Search form

II MARENA 10

Jehu, morena wa Iseraele. — Ntlo ya Akabe e a fediswa, le bona baporofeta ba Baale.

1Akabe o ba a siile bara ba mashome a supileng Samaria. Jehu a ngola mangolo, a a romela Samaria ho ba lekgotla la Jisreele, ho baholo, le ho bahodisi ba bara ba Akabe, a re: 2Etlere ha lengolo lea le fihlile ho lona, kaha le ena le bara ba monga lona, le makoloi le dipere le motse o dikilweng ka lerako, le ena le le dihlomo, 3le ke le bone e motle, ya tshwanelehang, ho bara ba monga lona, le mmee teroneng ya ntatae, mme le lwanele ntlo ya monga lona. 4Ba mpa ba tshaba haholoholo, ba re: Marena a mabedi a sitilwe ho ema pela hae; rona re ka ema jwang? 5Monga ntlo le mong a motse le baholo le bahodisi, ba romela ho Jehu, ba re: Re bahlanka ba hao, re tla etsa tsohle tseo o tla re laela tsona; re ke ke ra bea e mong morena; etsa kamoo o ratang kateng.

6A eketsa a ba ngolla lengolo, a re: Ha le fela le nkemela, mme le rata ho utlwa lentswe la ka, nkang dihlooho tsa batho bao, e leng bara ba monga lona, le tle ho nna Jisreele hosasane, ha ho le jwalo. Bara ba morena, e leng batho ba mashome a supileng, ba ne ba le ha baholo ba motse ba ba hodisang. 7Lengolo ha le fihla ho bona ba nka bara ba morena, ba ba bolaya, e le ba mashome a supileng; ba hlomela dihlooho tsa bona ka diroto, ba di romela ho yena Jisreele. 8Lenqosa le leng la tla, la mo tsebisa, la re: Ba tlisitse dihlooho tsa bara ba morena. A re: Le di etse qubu tse pedi, kgorong ya motse, e be e be hosasa. 9Ka hosasa, a tswa, a ya ema teng, a re ho setjhaba sohle: Le lokile! Bonang, ke fetohetse monga ka, ka mmolaya; empa bao bohle ke mang ya ba bolaileng? 10Tsebang jwale hore ha ho taba le e nngwe eo Jehova a e boletseng hodima ntlo ya Akabe, e tla wela fatshe; Jehova o entse seo a se boletseng ka Elia, mohlanka wa hae. 11Jehu a bolaya le bohle ba setseng Jisreele ba ntlo ya Akabe, le baholo ba ha hae bohle, le metswalle ya hae, le matona a hae, a se ke a mo tlohella le a mong ya salang.

12A ntoo ema, a tloha, a ikela Samaria. Ha a fihla pela ntlo eo badisa ba bokaneng ho yona, e pela tsela, 13Jehu a kgahlana le banababo Akasia, morena wa Juda, a re: Le bomang? Ba re: Re banababo Akasia: re theohile ho ya dumedisa bara ba morena le bara ba mofumahadi. 14A re: Ba tshwareng ba sa utlwa. Mme ba ba tshwara ba sa utlwa, ba ba bolaela lemeneng la ntlo ya badisa; e le banna ba mashome a mane a metso e mmedi, ho se ke ha tlola le a mong.

15A tloha teng, a kopana le Jonadabe, mora Rekabe, a tlile ho mo kgahlanyetsa. A mo dumedisa, a re ho yena: Na pelo ya hao e tshweu, jwalokaha pelo ya ka e le tshweu bakeng sa pelo ya hao na? Jonadabe a re: E tshweu. Yena a re: Ha ho le jwalo, nnee letsoho la hao. A mo neela letsoho la hae. A mo neela letsoho la hae, a mo nyollela koloing. 16A re ho yena: A re ye le wena, o bone kamoo ke tjhesehetseng Jehova kateng; mme a ya le yena koloing ya hae.

17A kena Samaria, mme a bolaya mesaletsa yohle ya Akabe e Samaria, a ba timeletsa ka polelo eo Jehova a e boleletseng Elia. 18Yaba Jehu o bokella setjhaba sohle, a re ho sona: Akabe o sebeleditse Baale hanyenyane, Jehu yena o tla mo sebeletsa haholo. 19Mme jwale, mpiletseng baporofeta bohle ba Baale, le bahlanka ba hae bohle, le baprista ba hae bohle, ho se ke ha hlokeha leha a le mong; hobane ke rata ho etsetsa Baale sehlabelo se seholo. Mang le mang ya ka hlokehang a ke ke a phela. Athe Jehu o ne a etsa ka mano, hore a tle a timetse bohle ba sebeletsang Baale. 20Jehu a ntoo re: Le tumise hobane mokete wa Baale o tla ba teng. Mme ba o tumisa. 21Jehu a romela kahohle Iseraeleng, mme bohle ba sebeletsang Baale ba tla, ho se ke ha sala leha a le mong ya sa tlang. Ba kena ka tlung ya Baale, mme ntlo ya Baale ya tlala ho tloha monyako ho fihlela motsheo. 22A re ho molebedi wa diaparo: Ntshetsa bohle ba sebeletsang Baale diaparo. A ba ntshetsa diaparo. 23Jehu a kena le Jonadabe, mora Rekabe, ka tlung ya Baale; yaba o re ho ba sebeletsang Baale: Batlang, le bone hore ho se ke ha eba hara lona le a mong wa ba sebeletsang Jehova, e be ba sebeletsang Baale ba nnotshi. 24Mme ba kena ho hlahisa mahlabelo le ditjheso.

Yaba Jehu o kgetha banna ba mashome a robileng meno e le mmedi, a ba bea kantle, a re: Ha e mong wa lona a ka dumella leha a le mong wa banna bao ke ba beileng matsohong a lona ho tlola, bophelo ba hae bo tla ema bakeng sa bophelo ba eo. 25Ha ba qetile ho hlahisa ditjheso, Jehu a re ho dititimi le ho matona: Kenang, le ba bolaye; ho se ke ha tswa leha a le mong. Ba ba bolaya bohle ka lerumo. Dititimi le matona ba ntoo ba lahlela kantle, mme ba kena le motseng wa ntlo ya Baale. 26Ba ntsha diemahale tse ka tlung ya Baale, ba di tjhesa. 27Ba bolaya le seemahale sa Baale, ba qhaqha ntlo ya Baale, ba e etsa mohlaba le kajeno.

28Jehu a timeletsa Baale jwalo Iseraeleng. 29Leha ho le jwalo, haele dibe tseo Jeroboame, mora Nebathe, a sebisitseng Iseraele ka tsona, Jehu ha a ka a di kgeloha, e le manamane a kgauta a Bethele le Dane. 30Jehova a ntoo re ho Jehu: Erekaha o phethile hantle tse leng ntle mahlong a ka, wa etsa ka ntlo ya Akabe ka tsohle tse neng di le pelong ya ka, bara ba hao ba tla dula teroneng ya Iseraele ho isa molokong wa bone. 31Empa Jehu ha a ka a tiisa ho tsamaya molaong wa Jehova, Modimo wa Iseraele, ka pelo ya hae yohle, a se ke a kgeloha dibe tseo Jeroboame a sebisitseng Iseraele ka tsona.

32Mohlang oo, Jehova a qala ho fokotsa naha ya Iseraele. Hasaele a ba hlola meeding yohle ya Iseraele. 33A hapa naha yohle ya Gileade, e nqa botjhabatsatsi ho Jordane, e leng naha ya Bagade, le Barubene, le Bamanasse, ho tswa Aroere e nokeng ya Arnone, ho isa Gileade le Bashane.

34Haele taba tse ding tsa Jehu, le tsohle tseo a di entseng, le matla a hae wohle, ha ke re, di ngodilwe bukeng ya ditaba tsa ho phela ha marena a Iseraele?

35Jehu a orohela ho bontatae, a patwa Samaria; mme Joakase, mora hae, ya eba morena tulong tsa hae. 36Matsatsi ao Jehu a busitseng Iseraele ka wona, a le Samaria, ke dilemo tse mashome a mabedi a metso e robileng meno e le mmedi.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index