Search form

DEUTERONOMA 10

Erekaha Modimo o babaletse setjhaba sa Iseraele ka lerato, e ka kgona se o tshabe, se be se o utlwe.

1Mohlang oo, Jehova a re ho nna: Betla matlapa a mabedi a kang a pele, o nyolohele ho nna thabeng; hape o tla etsa areka ya difate. 2Ke tla ngola matlapeng ao mantswe a neng a ngodilwe matlapeng a pele ao o a bolaileng, mme o tla a kenya arekeng. 3Yaba ke etsa areka ya sefate sa leoka, ka betla matlapa a mabedi a kang a pele; ka nyolohela thabeng ke tshwere matlapa a mabedi matsohong a ka. 4Jehova a ngola matlapeng seo a neng a se ngodile pele, mantswe a leshome ao Jehova a neng a le boleletse wona, a le thabeng, hara mollo, la letsatsi la phutheho; mme Jehova a nnea matlapa ao. 5Ka kgutla, ka theoha thabeng, ka bea matlapa arekeng eo ke e entseng, mme a dula teng jwalokaha Jehova a ne a ntaetse.

6(Yaba bana ba Iseraele ba tloha Beerothe-Bene-Jaakane, ba ya Mosera; ke moo Aarone a shwetseng teng, a ba a patwa teng; mme Eleasare, mora wa hae, ya eba yena moprista tulong tsa hae. 7Ba ntoo tloha teng, ba tla Gudegoda; ha ba tloha Gudegoda, ba ya Jothbatha, e leng naha ya melapo. 8Mohlang oo, Jehova a kgetha leloko la Levi ho jara areka ya selekane sa Jehova, le ho ema pela Jehova, le ho mo sebeletsa, le ho hlohonolofatsa setjhaba ka lebitso la hae, ho fihlela la kajeno. 9Ke ka baka leo Levi a se nang karolo, leha e le lefa, le banababo; Jehova ke yena e leng lefa la hae, jwalokaha Jehova, Modimo wa hao, a mmoleletse.)

10Haele nna, ka hlola thabeng matsatsi a mashome a mane, le masiu a mashome a mane, jwaloka mohla pele. Jehova a boela a nkutlwa le mohlang oo; mme Jehova ha a ka a rata ho o timetsa. 11Yaba Jehova o re ho nna: Ema o tsamaye, o etelle setjhaba pele, hore ba kene lefatsheng leo ke anetseng bontata bona hore ke tla ba fa lona, ba le rue.

12Mme jwale, Iseraele, Jehova, Modimo wa hao, o batlang ho wena, haese hore o tshabe Jehova, Modimo wa hao, o tsamaye tseleng tsa hae tsohle, o mo rate, mme o sebeletse Jehova, Modimo wa hao, ka pelo ya hao yohle, le ka moya wa hao wohle, 13o boloke ditaelo tsa Jehova, le melao ya hae eo ke o laelang yona kajeno, hore o be o iketle? 14Bona, mahodimo le mahodimo a mahodimo ke a Jehova, Modimo wa hao, le lona lefatshe le dintho tsohle tse ho lona. 15Jehova o kgomaretse bontatao ba nnotshi hore a ba rate, mme kamora bona, o kgethile ditloholo tsa bona, ke ho re lona, hara ditjhaba tsohle, kamoo ho leng kateng le kajeno. 16Ha ho le jwalo, bolotsang dipelo tsa lona, mme le se ke la hlola le satalatsa melala ya lona. 17Hobane, Jehova, Modimo wa lona, ke Modimo wa medimo, le Morena wa marena, Modimo o moholo, o matla, o tshabehang, o sa tadimeng tshobotsi ya motho, o sa amoheleng dimpho, 18o ahlolelang kgutsana le mosadi wa mohlolohadi, o ratang moditjhaba, o mo neang dijo le diaparo. 19Le lona, ratang moditjhaba, etswe le bile baditjhaba naheng ya Egepeta. 20Tshaba Jehova, Modimo wa hao, o mo sebeletse, o mo kgomarele, mme o ane ka lebitso la hae. 21Ke yena e leng letlotlo la hao, ke yena e leng Modimo wa hao, o o etseditseng ntho tse kgolo tsena, tse tshabehang, tseo mahlo a hao a di boneng. 22Bontatao ba ne ba theohetse Egepeta, ba le mashome a supileng, mme jwale Jehova, Modimo wa hao, o o atisitse, o bile o o entse bongata bo ka ka dinaledi tsa lehodimo.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index