Search form

II DIKRONIKE 17

Josafate, morena wa Juda. — Boiketlo ba setjhaba.

1Josafate, mora hae, ya eba morena tulong tsa hae; a ipha matla ho lwantsha Iseraele; 2a isa makgotla metseng yohle ya Juda ya diqhobosheane, mme a bea bahlabani naheng ya Juda le metseng ya Efraime e neng e hapilwe ke Asa ntatae.

3Jehova a ba ho Josafate, kahobane a nnile a tsamaya ka mehlala ya pele ya ntatae Davida, a sa ka a batla boBaale; 4a mpa a batla Modimo wa bontatae, mme a tsamaya ka ditaelo tsa wona, a se ke a ya ka mokgwa wa Baiseraele. 5Jehova a tiisa mmuso letsohong la hae. Baiseraele bohle ba tlisetsa Josafate dimpho, mme a atelwa ke leruo le kganya. 6Pelo ya hae ya hola tsebong ya ditsela tsa Jehova, mme a hla a tlosa dinqalo tse diphahameng le diashera hara Juda.

7Ka selemo sa boraro sa ho busa ha hae, a roma mahosana a hae, boBene-Haile, Obadia, Sakaria, Nethaneele, le Mikea, hore ba ye ho ruta metseng ya Juda; 8ba ya ba ena le Balevi Shemaia, Nethania, Sebadia, Asaele, Shemiramothe, Jonathane, Adonija, Tobija, le Tob-Adonija, Balevi, hape ba ena le baprista Elishama le Jorame. 9Ba ya le naha ya Juda ba ntse ba ruta, ba tshwere buka ya molao wa Jehova, mme ba ya le metse yohle ya Juda, ba ntse ba ruta setjhaba.

10Letsoso la Jehova la wela mebuso yohle ya mafatshe a teetseng Juda hare, e tle e se ke ya futuhela Josafate. 11Esita le Bafilesta ba bang ba tlisetsa Josafate dinyehelo le ditjhelete tsa lekgetho; le Baarabe ba mo tlisetsa dinku, e le dipheleu tse dikete tse supileng tse nang le makgolo a supileng le diphooko tse dikete tse supileng tse nang le makgolo a supileng. 12Josafate a ya a ntse a hola, a ba a phahama haholo. A haha diqhobosheane le metse ya mediko naheng ya Juda. 13Ha etswa mesebetsi ya ntwa e mengata metseng ya Juda, le bahlabani ba bahale ba eba bangata Jerusalema.

14Ke ena palo ya bona, ha ho uwa ka matlo a bontata bona. Lelokong la Juda, balaodi ba dikete e ne e le Adna, molaodi wa bahale ba dikete tse makgolo a mararo; 15wa bobedi e le Johanane, molaodi wa ba dikete tse makgolo a mabedi a mashome a robileng meno e le mmedi; 16ya mo hlahlamang e le Amasia, mora Sikri, ya neng a ikgethetse Jehova ka ho rata, a ena le bahale ba dikete tse magkolo a mabedi.

17Lelokong la Benjamine, e ne e le senatla Eliada, a ena le ba dikete tse makgolo a mabedi ba hlometseng seqha le thebe; 18ya mo hlahlamang e le Jehosabade, a ena le ba dikete tse lekgolo le nang le mashome a robileng meno e le mmedi ba hlomeletseng ntwa.

19Ke bona ba neng ba sebeletsa morena, kantle ho ba beilweng ke morena metseng ya diqhobosheane naheng yohle ya Juda.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index