Search form

BAEFESE 5

1Le fele le be baetsisi ba Modimo, kaha le le bana ba ratwang; 2mme le tsamaye leratong, jwalokaha Kreste le yena a re ratile, mme a ineetse bakeng sa rona, hore e be nyehelo le sehlabelo se monko o monate ho Modimo.

3Empa haele bofebe, le ditshila tsohle, le takatso ya moruo, ho se ke ha bolelwa le mabitso a tsona hara lona, kamoo ho tshwanelang bahalaledi kateng; 4leha e le taba e dihlong, leha e le ya bowatla, leha e le ya meswaso e mebe, e leng taba tse sa tshwanelang; ho mpe ho utlwahale diteboho. 5Hobane le a tseba hore mofebi, leha a le mong, le ya ditshila, le ya ratang leruo, e leng motho ya sebeletsang medimo ya bohata, ha ba na kabelo mmusong wa Kreste le Modimo. 6Motho a se ke a le thetsa ka dipolelo tsa lefeela; hobane ke ka baka la ntho tseo bohale ba Modimo bo tlelang bana ba ho se dumele. 7Ka baka leo, le se ke la ba le taba le bona.

8Hobane kgale le ne le le lefifi, empa jwale le lesedi Moreneng; tsamayang ke hona jwaloka bana ba lesedi. 9Hobane tholwana ya lesedi ke molemo wohle, le ho loka, le nnete. 10Le qamake se ka kgahlisang Morena; 11mme le se ke la ba le kabelo mesebetsing e nyopang ya lefifi, le mpe le e nyatse: 12hobane le ho bolelwa tseo ba di etsang sephiring ke taba e hlabisang dihlong. 13Empa ntho tseo tsohle ha di kgalemelwa, di bonahatswa ke lesedi; hobane hohle ho bonahatswang, ho lesedi. 14Ke ka baka leo ho itsweng: Tsoha, wena morobadi, tloha hara bafu, mme Kreste o tla o bonesetsa.

15Ha ho le jwalo, iponeleng hore le tsamaye ka kelello, e seng jwaloka mawatla, e mpe e be jwaloka ba bohlale. 16Lopollang dinako, hobane mehla e se e le mebe. 17Ka baka leo, le se ke la etsa ka bowatla, le mpe le tsebisise hantle ho ratwang ke Morena. 18Mme le se ke la tahwa ke veine, hobane bohlola bo teng ho yona; le mpe le tlale Moya. 19Buisanang ka dipesalema, le ka difela, le ka dipina tsa moya, mme le binele Morena, le mo dudueletse ka dipelong tsa lona. 20Le lebohe kamehla Modimo, Ntata rona, ka baka la ntho tsohle, ka lebitso la Jesu Kreste, Morena wa rona.

Ditshwanelo tsa ntlo.

21Ikokobetseng e mong ho e mong, le ntse le tshaba Kreste. 22Lona basadi, le ikokobetse katlasa banna ba lona, jwalokaha le ikokobetsa ho Morena; 23hobane monna ke hlooho ya mosadi, jwalokaha Kreste le yena e le hlooho ya kereke, mme ke yena Mmoloki wa mmele wa hae. 24Jwalokaha kereke e ikokobetsa katlasa Kreste, basadi le bona ba ikokobetse ho banna ba bona jwalo nthong tsohle.

25Lona banna, ratang basadi ba lona, jwalokaha Kreste le yena a ratile kereke, mme a iteletse lefu ka baka la yona; 26hore a tle a e halaletse, ha a se a e ntlafaditse ka hlatsuo ya metsi ka lentswe la hae, 27a tle a ikemisetse yona pela hae, e le kereke e kganyang, e se nang letheba le letsika, leha e le letho le jwaloka tseo; e mpe e be e halalelang, e se nang sekodi. 28Ke ka mokgwa o jwalo le bona banna ba tshwanetseng ho rata basadi ba bona jwaloka mmele wa bona. Ya ratang mosadi wa hae, eba o a ithata. 29Hobane ha ho eso ho be motho ya kileng a hloya nama ya hae le ka mohla o le mong; empa o ye a e fepe, a e baballe, jwalokaha Kreste le yena a etsa kereke. 30Hobane re ditho tsa mmele wa hae. 31Ke ka baka leo ho ngodilweng, ho thwe: Monna o tla tlohela ntatae le mmae, a kgomarele mosadi wa hae, mme ba babedi e tla ba nama e le nngwe feela. 32Sephiri sena se seholo; empa ke bua ke ntse ke lekanya Kreste le kereke. 33Leha ho le jwalo, e mong le e mong ho lona a fele a rate mosadi wa hae jwalokaha a ithata, mme mosadi yena a hlomphe monna wa hae.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index