hae, e batla e eba batho ba makgolo a tsheletseng, ba tswa Keila, ba ya moo ba yang. Saule a tsebiswa hobane Davida o balehile Keila; a lesa ke hona ho ya pele. 14Haele Davida, a ya dula feelleng diqhobong, a dula thabeng, feelleng la Sife; leha Saule a ne a ntse a mmatla ka matsatsi wohle, Modimo ha o a ka wa mo neela matsohong a hae. 15Leha Davida a bone hobane Saule o tswetse ho mmatla, Davida a dula feelleng la Sife, morung. 16Yaba Jonathane, mora Saule, o tloha, a tla ho Davida morung, a tiisa letsoho la hae ho Modimo; 17a re ho yena: Se tshabe, hobane letsoho la ntate Saule le ke ke la o fihlela; hape o tla ba morena wa Iseraele, nna ke be ya o hlahlamang; le ntate Saule o a tseba hobane ho tla ba jwalo. 18Ebile bobedi ba bona ba etsa selekane pela Jehova; mme Davida a sala morung, Jonathane yena a kgutlela hae.

19Jwale ba Sife ba tla ho Saule, Gibea, ba re: Ha re re, Davida o ipata haeso diqhobong, morung, leralleng la Hakila, ka nqa borwa ho lefeella na? 20Jwale, morena, tloo kamoo o hopotseng kateng, e be rona re mo neelang matsohong a morena. 21Saule a re: Le ke le hlohonolofatswe ke Jehova, hobane le nkutlwetse bohloko. 22Eyang le batle, mme le tsebe le ho bona moo leoto la hae le hatang teng, hape ke mang ya mmoneng teng, hobane ke boleletswe hoba o etsa ka bohlale. 23Bonang ke hona, le tsebe sephiri seo a ipatang ho sona, le ntoo boya le tsebile, ke tle ke ye le lona; etlare ha a dutse lefatsheng lena, ke tla nne ke mmatle, ke be ke qete dikete tsohle tsa Juda. 24Ebile ba tloha ho Saule, ba ya Sife; Davida yena le banna ba hae ba le feelleng la Maone, thoteng, ka nqa borwa ho lefeella.

25Saule a ya jwalo le banna ba hae ho batla Davida. Davida a tsebiswa, a ba a theohela lefikeng, a dula feelleng la Maone. Saule ha a utlwa, a phallela Davida feelleng la Maone. 26Saule o ba a tsamaya lehlakoreng le ka kwano ho thaba, Davida yena le banna ba hae ba tsamaya lehlakoreng le ka nqane ho thaba. Davida a baleha pela Saule, a tshaba, kahobane Saule le banna ba hae ba ne ba se ba ya teela Davida le banna ba hae hare, ba ba tshware. 27Ha mpa ha fihla lenqosa ho Saule, la re; Phakisa o tle, hobane Bafilesta ba futuhetse naha. 28Saule a kgutla kahoo, a lesa ho phallela Davida, a ya kgahlanyetsa Bafilesta. Ka baka leo, baka seo sa bitswa Sela-Hammalekothe (lefika la karohano).

29Yaba Davida o tloha teng, a ya diqhobong tsa Ene-Gedi.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index