Search form

MOEKLESIA 8

Ya lokileng o hlahelwa ke kotsi le yena. — Kahlolo e ahlolang ba babe ha e ke e phethahala kamehla. — Leha motho a sa utlwisise mosebetsi wa Modimo, e ka kgona a o tshabe, mme a ile bobe.

1Ya lekanang le ya bohlale ke mang? Mme ke mang ya ka tsebang ho hlalosetsa taba na? Bohlale ba motho bo edisa sefahlelo sa hae, mme bo fetola bothata ba sefahlelo sa hae.

2Ke re: Boloka taelo ya morena ka baka la kano eo o e entseng pela Modimo. 3O se ke wa phaka wa tloha pela hae, o se ke wa tiisetsa nthong e mpe, hobane o etsa hohle ho mo kgahlisang; 4etswe lentswe la morena le le matla, mme ke mang ya tla re ho yena: O etsang? 5Ya bolokang taelo a ke ke a bona tsietsi; mme pelo ya ya bohlale e tla tseba nako le kahlolo. 6Hobane nako le kahlolo ya tsohle e tla ba teng. Empa bosoto ba motho bo boholo tabeng ya hobane 7ha a tsebe le hanyenyane se tla etsahala; hobane ya tla mmolella se tla hlaha, ke ha e le mang na? 8Motho ha a na matla a ho busa moya hore a o thibele; ho jwalo, ha a na ho laola letsatsi la lefu, ha ho kamoo ho ka phonyohuwang ntweng eo kateng, le bolotsana ha bo na ho lwela ba bo etsang.

9Ke di bone kaofela tseo, ha ke ne ke ntse ke nahana mesebetsi yohle e etswang tlasa letsatsi, le kamoo batho ba renang hodima ba bang kateng ho ba etsa hampe. 10Ka bona ha ba bolotsana ba patwa, athe ba etsang hantle ba ne ba tloha, ba ya hole le nqalo e halalelang, ba ba ba lebalwa ke ba hae. Hoo le hona ke lefeela. 11Erekaha kahlolo e ahlolang mesebetsi yohle e kgopo e sa phakise ho etsahala, kahoo pelo tsa bana ba batho di ntse di tlala takatso ya ho etsa hampe. 12Empa leha moetsadibe a etsa hampe ha lekgolo, mme a atelwa ke matsatsi, leha ho le jwalo, ke tseba hoba ba tshabang Modimo ho tla dula hantle le bona, e leng ba tshabang ho etsa hampe pela sefahleho sa wona. 13Molotsana yena ho ke ke ha dula hantle le yena, mme a ke ke a atelwa ke matsatsi. O tla feta jwaloka leswiti, hobane ha a ka a tshaba ho etsa hampe pela sefahleho sa Modimo.

14Lefeela le leng ke lena le leng teng lefatsheng, ke hobane ho na le ba lokileng ba hlahelwang ke moputso o loketseng mesebetsi ya ba bolotsana, mme ba bolotsana ba teng ba hlahelwang ke moputso o loketseng mesebetsi ya ba lokileng. Ke boletse hore le hoo ke lefeela. 15Ka ba ka rorisa thabo, ka ho re, ha ho se ka bang molemo ho motho tlasa letsatsi, haese ho ja le ho nwa le ho itumela; ke seo a se sietsweng bakeng sa mokgathala wa hae wa matsatsi wohle a ho phela ha hae, ao Modimo o mo neileng wona tlasa letsatsi.

16Eitse ha ke sekeha pelo ya ka hore ke tsebe bohlale, mme ke nahana mesebetsi e etswang lefatsheng, ke sa nee mahlo a ka boroko motshehare, leha e le bosiu, 17ka bona hobane, bakeng sa mesebetsi yohle ya Modimo motho a ka sitwa ho utlwisisa mosebetsi le o mong o etswang tlasa letsatsi; leha motho a ka ikgathatsa jwang le jwang, hore a batle hoo, a ke ke a ho fumana; esita leha ya bohlale a ka re, o a tseba, a ke ke a utlwisisa.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index