Search form

DIKETSO 11

1Baapostola le baena ba ahileng Judea ba utlwa hoba baditjhaba le bona ba amohetse lentswe la Modimo. 2Yare ha Petrose a kgutletse Jerusalema, badumedi bao e leng ba lebollo ba mo tsekisa, 3ba re: O kene ho banna ba sa bollang, mme o jele le bona.

4Yaba Petrose o qala ho ba phetela ditaba ka ho di hlomahanya, a re: 5Ke ne ke le motseng wa Jopo, ke rapela; moya wa ka wa haptjwa; mme ka bona ntho e kang lesela le leholo le theoha lehodimong, le tlamilwe dintlheng tse nne, mme la tla ho nna. 6Yare ha ke nyarela ho lona, ka tadima, ka bona diphoofolo tsa lefatshe tse maoto a mane, le dibatana, le dihahabi, le dinonyana tsa lehodimo. 7Ka utlwa le lentswe le reng ho nna: Petrose ema, o hlabe, o je. 8Ka re: Ho se be jwalo Morena; hobane ha ke eso ho je ntho e ditshila, leha e le e sa hlwekang. 9Lentswe la boela la tswa lehodimong, la nkaraba, la re: Tseo Modimo o di hlwekisitseng, o se ke wa re, di ditshila. 10Hona ha etswa hararo; tseo kaofela tsa ntoo boela di nkelwa lehodimong. 11Ka nako yona eo, ka tshoha banna ba bararo, ba romilweng ho nna, ba tswang Sesarea, ba hlaha monyako wa ntlo eo ke neng ke le ho yona. 12Moya wa mpolella, hore ke ye le bona, ke sa kganane. Baena bana ba tsheletseng ba ya le nna le bona, mme ra kena tlung ya monna eo. 13A re bolella kamoo a boneng lengeloi kateng, ka tlung ya hae, le eme, le re ho yena: Romela banna Jopo, mme o late Simone, ya bitswang Petrose. 14Ke yena ya tla o bolella taba tseo o tla bolokeha ke tsona, wena le ntlo ya hao kaofela. 15Eitse hobane ke qale ho bua, Moya o Halalelang wa theohela hodima bona, jwalokaha ho entswe ho rona ho qaleng. 16Yaba ke elellwa polelo ya Morena, kamoo a boletseng kateng, a re: Johanne o fela a kolobeditse ka metsi, empa lona le tla kolobetswa ka Moya o Halalelang. 17Mme Modimo ha o ba file neo e jwaloka eo o re neileng yona, rona ba dumetseng ho Morena Jesu Kreste, nna, ke ne ke le mang hore ke hane ho Modimo?

18Yare ha ba utlwa taba tseo, ba lesa ho belaela; mme ba tlotlisa Modimo ka ho re: Efela Modimo o neile le baditjhaba pako, hore ba bone bophelo.

Bakreste ba Antioke. — Barnabase le Saule ba sebetsa teng. — Tlala e porofetilweng ke Agabuse.

19Ba neng ba qhalantswe ke hloriso e hlahileng ka Setefane, ba fetela pele ho ya Fenisia, le Sipera, le Antioke, ba sa bolelle motho lentswe, haese Bajuda ba nnotshi. 20Leha ho le jwalo, ba bang ho bona, e leng banna ba Sipera le ba Sirene, yare ha ba kena Antioke, ba bua le Bakgerike, ba ba bolella ditaba tsa Morena Jesu. 21Letsoho la Morena la eba le bona, mme batho ba bangata ba dumela, ba sokolohela ho Morena.

22Taba eo, eitse ha e utlwahala kerekeng ya Jerusalema, ba roma Barnabase hore a etele Antioke. 23Eitse ha a fihla, mme a bona mohau wa Modimo, a thaba, mme a ba kgothatsa kaofela ho tiisetsa ho Morena ka pelo e pheheletseng. 24Hobane e ne e le monna ya molemo, ya tletseng Moya o Halalelang le tumelo; mme batho ba bangata haholo ba kgomarela Morena.

25Yaba Barnabase o ya Tarese, ho batla Saule. 26Yare hobane a mo fumane, a mo tlisa Antioke; ba dule teng ba qeta ngwaha ba ntse ba phutheha le kereke; mme ba ruta bongata bo boholo. Ke Antioke barutuwa ba qadileng ho bitswa bakreste.

27Mehleng eo, baporofeta ba bang ba theoha Jerusalema, ba tla Antioke. 28E mong wa bona, ya bitswang Agabuse, a ema, mme a porofeta ka Moya hore tlala e kgolo e tla wela lefatshe lohle. E fedile ya hlaha mehleng ya Sesare Klaude. 29Barutuwa ba eba ntswe le le leng ho romela baena ba ahileng Judea dithuso, kamoo e mong le e mong a neng a ka ntsha kateng. 30Ba fela ba etsa hoo, mme ba di romela ho baholo ba phutheho ka matsoho a Barnabase le Pauluse.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index