Search form

II MARENA 23

1Ebile ba busetsa ditaba ho morena.

Morena a romela, a bokella baholo bohle ba Juda le Jerusalema. 2Morena a nyolohela tlung ya Jehova, yena le banna bohle ba Juda, le bohle ba ahileng Jerusalema, le baprista le baporofeta, le setjhaba sohle, ba banyenyane le ba baholo; a bala tsebeng tsa bona taba tsohle tsa buka ya selekane e fumanweng ka tlung ya Jehova. 3Yena morena a ema pela tshiya, a hlaba selekane pela Jehova, sa ho latela Jehova, le sa ho boloka ditaelo tsa hae, le dikahlolo tsa hae, le melao ya hae, ka pelo yohle le ka moya wohle, le sa ho etsa le ka taba tsa selekane tse ngodilweng bukeng eo. Le sona setjhaba sohle sa emela selekane seo. 4Morena a laela Hilkia, moprista e moholo, le baprista ba mo hlahlamang, le balebedi ba monyako, a re, ba phahle tempeleng ya Jehova mesebetsi yohle e etseditsweng Baale, le Ashtarothe, le makgotla wohle a lehodimo; a e tjhesa kantle ho Jerusalema, masimong a pela Kedrone, mme melora ya yona ya iswa Bethele. 5A leleka baprista ba ditshwantsho ba neng beilwe ke marena a Juda ho tjhesa dibano nqalong tse diphahameng, metseng ya Juda, le mathokong a Jerusalema; a leleka le ba tjhesetsang Baale, le letsatsi le kgwedi, le dihlopha tsa dinaledi, le makgotla wohle a lehodimo dibano. 6A ntsha setshwantsho sa Ashtarothe tlung ya Jehova, a se ntshetsa kantle ho Jerusalema, molatswaneng wa Kedrone, a se tjhesa molatswaneng wa Kedrone, a se tula ya eba lerole, mme a akgela lerole la sona mabitleng a bana ba setjhaba. 7A qhaqha le matlo a Basodoma a ka tlung ya Jehova, moo basadi ba neng ba lohela Ashtarothe masela a ditente. 8A lata le baprista bohle metseng ya Juda, a silafatsa dinqalo tse diphahameng, moo baprista ba neng ba tjhesa dibano, ho qala Geba, ho ya fihla Beerseba; a diha le dinqalo tse diphahameng tse dikgorong, e nngwe e le pela monyako wa Joshua, modisa wa motse, e nngwe e le ka ho le letshehadi la motho ha a kena ka monyako wa motse. 9Empa baprista ba dinqalo tse diphahameng ha ba ka ba hlaba aletareng ya Jehova Jerusalema, empa ba ne ba eja mahobe a se nang ditomoso hara banababo bona. 10Hape, a silafatsa Tofethe, sekgutlong sa bana ba Hinnome, hore ho se ka ha hlola ho eba motho ya tjhesang mora hae leha e le moradi wa hae, ho mo kgethela Moloke. 11A tlosa le dipere tse kgethetsweng letsatsi ke marena a Juda; di be di le pela ntlo ya Jehova, kamoreng ya tona Nethane-Meleke, e lebaleng le kantle la tempele; a tjhesa le makoloi a letsatsi ka mollo. 12Haele dialetare tse kahodima ntlo e kahodimo ya Akase, tse entsweng ke marena a Juda, le dialetare tse entsweng ke Manasse mabaleng a mabedi a ntlo ya Jehova, morena a di qhaqha, a di qhebolla, mme a lahlela lerole la tsona molatswaneng wa Kedrone. 13Le nqalong tse diphahameng tse pela Jerusalema, ka ho le letona ho thaba ya Tahleho, tseo Salomone, morena wa Iseraele, a neng a di hahetse Ashtarothe, manyala a Basidone, le Kemoshe, manyala a Moabe, le Milkome, mayala a bana ba Ammone, tsa silafatswa ke morena. 14A robaka ditshwantsho, a poma le diashera, mme tulo tsa tsona a di tlatsa ka masapo a batho. 15Le aletare e Bethele le nqalo e phahameng e neng e entswe ke Jeroboame, mora Nebathe, ya sebisitseng Iseraele, ke re, aletare eo le nqalo e phahameng ya teng, a di qhaqha, a tjhesa nqalo e phahameng, a e tula ya eba lerole; a ntoo tjhesa le ashera ya teng.

16Josiase, ha a reteleha, a bona mabitla a le teng thabeng; ebile o a romela, a ntsha masapo mabitleng, a a tjhesa aletareng, a e silafatsa, ka ho ya ka lentswe la Jehova leo monna wa Modimo a neng a le boletse mohla a bolelang ditaba tsena. 17Morena a re: Sefika seo ke se bonang ke sang? Batho ba motse ba mmolella, ba re: Ke lebitla la monna wa Modimo ya kileng a tla a etswa Juda, a howelletsa aletare ya Bethele taba tseo o di entseng. 18A re: Mo tloheleng; ho se ke ha eba motho ya ntshang masapo a hae. Ebile ba tlohela masapo a hae hammoho le masapo a moporofeta ya tlileng a etswa Samaria.

19Le matlo wohle a dinqalo tse diphahameng, tse metseng ya Samaria, tse entsweng ke marena a Iseraele, ho halefisa Jehova ka tsona, Josiase a a tlosa, a etsa ka wona kahohle kamoo a entseng Bethele kateng. 20Le baprista bohle ba nqalo tse diphahameng, a ba bolaela dialetareng, mme a tjhesa masapo a batho hodima tsona; a ntoo boela Jerusalema.

21Ebile morena a laela setjhaba sohle, a re: Etsetsang Jehova, Modimo wa lona, Paseka, jwalokaha ho ngodilwe bukeng ena ya selekane. 22Ruri ho ne ho eso ho ka ho etswa Paseka e jwalo, haesale baahlodi ba ahlolela Iseraele, le ka tshiu tsohle tsa marena a Iseraele le tsa marena a Juda. 23Ke ka selemo sa leshome le metso e robileng meno e le mmedi sa ho busa ha Josiase Paseka ena e etseditsweng Jehova, Jerusalema.

24Haele baloi le dinohe, le diterafime le ditshwantsho, le manyala wohle a neng a bonwa fatsheng la Juda le Jerusalema, Josiase a di lahla, hore a tsose ditaba tsa molao tse ngodilweng bukeng e fumanweng ke moprista Hilkia tlung ya Jehova. 25Le pele, ha ho a ka ha eba morena ya jwaloka yena, ya sokolohetseng ho Jehova ke pelo yohle ya hae, le ka moya wohle wa hae, le ka matla wohle a hae, ho etsa le ka tsohle tsa molao wa Moshe; le kamorao, ha ho a ka ha hlaha ya jwaloka yena. 26Leha ho le jwalo, Jehova ha a ka a phetsa ho halefela Juda haholo, ka baka la tsohle tseo Manasse a mo halefisitseng ka tsona. 27Hobane Jehova o fela a ne a itse: Le Juda ke tla mo tlosa pela ka, jwalokaha ke tlositse Iseraele, ke lahle le Jerusalema, motse wona oo ke neng ke ikgethetse wona, le ntlo eo ke neng ke itse, lebitso la ka e tla be e sa le le le teng ho yona.

28Haele taba tse ding tsa Josiase, le tsohle tseo a di entseng, ha ke re, di ngodilwe bukeng ya ditaba tsa ho phela ha marena a Juda?

29Tshiung tsa hae, Faro-Neko, morena wa Egepeta, a futuhela morena wa Assiria, ho fihla nokeng ya Eufrate; le morena Josiase a ya mo kgahlanyetsa; empa Faro a mmolaela Megiddo, mohla ba teaneng. 30Yaba bahlanka ba hae ba tloha Megiddo, ba mo isa Jerusalema ka koloi, a se a shwele, mme ba mo pata lebitleng la hae. Yaba setjhaba sa lefatshe la Juda se nka Joakase, mora Josiase; ba mo tlotsa, ba mmea morena tulong tsa ntatae.

Joakase, Jojakime le Jojakine, marena a Juda.

31Joakase o ne a le dilemo tse mashome a mabedi a metso e meraro, ha a qala ho busa; a busa ka kgwedi tse tharo Jerusalema. Lebitso la mmae e ne e le Hamuthale, moradi wa Jeremia wa Libna.

32A etsa ho leng hobe mahlong a Jehova, a etsa ka tsohle tse entsweng ke bontatae. 33Ebile Faro-Neko o mo tlama ka mahlaahlela, Ribla, naheng ya Hamathe, hore a se ke a hlola a busa Jerusalema; a ntshisa lefatshe lekgetho la lekgolo la ditalenta tsa silefera le talenta e nngwe ya kgauta. 34Faro-Neko a ntoo bea Eliakime, mora Josiase, morena tulong tsa ntatae Josiase; a fetola lebitso la hae, ya eba Jojakime; mme a ya le Joakase; eo a ya Egepeta, a shwela teng. 35Haele Jojakime, a nea Faro silefera le kgauta; a lekanya lefatshe kamoo le tshwanetseng ho ntsha tjhelete kateng, ka taelo ya Faro; a ntshisa setjhaba sa lefatshe silefera le kgauta, e mong le e mong kamoo a lekanyeditsweng kateng, e le hore ho newe Faro-Neko.

36Jojakime o ne a le dilemo tse mashome a mabedi a metso e mehlano ha a qala ho busa; a busa ka dilemo tse leshome le motso o mong Jerusalema. Lebitso la mmae e ne e le Sebudda, moradi wa Pedaia wa Ruma.

37Le yena a etsa ho leng hobe mahlong a Jehova, a etsa le ka tsohle tse entsweng ke bontatae.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index