Search form

II DIKRONIKE 3

Ho hahuwa tempele.

1Yaba Salomone o qala ho haha ntlo ya Jehova, Jerusalema, thabeng ya Moria, e neng e supiswe ntatae Davida, setsheng sona seo Davida a neng a se lokisitse seotlong sa Ornane Mojebuse. 2A qala ho haha ka letsatsi la bobedi la kgwedi ya bobedi, ka selemo sa bone sa ho busa ha hae.

3Ke ena metheo eo Salomone a e theileng ho haha ntlo ya Modimo ka yona; bolelele e ne e le ditswe tse mashome a tsheletseng tsa ditswe tsa tekanyo ya kgale, bophara e le tswe mashome a mabedi. Mathule bolelele ba wona e ne e le ditswe tse mashome a mabedi, bo lekane le bophara ba ntlo; bophahamo ba wona e ne e le ditswe tse lekgolo le nang le mashome a mabedi; a a maneha kahare ka kgauta e hlwekileng.

5A ntoo kwahela ntlo e kgolo ka difate tsa dikiprese, a e maneha ka kgauta e hlwekileng, a e kgabisa ka dipalema le meqhaka. 6Hape, a kgabisa ntlo ka mekgabo ya mahakwe a bohlokwa; kgauta e le kgauta ya Parvaime. 7A maneha ntlo, le dibalaka, le mehato ya menyako, le mabota, le dikosene ka kgauta, mme a betla dikerubime maboteng.

8A ntoo etsa ntlo ya sehalaledisiso; bolelele ba yona e ne e le ditswe tse mashome a mabedi, bo lekane le bophara ba ntlo, bophara le bona e le ditswe tse mashome a mabedi; a e maneha ka kgauta e hlwekileng ya ditalenta tse makgolo a tsheletseng; 9boima ba dipekere ya eba dishekele tse mashome a mahlano tsa kgauta. A maneha le dikamore tse kahodima ka kgauta.

10Tlung ya sehalaledisiso a etsa dikerubime tse pedi tse betlilweng, mme tsa manehwa ka kgauta. 11Mapheo a dikerubime, bolelele ba wona e ne e le ditswe tse mashome a mabedi; lepheo la e nngwe bolelele ba lona e ne e le ditswe tse hlano, le ne le kgitla lebota la ntlo; lepheo le leng le lona le bolelele ba ditswe tse hlano le ne le amana le lepheo le leng la kerubime ya bobedi; 12lepheo le leng la kerubime e nngwe bolelele ba lona e ne e le ditswe tse hlano; le ne le kgitla lebota la ntlo, mme lepheo le leng le bolelele ba tswe tse hlano le ne le amana le lepheo la kerubime e nngwe. 13Mapheo a dikerubime tseo, ha a otlolohile, a ne a etsa sebaka sa ditswe tse mashome a mabedi. Di ne di eme ka maoto a tsona, mme difahleho tsa tsona di ne di tadimile kahare ho ntlo.

14A etsa le lesela la purepera le sekarelata le vermilione le lene e ntle, mme a le kgabisa ka dikerubime.

Ditshiya tse pedi; aletare ya mahlabelo; letsha; merifi le mesebetsi e meng ya tempele.

15Pela ntlo, a etsa ditshiya tse pedi, bolelele ba e nngwe le e nngwe e le ditswe tse mashome a mararo a metso e mehlano; hlooho tse hodima tsona, bolelele ba tsona e ne e le ditswe tse hlano. 16A ntoo etsetsa sehalalelo meqhaka, a kgabisa le dintlha tsa ditshiya ka meqhaka, mme a etsa digaranata tse lekgolo, a di kenya ka meqhakeng. 17A hloma ditshiya pela tempele, e nngwe ka ho le letona, e nngwe ka ho le letshehadi; a rea e leng ka ho le letona Jakine (o tla tiisa); e leng ka ho le letshehadi a e rea Boase (o na le matla).

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index