Search form

II MARENA 21

Manasse le Amone, marena a Juda.

1Manasse o ne a le dilemo tse leshome le metso e mmedi, ha a qala ho busa; a busa ka dilemo tse mashome a mahlano a metso e mehlano Jerusalema. Lebitso la mmae e ne e le Heftsiba.

2A etsa ho leng hobe mahlong a Jehova, a etsa le ka manyala a ditjhaba tseo Jehova a neng a di lelekile pela bana ba Iseraele. 3A boela a haha nqalo tse diphahameng, tse neng di qhaqhilwe ke ntatae Esekiase, a hahela Baale dialetare, a etsa setshwantsho sa Ashtarothe, jwalokaha ho ne ho entse Akabe, morena wa Iseraele; a kgumamela le makgotla wohle a lehodimo, a a sebeletsa. 4Hape, a haha dialetare ka tlung ya Jehova, eo Jehova a neng a e boletse ha a re: Ke tla bea lebitso la ka Jerusalema. 5A hahela le makgotla wohle a lehodimo dialetare mabaleng a mabedi a ntlo ya Jehova. 6A tjhesa le mora hae, a noha, a etsa bolao, a bea baloi le dinohe, a etsa bobe bo bongata mahlong a Jehova, ho mo halefisa. 7A hloma setshwantsho se betlilweng sa Ashtarothe, seo a se entseng, ka tlung eo Jehova a neng a itse ho Davida le ho mora hae Salomone: Ke tla nne ke bee lebitso la ka kamehla tlung eo le Jerusalema, motse oo ke ikgethetseng wona melokong yohle ya Iseraele. 8Hape, ha nka ke ka boela ka namosa maoto a Baiseraele lefatsheng leo ke le neileng bontata bona, ha ba ka mpa ba nna ba etsa ka tsohle tseo ke ba laetseng tsona, le ka molao wohle oo mohlanka wa ka, Moshe, a ba laetseng wona. 9Empa ha ba ka ba utlwa, mme Manasse a ba kgelosa hore ba etse bobe, le ho fetisa ditjhaba tseo Jehova a neng a di timeditse pela bana ba Iseraele.

10Ebile Jehova o bolela ka bahlanka ba hae, baporofeta, a re: 11Ekare ha Manasse, morena wa Juda, a entse manyala ao; erekaha a entse hampe ho fetisa le tsohle tse entsweng pele ke Baamore; erekaha a kgelositse le Juda ka ditshwantsho tsa hae, 12ka baka leo, Jehova, Modimo wa Iseraele, o re: Bonang, ke ya hlahisetsa Jerusalema le Juda kotsi, eo bohle ba e utlwang, ditsebe tsa bona di tla re tsi. 13Ke tla otlolla kgwele ya Samaria, le tekanyo ya ntlo ya Akabe hodima Jerusalema; ke tla hlakola Jerusalema jwalokaha motho a hlakola pitsa, a e hlakole, a be a e ribehe. 14Ke tla furalla masala a lefa la ka, ke a neele matsohong a bao e leng dira ho wona, hore a fetohe tlatlapo le kgapo pela bohle bao e leng dira ho wona; 15kahobane ba entse ho leng hobe mahlong a ka, mme ba nkgalefisitse, haesale ha bontata bona ba etswa Egepeta ho fihlela kajeno.

16Hape, Manasse a tsholla madi a mangata a se nang molato, a tlatsa Jerusalema ka wona kahohle; ho sa bolelwe sebe sa hae seo a sebesitseng Juda ka sona, kamoo a nnileng a etsa kateng, ho leng hobe mahlong a Jehova.

17Haele taba tse ding tsa Manasse, le tsohle tseo a di entseng, le dibe tseo a sebileng ka tsona, ha ke re, di ngodilwe bukeng ya ditaba tsa ho phela ha marena a Juda?

18Yaba Manasse o orohela ho bontatae, a patwa tshimong ya ntlo ya hae, tshimong ya Ussa; mme Amone, mora hae, ya eba morena tulong tsa hae.

19Amone o ne a le dilemo tse mashome a mabedi a metso e mmedi, ha a qala ho busa, a busa ka dilemo tse pedi Jerusalema. Lebitso la mmae e ne e le Meshullemethe, moradi wa Harutse, wa Jotba.

20A etsa ho leng hobe mahlong a Jehova, jwalokaha ho ne ho entse ntatae Manasse. 21A ya le ka mehlala yohle eo ntatae a ileng ka yona, a sebeletsa ditshwantsho tse sebeleditsweng ke ntatae, a di kgumamela. 22A furalla Jehova, Modimo wa bontatae; mme ha a ka a tsamaya ka tsela ya Jehova. 23Ebile bahlanka ba Amone ba mo fetohela, ba mmolaela tlung ya hae. 24Empa setjhaba sa lefatshe la Juda sa bolaya bohle ba fetohetseng morena Amone, mme setjhaba sa lefatshe sa bea mora hae, Josiase, morena tulong tsa hae.

25Haele taba tse ding tseo Amone a di entseng, ha ke re, di ngodilwe bukeng ya ditaba tsa ho phela ha marena a Juda?

26Ebile o patwa lebitleng la hae, tshimong ya Ussa; mme Josiase, mora hae, ya eba morena tulong tsa hae.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index