Search form

DEUTERONOMA 6

Mokgwa wa ho boloka melao ya Jehova.

1Ke yona melao, le ditaelo, le dikahlolo, tseo Jehova, Modimo wa lona a ntaetseng ho le ruta tsona, hore le tle le etse ka tsona lefatseng leo le yang ho le rua; 2o tle o tshabe Jehova, Modimo wa hao, ka ho boloka melao ya hae yohle, le ditaelo tsa hae tsohle, tseo ke o laelang tsona, hore o di boloke, e le wena, le mora wa hao, le mora wa mora wa hao, ka ditshiu tsohle tsa ho phela ha hao, matsatsi a hao a tle a ngatafale. 3Oho! Iseraele, di utlwe hle, mme o itiise ho boloka melao eo, o tle o be le lehlohonolo, mme le ate haholo lefatsheng le kollang lebese le dinotshi, jwalokaha Jehova, Modimo wa bontatao, a o boleletse.

4Utlwa, Iseraele! Modimo wa rona ke Jehova, Jehova a nnotshi.

5Rata Jehova, Modimo wa hao, ka pelo ya hao yohle, le ka moya wa hao wohle, le ka matla a hao wohle. 6Ditaelo tseo ke o laelang tsona kajeno, di be pelong ya hao. 7O tle o di rute bana ba hao, mme o bue ka tsona, ha o dutse tlung ya hao, leha o le tseleng o tsamaya, leha o ya robala, leha o tsoha. 8O di tlame matsohong a hao hore e be dipontsho ho wena, mme di be jwaloka moqhaka phatleng pakeng tsa mahlo a hao. 9O di ngole difateng tsa menyako ya ntlo ya hao, le mamating a yona.

10Etlere hobane Jehova, Modimo wa hao, a o kenye lefatsheng leo a anetseng bontatao, Abrahama, Isaaka, le Jakobo, hore o tla o nea lona, e leng metse e meholo, e metle, eo o sa kang wa e haha, 11le matlo a tletseng menono yohle, a sa kang a tlatswa ke wena, le didiba tse tjhekilweng, tseo o sa kang wa di tjheka, le merara, le mehlwaare eo o sa kang wa e hloma, mme ha o se o jele, o kgotse; 12o iponele hore o se lebale Jehova ya o ntshitseng lefatsheng la Egepeta, tlung ya bohlanka.

13Tshaba Jehova, Modimo wa hao, o mo sebeletse, o ane ka lebitso la hae. 14Le se ke la latela medimo esele, medimo ya ditjhaba tse ahileng kamathoko ho lona; 15hobane Jehova, Modimo wa hao, ya leng ha eno, ke Modimo o boulelang. Bohale ba Jehova, Modimo wa hao, bo ka o tukela, mme Jehova a ka o timetsa lefatsheng. 16Se lekeng Jehova, Modimo wa lona, jwalokaha le mo lekile Massa. 17Bolokang ka ho tiya ditaelo tsa Jehova, Modimo wa lona, le dikahlolo tsa hae, le melao eo a o laetseng yona. 18O etse se lokileng le se molemo pela mahlo a Jehova, o tle o iketle, mme o kene, o rue lefatshe le molemo leo Jehova a anetseng bontatao hore o tla ba fa lona,19ka ho lelekisa pela hao dira tsohle tsa hao, jwalokaha Jehova a boletse.

20Etlere ha mora wa hao a o botsa kamoso, a re: Na ditemoso, le melao, le ditaelo tseo Jehova, Modimo wa rona, a re laetseng tsona, di reng? 21O tle o bolelle mora wa hao, o re: Re ne re le bafo ba Faro Egepeta, mme Jehova o re ntshitse Egepeta, ka letsoho le matla; 22Jehova o entse dipontsho le mehlolo e meholo e tshabehang pela mahlo a rona, ho lwantsha Egepeta le Faro, le ntlo ya hae kaofela ha yona; 23o re ntshitse teng, hore a re tlise kwano ho re nea lefatshe leo a neng a anetse bontata rona, hore o tla re nea lona. 24Jehova o re laetse ho etsa ka melao eo kaofela, re ntse re tshaba Jehova, Modimo wa rona, re tle re be le lehlohonolo kamehla, mme re bolokwe ke yena, jwaloka kajeno. 25Mme hoo e tla ba ho loka ha rona, ha re tiya ho boloka ditaelo tseo tsohle pela Jehova, Modimo wa rona, jwalokaha a re laetse.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index