Search form

DEUTERONOMA 21

Dipolao tseo baetsi ba tsona ba sa tsejweng.

1Etlare lefatsheng leo Jehova, Modimo wa hao, a o fang lona ho le rua, ha setopo sa motho ya bolailweng, se fumanwa se rapaletse naheng, ho sa tsejwe ya mmolaileng; 2baholo ba hao le baahlodi ba hao ba tla tswa, ba lekanye sebaka se tlohang ho motho ya bolailweng ho isa metseng e kamathokong ka nqa tsohle. 3Ha ho tsebilwe motse o leng haufi le motho ya bolailweng, baholo ba motse oo ba tla nka kgomo ya sethole eo ho esong ho sebetswe ka yona, e esong ho hule jokong; 4baholo ba motse oo ba tla theosetsa sethole seo molapong oo metsi a wona a mathang kamehla, moo ho sa lengweng, le moo ho sa jalweng, mme teng molapong, ba tla roba molala wa sethole seo. 5Baprista, bara ba Levi, ba tla atamela; hobane ke bona ba kgethilweng ke Jehova, Modimo wa hao, hore ba mo sebeletse le ho hlohonolofatsa ka lebitso la Jehova, le hore dinyewe tsohle le dikotsi tsohle di ahlolwe ke melomo ya bona. 6Baholo bohle ba motse oo o leng haufi le motho ya bolailweng, ba tla hatlela matsoho hodima sethole seo se robilweng molala molapong. 7Ba tla bolela, ba re: matsoho a rona ha a ka a tsholla madi ana, le mahlo a rona ha a ka a bona letho. 8Oho Jehova, o tshwarele setjhaba sa hao sa Iseraele, seo o se lopolotseng, mme o se ke wa balla setjhaba sa hao sa Iseraele madi a se nang molato. Mme ba tla leselwa molato wa madi ao. 9Ke moo o tla tlosa madi a se nang molato haeno, ha o entse se lokileng pela Jehova.

Ba tshwarwang ntweng.

10Etlare ha o futuhela dira tsa hao, mme Jehova, Modimo wa hao, a di neela matsohong a hao, mme o kgutla o ena le bao o ba hapileng; 11ha o bona hara ba hapilweng mosadi e motle, mme o mo rata, o mo nka hore e be mosadi wa hao; 12o tla mo isa tlung ya hao; a beole hlooho ya hae, a pome dinala tsa hae; 13a hlobole diaparo tsa hae tsa bohapuwa, mme a dule tlung ya hao, a llele ntatae le mmae ka kgwedi e le nngwe; o ntoo kena ho yena, o be monna wa hae, yena e be mosadi wa hao. 14Empa mohlomong, ha o se o sa kgahliswe ke yena, o tla mo lesela, a ye moo a ratang teng; o se ke wa reka tjhelete ka yena, leha e le ho mo etsa lekgoba, hobane o mo kokobeditse.

Ditokelo tsa bana ba matsibolo.

15Ekare ha motho a ena le basadi ba babedi, e mong e le ya ratwang, e mong e le ya hloilweng, mme ya ratwang le ya sa ratweng ba mo tswaletse bana, mme mora wa letsibolo e le mora wa mosadi ya hloilweng; 16mohla ntata bona a abelang bana ba hae lefa la tseo a nang le tsona, a ke ke a bea mora wa ya ratilweng e moholo bakeng sa mora wa ya hloilweng, e leng yena letsibolo; 17a mpe a tiise boholo ba mora wa ya hloilweng ka ho mo nea kabelo tse pedi tsa dintho tsohle tsa hae, hobane ke yena sehlooho sa bonna ba hae; tokelo ya letsibolo ke ya hae.

Bana ba ikgantshang.

18Etlare ha motho a ena le mora ya lonya, ya ikgantshang, ya hanang ho utlwa lentswe la ntatae le lentswe la mmae, mme leha ba ntse ba mo laya, a ntse a hana ho ba utlwa; 19ntatae le mmae ba tla mo tshwara, ba mo tlise ho baholo ba motse wa habo, kgorong ya motse wa habo; 20ba bolelle baholo ba motse wa habo, ba re: Mora enwa wa rona o lonya, o a ikgantsha; o hana ho utlwa lentswe la rona; ke mohlakafollela, hape ke letahwa. 21Jwale batho bohle ba motse wa habo ba tla mo tlapunya ka majwe, a shwe. Tlosa bobe haeno jwalo, hore Baiseraele bohle ba utlwe, mme ba tshabe.

Ditopo tse fanyehilweng.

22Etlere ha motho a entse sebe se lokelwang ke lefu, mme a bolawa, wa mo fanyeha sefateng, 23setopo sa hae se se ke sa sala sefateng bosiu bohle, o mpe o se epele ka lona letsatsi leo; hobane ya fanyehilweng o rohakilwe ke Modimo, mme ha o na ho silafatsa lefatshe leo Jehova, Modimo wa hao, a o fang lona ho le rua.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index