Search form

II SAMUELE 9

Davida o etsa Mefiboshethe mora Jonathane hantle.

1Jwale Davida a re: Na ha ho sa le le a mong ya siilweng wa ntlo ya Saule, ke tle ke mo etse ka mohau ka baka la Jonathane na? 2Ho ne ho sa le teng mohlanka wa ntlo ya Saule, lebitso la hae e le Tsiba; a ya bitswa hore a tle ho Davida. Morena a re ho yena: A ke wena Tsiba na? Eo a re: Ke nna mohlanka wa hao! 3Morena a re: Na ha ho sa le motho wa ntlo ya Saule, ke tle ke mo etse ka mohau wa Modimo na? Tsiba a re ho morena: Ho sa setse mora Jonathane, ya holofetseng maoto. 4Morena a re ho yena: O kae? Tsiba a re ho morena: Bona, o ha Makire, mora Ammiele, mane Lodebare.

5Yaba morena Davida o romela ho mo lata ha Makire, mora Ammiele, Lodebare. 6Mefiboshethe, mora Jonathane, mora Saule, ha a fihla pela Davida, a itihela fatshe ka sefahleho, a kgumama. Davida a re: Mefiboshethe! Eo a re: Ke nna mohlanka wa hao! 7Davida a re ho yena: Se tshabe, hobane ke fela ke tla o etsa ka mohau ka baka la Jonathane ntatao, ke busetse ho wena le masimo wohle a ntatao Saule; wena, o tla nne o je dijo tafoleng ya ka kamehla. 8Ebile Mefiboshethe o kgumama, a re: Mohlanka wa hao keng, ha o tadimile ntja e shweleng, jwalokaha ke le yona na?

9Morena a bitsa Tsiba, mohlanka wa Saule, a re ho yena: Tsohle tseo e neng e le tsa Saule, le tsa ntlo yohle ya hae, ke di neile mora monga hao. 10O mo lemele naha eo, e le wena le bara ba hao, le bahlanka ba hao, mme o mo tlisetse tse behwang, e be dijo tse jewang ke mora monga hao. Haele Mefiboshethe, mora monga hao, o tla nne a je tafoleng ya ka kamehla. Tsiba o ne a ena le bara ba leshome le metso e mehlano le bahlanka ba mashome a mabedi. 11Tsiba a re ho morena: Mohlanka wa hao o tla etsa kahohle kamoo morena, monga ka, a laetseng mohlanka wa hae kateng. Davida a re: Mefiboshethe a nne a je tafoleng ya ka, jwaloka e mong wa bara ba morena. 12Mefiboshethe o ba a na le mora e monyenyane, lebitso la hae e le Mika; bohle ba ahileng ha Tsiba e ne e le bahlanka ba Mefiboshethe. 13Kahoo, Mefiboshethe a dula Jerusalema, hobane o ne a ntse a eja dijo tafoleng ya morena; o ne a holofetse maoto.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index