Search form

II DIKRONIKE 4

1Yaba o etsa aletare ya koporo; bolelele ba yona e ne e le ditswe tse mashome a mabedi, bophara e le ditswe tse mashome a mabedi, bophahamo e le ditswe tse leshome.

2Hape a etsa letsha le tsholotsweng; le ne le le ditswe tse leshome ho nka morumong o mong ho tlisa morumong o mong; le ne le le letjhitja, botebo ba lona e le ditswe tse hlano, tekanyo ya botjhitja ba lona e le ditswe tse mashome a mararo. 3Katlasa lona, ho ne ho le ditshwantsho tsa dikgomo tse teetseng letsha kahohle hare, di etsa mela e mmedi ya dikgomo, di tsholotswe hammoho le letsha. 4Le ne le beilwe hodima dikgomo tse leshome le metso e mmedi, tse tharo di lebile leboya, tse tharo di lebile bophirimela, tse tharo di lebile borwa, mme tse tharo di lebile botjhabela; letsha le ne le beilwe hodima tsona, mme tsona di ne di furallane. 5Botenya ba lona e ne e le bobatsi ba seatla; morumo wa lona o ne o bopilwe jwaloka morumo wa pitsa, o ena le sebopeho sa palesa; le ne le tshelwa dibathe tse dikete tse tharo.

6A etsa merifi e leshome; a bea e mehlano ka ho le letona ho ntlo, e meng e mehlano ka ho le letshehadi, hore ho tle ho hlatsuwe dintho ho yona. Ho ne ho hlatsuwa ho yona mekgekgetho e meng ya ditjheso; haele letsha lona baprista ba ne ba iphotla ho lona.

7A etsa dikandelare tse leshome tsa kgauta, ka mokgwa wa tsona o laetsweng, mme a di bea tempeleng, tse hlano ka ho le letona, tse hlano tse ding ka ho le letshehadi.

8A etsa le ditafole tse leshome, mme a di bea tempeleng, tse hlano ka ho le letona, tse hlano tse ding ka ho le letshehadi. A etsa le mafiso a lekgolo a kgauta.

9A etsa le lebala la baprista, le lebala le leholo, le menyako ya lona, a maneha mamati a lona ka koporo.

10Haele letsha, a le bea ho le letona ho ntlo, le lebile botjhabela, empa e le ka nqa borwa.

11Hurame a etsa le dipitsa, le mangeta a olang melora, le mafiso. Hurame a qetella jwalo mosebetsi oo a o etseditseng morena Salomone, tlung ya Modimo; 12e le ditshiya tse pedi, le dihlooho tse tjhitja tse pedi tse hodima ditshiya, le matanta a mabedi a sireletsang dihlooho tse tjhitja tse pedi tse dintlheng tsa ditshiya; 13le digaranata tse makgolo a mane tsa matanta a mabedi, ho le mela e mmedi ya digarnata letanteng le leng le le leng, ho sireletsa dihlooho tse tjhitja tse pedi tse dintlheng tsa ditshiya. 14A etsa le didulwana, mme a etsa merifi, a e bea didulwaneng; 15le letsha le le leng, le dikgomo tse leshome le metso e mmedi tse katlase ho lona, 16le dipitsa, le mangeta a molora, le difereko, le mesebetsi yohle ya teng. Hurame-Abi a di etsetsa ntlo ya Jehova ka taelo ya morena Salomone, tsa etswa ka koporo. 17Morena a ya di tsholla lehwatateng la Jordane, letsopeng le mahareng a Sukkothe le Tsereda. 18Salomone a etsa mesebetsi eo ka bongata bo boholo, mme boima ba koporo ha bo a ka ba lekanngwa.

19Salomone a phetha mesebetsi yohle ya ntlo ya Modimo jwalo, le aletare ya kgauta, le ditafole tsa mahobe a pontsha, 20le dikandelare, le dilampi tsa tsona tsa kgauta e hlwekileng tse hotetswang ka taelo ya teng pela serapello; 21le dipalesa tsa tsona, le dilampi, le dikere tsa kgauta, kgauta ya tsona e le kgauta e hlwekileng haholo; 22le matlao, le mafiso, le dikgaba, le dipitsa tsa dibano tsa kgauta e hlwekileng, le monyako wa ntlo, le mamati a wona a kahare a sehalaledisiso, le mamati a menyako ya ntlo ya tempele; le wona ya eba a manehilweng ka kgauta.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index