Search form

I SAMUELE 29

Davida o lelekwa sereng sa Bafilesta. — O kgutlela Tsiklage. — O fumana motse o tjhesitswe ke Baamele. — O a ba phallela le ho ba hlola.

1Jwale Bafilesta ba kgobokanyetsa makgotla wohle a bona Afeke; Baiseraele bona ba emisa sedibeng se Jisreele. 2Marena a Bafilesta a ya teng ka makgolo le ka dikete tsa wona; yena Davida le banna ba hae ba leba teng, ba ba setse morao le Akishe. 3Marena a Bafilesta a mpa a re: Baheberu bao ba etsang moo? Akishe a re ho marena a Bafilesta: Na eo hase Davida, mohlanka wa Saule, morena wa Iseraele, ya nnileng a dula le nna, e se e le ditshiu tse itseng le lemo tse itseng, eo ke esong ho fihlele molato ho yena, haesale a kwenehela ho nna, ho fihlela la kajeno? 4Marena a Bafilesta a mpa a mo halefela, mme marena a Bafilesta a re ho yena: Kgutlisa monna eo, a kgutlele moo o mmeileng teng, a se ke a ya ntweng le rona, esebe mohlomong a ka tshoha a iphetola lehlabaphio ho rona hara ntwa. Ana e ka ba ka mokgwa ofe a ka iketsang ya kgahlisang monga hae, haese ka dihlooho tsa banna bana na? 5Na hase Davida elwa eo ba neng ba dumelana, ha ba hobela, ba re: Saule o bolaile kete tsa hae, Davida yena o bolaile dikete tsa hae tse mashome na?

6Ebile Akishe o bitsa Davida, a re ho yena: Ka Jehova ya utlwang, o bile motho ya lokileng; ke rata ha ke o bona o kena le ho tswa le nna diahelong, hobane ha ke eso ho fihlele molato ho wena, haesale o etla ho nna, ho fihlela la kajeno; empa marena ha a o rate. 7Ha ho le jwalo, kgutla, o ikele ka kgotso, o tle o se ke wa halefisa marena a Bafilesta. 8Davida a re ho Akishe: Ke entseng, mme o fumaneng ho mohlanka wa hao, haesale ke le pela hao, ho fihlela la kajeno, ha ke sa lokele ho ya lwantsha dira tsa morena, monga ka na? 9Akishe a fetola, a re ho Davida: Ke a tseba hobane o rateha ho nna jwaloka lengeloi la Modimo; leha ho le jwalo, marena a Bafilesta a boletse bakeng sa hao, ba itse, o se ke wa ya le rona ntweng. 10Jwale, o ke o tsohele hosasa le bona bahlanka ba monga hao ba tsamayang le wena, mme ha le tsohetse hosasa, ha bo esa, le tsamaye.

11Ka baka leo, Davida le banna ba hae ba tsoha e sa le hosasa, hore ba kgutlele naheng ya Bafilesta; Bafilesta bona ba ya Jisreele.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index