Search form

DEUTERONOMA 23

Batho ba se nang ho kena phuthehong.

1Monna ya lehaole, kapa e leng ya entsweng lona ka kotsi, kapa e leng ya entsweng lona ke batho ka thipa, a ke ke a kena phuthehong ya Jehova. 2Ya tswetsweng ka bohlola a ke ke a kena phuthehong ya Jehova, esita le ditlohotloholwana tsa hae tsa leloko la leshome di ke ke tsa kena phuthehong ya Jehova. 3Moammone le Momoabe ba ke ke ba kena phuthehong ya Jehova; esita le ditlohotloholwana tsa bona tsa leloko la leshome di ke ke tsa kena phuthehong ya Jehova, le ka mohla o le mong; 4kahobane ha ba ka ba tla le kgahlanyetsa tseleng ka bohobe le ka metsi, mohla le tswang Egepeta; le kahobane ba ne ba putse Balaame, mora Peore, wa Pethore naheng ya Mesopotamia, hore a o rohake. 5Leha ho le jwalo, Jehova, Modimo wa hao, ha a ka a dumela ho utlwa Balaame, empa Jehova, Modimo wa hao, thohako eo o o fetoletse yona hlohonolofatso, kahobane Jehova, Modimo wa hao, o a o rata. 6O se ke wa ba batlela kgotso, leha e le molemo, ka matsatsi wohle a hao. 7O se ke wa hloya Moedomo, hobane ke ngwaneno; o se ke wa hloya Moegepeta, hobane o ne o le mojaki naheng ya hae. 8Bana ba bona, ba tswallwang bona molokong wa boraro wa ditloholwana, ba tla kena phuthehong ya Jehova.

Diahelo di hlweke.

9Ha o futuhela dira tsa hao, o itshabise tsohle tse mpe. 10Ekare ha e mong wa heno a sa hlweka ka baka la taba e mo hlahetseng bosiu, a tswele kantle ho diahelo, mme a se ke a kena diahelong. 11Ha e se e batla e eba mantsiboya, a ke a itlhatswe ka metsi, mme a boele diahelong, ha letsatsi le diketse. 12O be le nqalo kantle ho diahelo eo o tswelang ho yona, mohlabeng. 13O be le kepa diphahlong tsa hao, mme ha o etswa ho ya dula kantle, o tjheke sekoti ka yona, o ntoo kwahela se tswileng ho wena. 14Hobane Jehova, Modimo wa hao, o tsamaya hara diahelo tsa hao ho o boloka, le ho neela dira tsa hao matsohong a hao. Diahelo tsohle tsa hao di ke di hlweke ke hona, mme Jehova a se ke a bona taba e ditshila ha hao, a tle a se ke a o furalla.

Makgoba a thobang.

15Mohlanka ya tshabetseng ha eno, ya balehelang monga hae, o se ke wa mo busetsa ho monga hae; 16a mpe a dule le wena, haeno, nqalong eo a tla e kgetha motseng o mong wa hao, moo a tla rata teng; mme o se ke wa mo tshwenya.

Dimpho tse etswang ka meputso ya bohlola.

17Ho se ke ha eba seotswa hara baradi ba Iseraele; hape, ho se ke ha eba le a mong wa bara ba Iseraele ya ineelang bohlola.

18O se ke wa hlahisa ka tlung ya Jehova, Modimo wa hao, moputso wa seotswa, leha e le theko ya ntja, bakeng sa kano eo o itlamileng ka yona; hobane ntho tse pedi tseo ke manyala pela Jehova, Modimo wa hao.

Phahello.

19O se ke wa adima ngwaneno ka ho batla phahello ya ditjhelete, kapa phahello ya dijo, leha e le phahello ya dintho tse ding tse ka namuwang ka phahello. 20O ka adima moditjhaba ka ho batla phahello; o mpe o adime ngwaneno o sa batle phahello, hore Jehova, Modimo wa hao, a tle a o hlohonolofatse mesebetsing yohle ya matsoho a hao naheng eo o yang ho e rua.

Dikano.

21Etlere ha o itlamile ka kano ho Jehova, Modimo wa hao, o se ke wa dieha ho e phetha; hobane Jehova, Modimo wa hao, o tla e botsa ho wena, mme sebe se tla ba teng ha o ka dieha.22Empa ha o sa itlame ka kano, sebe se tla ba siyo ho wena. 23Se boletsweng ke melomo ya hao, o se hopole, o se etse kamoo o itlamileng ho Jehova kateng, Modimo wa hao, e be mpho ya boithatelo ba hao, e boletsweng ke melomo ya hao.

Morara le diqwapi tse salang masimong.

24Ha o kena tshimong ya wa heno ya morara, o ka ja ditholwana tsa wona kamoo o lakatsang kateng, wa ba wa kgora; empa ha o tloha teng, o se ke wa nka letho serotong sa hao. 25Leha o kena tshimong ya wa heno ya koro, o ka kga diqwapi ka matsoho a hao, o mpe o se ke wa kenya sekele korong ya wa heno.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index