Search form

II DIKRONIKE 10

Tsa mmuso wa Juda ho tloha karohanong ya mmuso ho isa mohla Bajuda ba iswang kgolehong, 10 — 36.

Karohano ya mmuso: Roboame, morena wa Juda: Jeroboame morena wa Iseraele.

1Yaba Roboame o ya Sikeme, hobane Baiseraele bohle ba ne ba ile Sikeme ho mmea morena.

2Eitse Jeroboame, mora Nebathe, ha a utlwa — o ne a le Egepeta moo a neng a balehetse teng ke ho tshaba morena Salomone — Jeroboame a kgutla Egepeta. 3Ba romela ho ya mmitsa; yaba Jeroboame le Baiseraele bohle ba tla, ba bolella Roboame, ba re: 4Ntatao o re jarisitse joko e boima; jwale o qephise tshebetso e thata ya ntatao le joko e boima eo a neng a re jarisitse yona, mme re tla o sebeletsa. 5A re ho bona: Boelang ho nna kamora ditshiu di le tharo. Mme setjhaba sa ya.

6Yaba morena Roboame o botsa banna ba baholo ba neng ba eme pela ntatae Salomone, ha a sa phela, a re: Nkeletseng, taba ke efe eo ke tla araba setjhaba sena ka yona na? 7Ba mmolella, ba re: Ha o ka etsetsa setjhaba seo molemo, wa ba kgahlisa, wa ba bolella mantswe a molemo, teng e tla ba bahlanka ba hao kamehla. 8A mpa a lesa keletso eo banna ba baholo ba mo eleditseng ka yona, a ya botsa banna ba batjha, ba neng ba hodile le yena, ba emeng pela hae, 9a re ho bona: Le tla nnea keletso efe, mme re tla araba setjhaba ka efe karabo, kamoo se mpoleletseng kateng, sa re: Qephisa joko eo ntatao a neng a re jarisitse yona? 10Banna ba Egepeta batjha, ba neng ba hodile le yena, ba mmolella, ba re: Ere ho setjhaba sena se o boleletseng, sa re: Ntatao o ne a re jarisitse joko e boima; wena, o re qephisetse yona; ere ho bona: monwana wa ka o monyenyane o motenya ho ena le letheka la ntate. 11Ha ntate a le jarisitse joko e boima, nna ke tla eketsa boima ba joko ya lona; ha ntate a le otlile ka diphafa nna ke tla le otla ka diphepheng.

12Ka la boraro, ha tla Jeroboame le setjhaba kaofela ho Roboame, kamoo morena a neng a itse kateng: Le tle le boele ho nna ka la boraro. 13Morena a ba araba ka thata; morena Roboame a lesa keletso ya banna ba baholo, 14a bua le bona ka keletso ya banna ba batjha, a re: Ntate o ne a le jarisitse joko e boima, nna ke tla e ekeletsa; ntate yena o le otlile ka diphafa, nna ke tla le otla ka diphepheng. 15Ha ho le jwalo, morena ha a ka a mamela setjhaba; hoo empa ho ne ho hlahisitswe ke Modimo, hore Jehova a tle a phethisise lentswe leo a neng a le buile ka Akija wa Silo ho Jeroboame, mora Nebathe.

16Ha Baiseraele bohle ba bona hobane morena ha a ba mamele, setjhaba sa fetola morena, sa re: Kabelo ya rona ke efe ho Davida? le lefa ha re na lona ho mora Jese. Weleng, Baiseraele, ikeleng tenteng tsa lona! Davida, iponele ntlo ya hao! Yaba Baiseraele bohle ba ikela tenteng tsa bona. 17Haele bana ba Iseraele ba neng ba ahile metseng ya Juda, Roboame ya eba morena wa bona. 18Morena Roboame a roma Adorame, molaodi wa ba hlwailweng; mme bana ba Iseraele ba mo tlepetsa ka majwe, a ba a shwa. Yaba morena Roboame o itlhahanela, a kena koloing ya hae, a balehela Jerusalema. 19Baiseraele ba kwenehela ntlo ya Davida jwalo ho fihlela la kajeno.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index