Search form

DEUTERONOMA 14

Ho iphatsa. — Diphoofolo le dihlapi le dinonyana tse hlwekileng le tse sa hlwekang.

1Le bana ba Jehova, Modimo wa lona; le se ke la iphatsa, mme le se ke la ipeola pakeng tsa mahlo ka baka la mofu. 2Hobane o setjhaba se kgethetsweng Jehova, Modimo wa hao, mme Jehova o o kgethile hara ditjhaba tsohle tse lefatsheng hore o tle o be setjhaba sa hae sa sebele.

3O se ke wa ja ntho tse manyala.

4Diphoofolo tseo le ka di jang ke tsena: Ke kgomo, nku, le podi, 5kgama, tshephe, nare, none, letsa, tholo le phuthi. 6Hara diphoofolo, le ka ja tsohle tse ditlhako di arohaneng, tse dikgola tse pedi, tse thuisang. 7Empa le se ke la ja tse thuisang feela, leha e le tse ditlhako di arohaneng feela, jwaloka kamele, moutla, le pela; hobane di a thuisa, empa ha di na ditlhako tse arohaneng; tsena ke tse ditshila ho lona; 8le yona kolobe, hobane leha tlhako tsa yona di arohane, ha e thuise; e be ditshila ho lona. Le se ke la ja nama ya tsona, mme le se ame ditopo tsa tsona.

9Tseo le ka di jang ho tsohle tse metsing ke tsena: Le je tsohle tse nang le dipheonyana le makgakgapha. 10Empa le se ke la ja tse se nang dipheonyana, leha e le makgakgapha; tsena e be tse ditshila ho lona.

11Le ka ja dinonyana tsohle tse hlwekileng. 12Empa tseo e ka kgonang le se ke la di ja, ke tsena: Ntsu, seodi, le seitlhwaeledi; 13nkgodi, letlaka, le mohakajane, le mefuta ya tsona; 14le makgwaba wohle ka mefuta ya wona; 15le mpshe, kgohoyadira, letlakapipi, le phakwe ka mefuta ya yona; 16sephooko, lehalanyane le lengangane; 17moholodi, kokolofitwe, le seinodi, 18mokotatsie le masianoke, ka mefuta ya tsona, le lehehemu, le mmankgane. 19Le dikokwanyana tsohle tse rurang, e be tse ditshila ho lona; di se ke tsa jewa. 20Jang dinonyana tsohle tse hlwekileng.

21Le se ke la ja nama ya tse itjhweletseng; o mpe o e nee moditjhaba ya menyakong ya hao, a e je; mohlomong o reke ho moditjhaba ka yona; hobane wena o setjhaba se kgethetsweng Jehova, Modimo wa hao.

O se ke wa hladiya potsanyane lebeseng la mma yona.

Karolo ya leshome.

22O kgethisise karolo ya leshome ya dintho tsohle tse hlahiswang ke peo tsa hao, tse melang masimong a hao ka selemo se seng le se seng. 23O je pela Jehova, Modimo wa hao, nqalong eo a tla ikgethela yona ho bea lebitso la hae teng, karolo ya leshome ya koro ya hao, le ya veine e ntjha ya hao, le ya ole ya hao, le matsibolo a dikgomo le a dinku tsa hao, o tle o ithute ho tshaba Jehova, Modimo wa hao, kamehla. 24Empa etlare ha tsela e le telele haholo, mme o sitwa ho isa dintho tseo, kahobane mohlomong nqalo eo Jehova, Modimo wa hao, a tla ikgethela yona ho bea lebitso la hae teng, e tla ba hole le wena, mohla Jehova, Modimo wa hao, a o hlohonolofaditseng, 25o tla reka tjhelete ka dintho tsena; o tla fupara tjhelete tseo matsohong a hao, o ye nqalong eo Jehova, Modimo wa hao, a tla e kgetha; 26mme o tla reka ka tjhelete tseo tsohle tseo pelo ya hao e ka di lakatsang, dikgomo, dinku, kapa veine, kapa seno se seng se matla, leha e le ntho tsohle tseo pelo ya hao e ka di lakatsang, o di je hona teng, pela Jehova, Modimo wa hao, mme o thabe, wena, le ba ntlo ya hao; 27le Molevi ya menyakong ya hao, o se ke wa mo tlohela, hobane ha a na kabelo le lefa jwaloka wena.

28Qetellong ya dilemo tse tharo, o ntshe karolo yohle ya leshome ya tseo o di kotutseng tsa selemo seo, mme o e bokelle menyakong ya hao. 29Jwale Molevi ya se nang kabelo le lefa jwaloka wena, le moditjhaba, le kgutsana, le mosadi wa mohlolohadi, ba metseng ya hao, ba tla tla, mme ba je, ba kgore; Jehova, Modimo wa hao, a tle a o hlohonolofatse mesebetsing yohle ya matsoho a hao, eo o e etsang.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index