Search form

I SAMUELE 30

1Davida le banna ba hae, ha ba fihla Tsiklage ka la boraro, ba fihlela Baamaleke ba futuhetse nqa borwa ho Tsiklage, ba bile ba kene Tsiklage, ba o tjhesitse. 2Ba ne ba tshwere basadi ba teng, ba sa ka ba bolaya motho, leha e le e monyenyane, leha e le e moholo; ba ne ba ile le bona, ba itsamaetse ka tsela ya bona. 3Eitse ha Davida le banna ba hae ba fihla hae motseng, ba o fihlela o tjhesitswe, le basadi ba bona le bara ba bona le baradi ba bona ba isitswe kgolehong. 4Ebile Davida le setjhaba se ho yena ba lla, ba bokolla, ho fihlela ba ba ba fellwa ke matla a ho lla. 5Le basadi ba babedi ba Davida ba ne ba hapilwe, e le Akinohame wa Jisreele le Abigaile, mosadi wa Nabale, wa Karmele.

6Kahoo, Davida a tsieleha haholo, hobane le batho ba ne ba bolela taba ya ho mo tlepetsa ka majwe, hobane pelo tsa bohle di ne di baba, e mong le e mong ka baka la bara ba hae le la baradi ba hae; empa Davida a ikgothatsa ka Jehova, Modimo wa hae. 7Ebile Davida o re ho moprista Abiathare, mora Akimeleke: Ako atametse efoda pela ka. Abiathare a atametsa efoda pela Davida. 8Davida a botsa Jehova, a re: Ha nka phallela letshwele lela, ana ke tla ba tshwara na? Jehova a re ho yena: Phalla, hobane o fela o tla ba tshwara, le ho hlakodisa tsohle. 9Kahoo, Davida a tsamaya, a ena le batho ba makgolo a tsheletseng ba nang le yena, a ba a fihla molapong wa Besore; teng ha ema marao. 10Haele Davida, a nna a phalla, a ena le batho ba makgolo a mane, hobane ho ne ho setse ba makgolo a mabedi ba kgathetseng, ba sitwang ho tshela molapo wa Besore.

11Ba fumana Moegepeta e mong naheng, ba mo tlisa ho Davida; ba mo nea bohobe, a ja, ba mo nosa le metsi. 12Ba mo nea le thathana ya polokwe ya difeiye le masihla a mabedi a merara, a ja, a boela a tsoha matla; hobane e be e se e le matsatsi a mararo le masiu a mararo a se a sa je bohobe, a sa nwe metsi. 13Davida a re ho yena: O motho wa mang? O tswa kae na? A re: Ke mohlankana wa Moegepeta, ke mohlanka wa motho wa Amaleke; monga ka o ntshiile, ke hobane ke ne ke kula e se e le tshiu tse tharo. 14Re kile ra futuhela nqa borwa ho Bakerethe le ho Juda, le nqa borwa ho Kalebe, re bile re tjhesitse le Tsiklage. 15Davida a re ho yena: Hleka o ka re isa letshweleng leo na? A re ha o ka ntlhapanyetsa ka Modimo hobane o ke ke wa mpolaya, leha e le ho nneela matsohong a monga ka, ke tla o isa letshweleng leo. 16A mo isa, ba ba fihlela ba qhalane naheng yohle, ba eja, ba enwa, ba hobela, ba thabile ke kgapo yohle e kgolo eo ba e hapileng naheng ya Bafilesta le naheng ya Juda. 17Davida a ba qhala, e le ha bosiu bo esa, ho isa mantsiboya a la hosasane, mme ha ho a ka ha pholoha ho bona motho le a mong, haese makgolo a mane a bahlankana ba palamileng dikamele; bona ba baleha. 18Davida a namolela tsohle tse hapilweng ke Baamaleke: Davida a namolela le basadi ba hae ba babedi. 19Ba se ke ba haellwa ke letho le lenyenyane leha e le le leholo, leha e le bara ba bona, le baradi ba bona, leha e le phahlo le tsohle tse neng di hapilwe; Davida a boela a di fihlela kaofela. 20Davida a hapa le manku wohle, le makgomo, ba a kganna, ba a bea pele ho mehlape e meng, ba re: Ke yona kgapo ya Davida.

21Davida ha a kgutlela ho banna bao ba makgolo a mabedi ba sitilweng ke mokgathala ho sala Davida morao, e leng ba setseng molapong wa Besore, ba tswela ho kgahlanyetsa Davida le ho kgahlanyetsa setjhaba seo a nang le sona; mme Davida ha a ba atamela, a ba dumedisa. 22Empa batho ba babe le ba Beliale bohle ba tsamayang le Davida ba bua, ba re: Ka baka la hobane bao ba sa ka ba ya le rona, re ke ke ra ba hapisa seo re se hlakodisitseng sa rona, haese hore feela e mong le e mong a nke mosadi wa hae le bana ba hae, ba ye le bona, ba itsamaele. 23Davida a mpa a re: Banabeso le se ke la etsa jwalo ka seo Jehova a re fileng sona, e le yena ya re bolokileng, ya neetseng matsohong a rona letshwele lela le neng le re futuhetse. 24Ke mang ya tla le mamela tabeng tseo na? Seabo sa ya yang ntweng se tshwanetse ho lekana le seabo sa letsholakobo, ba hapiswe ka mokgwa o le mong. 25Taba eo ya eba molao le mokgwa Iseraeleng, haesale mohlang oo, le mehleng ya morao, ho fihlela la kajeno.

26Eitse ha Davida a fihlile Tsiklage, a romela kgapo e nngwe ho baholo ba Juda le ho bahabo, a re: Ke yona kgapiso ya ka ho lona ya tse hapilweng ho dira tsa Jehova. 27A romela le ho ba Bethele, le ho ba Ramothe-Negebe, le ho ba Jatthire; 28le ho baAroere, le ho ba Sifmothe, le ho ba Eshthemoa; 29le ho ba Rakale, le ho ba metseng ya Bajerahemeele, ho ba metseng ya Bakene; 30le ho ba Horma, le ho ba Kor-Ashane, le ho ba Athake; 31le ho ba Hebrone, le hohle moo Davida le banna ba hae ba neng ba tsamaela teng.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index