Search form

DEUTERONOMA 9

Baiseraele ba hopotswa meikgantsho ya bona.

1Iseraele, mamela! Kajeno o tla tshela Jordane ho ya rua ditjhaba tse o fetisang ka bongata le ka matla, le metse e meholo e nang le marako a malelele ho isa lehodimong. 2Ke setjhaba se seholo, se boemo bo bolelele, ke ditloholo tsa Baanake bao o ba tsebang, bao o utlwileng ha ho thwe: Ho ka ema mang pela bana ba Anake? 3Tseba kajeno hobane Jehova, Modimo wa hao, o ya o etella pele, a le jwaloka mollo o timeletsang; o tla ba fedisa, a ba kokobetse pela hao; mme o tla ba falatsa, o ba fedise kapele, jwalokaha Jehova a o boleletse.

4Etlere ha Jehova, Modimo wa hao, a ba lelekile pela hao, o se ke wa bua pelong ya hao, wa re: Ke ka baka la ho loka ha ka Jehova a nkentseng naheng ena hore ke e rue; athe ke ka baka la bokgopo ba ditjhaba tseo Jehova a tlang ho di falatsa pela hao. 5Hase ka baka la ho loka ha hao, leha e le ka baka la bokgabane ba pelo ya hao, o yang ho kena lefatsheng la bona ho le rua; empa ke ka baka la bokgopo ba ditjhaba tseo Jehova, Modimo wa hao, a tlang ho di falatsa pela hao, a tle a tiise lentswe leo Jehova a le boleletseng bontatao, Abrahama, Isaaka le Jakobo, ka kano. 6Tseba hobane hase ka baka la ho loka ha hao, Jehova, Modimo wa hao, a o neang lefatshe leo ho le rua; hobane o setjhaba se molala o thata.

7Hopola, o se lebale, kamoo o halefisitseng Jehova, Modimo wa hao kateng, feelleng lena; ho qala ka letsatsi leo o tswileng lefatsheng la Egepeta ka lona ho tlisa ho leo le fihlileng ka lona bakeng sena, le nnile la ikgantshetsa Jehova.

8Esita le Horebe, le phepheditse Jehova; Jehova a le halefela, a ba a hopola ho le timetsa. 9Eitse ha ke nyolohela thabeng ho ya nka matlapa, matlapa a selekane seo Jehova a se entseng le lona, ka hlola thabeng matsatsi a mashome a mane, le masiu a mashome a mane, ke sa je bohobe, ke sa nwe metsi. 10Jehova a nnea matlapa a mabedi, a ngodilweng ka monwana wa Modimo, ao ho neng ho ngodilwe ho wona dipolelo tsohle tseo Jehova a le boleletseng tsona a le thabeng, kahara mollo, letsatsing la phutheho. 11Eitse hobane matsatsi a mashome a mane a fete, Jehova a nnea matlapa a mabedi, e leng matlapa a selekane; 12mme Jehova a re ho nna: Ema, o phakise ho theoha; hobane setjhaba sa hao, seo o se ntshitseng Egepeta, se itshentse; ba phakisitse ho fapoha tsela eo ke neng ke ba laetse ho tsamaya ka yona; ba iketseditse setshwantsho se tsholotsweng. 13Hape, Jehova a mpolella a re: Ke tadimile setjhaba sena, mme bona, ke setjhaba se molala o thata. 14Ntesele, mme ke tla ba fedisa, ke hlakole lebitso la bona tlasa lehodimo, mme wena ke tla o etsa setjhaba se fetisang sena ka matla le ka bongata. 15Yaba ke a tloha, ka theoha thabeng; thaba e ne e tuka mollo; ke ne ke tshwere matlapa a mabedi a selekane matsohong a ka. 16Ka tadima, ka bona hobane le ne le sitetswe Jehova, Modimo wa lona, le iketseditse namane e tsholotsweng; le ne le fapohile kapele tsela eo Jehova a neng a le laetse yona. 17Ka tshwara matlapa a mabedi, ka a lahlela fatshe ka matsoho a ka, ka a bolaya pela mahlo a lona. 18Ka itihela fatshe pela Jehova jwaloka pele, ka matsatsi a mashome a mane, le masiu a mashome a mane, ke sa je bohobe, ke sa nwe metsi, ka baka la dibe tsohle tsa lona, tseo le di entseng ka ho etsa bobe pela Jehova, ho mo phephetsa. 19Hobane ke ne ke tshohile bohale le kgalefo tseo Jehova a neng a le halefetse ka tsona ho le timetsa. Jehova a boela a nkutlwa le mohlang oo. 20Hape, Jehova o ne a halefetse Aarone haholo, a rata ho mo timetsa; empa ka rapella le Aarone nakong eo. 21Yaba ke nka sebe sa lona, namane eo le e entseng; ka e besa, ka e tula, ka e sila, ka e etsa phofo, mme ka akgela phofo ya yona molapong o theohang thabeng.

22Hape, Tabeera, le Massa, le Kibrothe-Hattaava, le phepheditse Jehova.

23Le mohla re leng Kadeshe-Barnea, ha Jehova a le roma, a re: Nyolohang, le rue lefatshe leo ke le neileng lona, la ikgantshetsa taelo ya Jehova, Modimo wa lona; ha le a ka la mo tshepa, mme ha le a ka la etsa ka lentswe la hae.

24Le ikgantsheditse Jehova haesale le mohla ke qadileng ho le tseba.

25Efela ka itihela fatshe pela Jehova ka matsatsi a mashome a mane le masiu a mashome a mane, jwalokaha ke ne ke itihetse pele, kahobane Jehova a ne a itse, o rata ho le fedisa. 26Ka rapela Jehova, ka re: Oho, Morena Jehova, o se ke wa fedisa setjhaba sa hao sa lefa la hao, seo o se lopolotseng ka boholo ba hao, seo o se ntshitseng Egepeta ka letsoho le matla. 27Hopola bahlanka ba hao, Abrahama, Isaaka, le Jakobo; o se ke wa tadima bothata ba setjhaba sena, leha e le bokgopo ba sona, leha e le sebe sa sona, 28esere mohlomong ba ahileng naheng eo o re ntshitseng ho yona, ba re: Erekaha Jehova a sitilwe ho ba kenya lefatsheng leo a ba baletseng lona, hape a ba hloile, ke ka hona a ba ntsheditseng ho ba bolaela lefeelleng. 29Leha ho le jwalo, ke setjhaba sa hao sa lefa la hao, seo o se ntshitseng Egepeta ka matla a hao a maholo, le ka letsoho la hao le otlolohileng.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index