Search form

EKSODA 36

Tabernakele e a hahuwa.

1Jwale, Betsaleele le Oholiabe, le banna bohle ba masene bao Jehova a ba neileng bohlale le kutlwisiso ya tsebo le ya ketso, ba tla ho etsa mosebetsi wohle wa tshebeletso ya sehalalelo, kahohle kamoo Jehova a laetseng kateng.

2Yaba Moshe o bitsa Betsaleele le Oholiabe, le banna bohle ba masene bao Jehova a kentseng bohlale pelong tsa bona, e leng bohle ba kgannilweng ke pelo tsa bona ho tla etsa mosebetsi. 3Ba nka ho Moshe dikabelo tsohle tse abetsweng Jehova, tse tlisitsweng ke bana ba Iseraele ho etsa mesebetsi ya tshebeletso ya sehalalelo. Le jwale, ka ho rata, ba ne ba ntse ba tlisa dikabelo ka hosasa ho hong le ho hong. 4Yaba banna bohle ba masene, ba sebetsang mesebetsi yohle ya sehalalelo, ba tlohela e mong le e mong mosebetsi oo a o sebetsang, ba tla, ba re ho Moshe: 5Setjhaba se se se tlisitse ho fetisa ho lekaneng mesebetsi eo Jehova a e laetseng hore e etswe. 6Yaba Moshe o laela hore ho tumiswe diahelong taba e reng: Banna le basadi ba se ke ba hlola ba tlisa dikabelo tse abetsweng mosebetsi wa sehalalelo. Setjhaba sa thibelwa kahoo ho nna se tlisa; 7hobane dintho tsa ho sebetsa mosebetsi wohle di ne di se di lekane; le ho sala di ne di tla sala.

8Banna bohle ba masene, ba sebetsang mesebetsi, ba sebetsa tabernakele ka masela a leshome a lene e ntle e lohilweng, a purepera le sekarelata, le krimsone; a etswa a homilweng ka dikerubime, ka mokgwa wa mosebetsi o etswang ka masene; 9bolelele ba lesela ya eba tswe tse mashome a mabedi a metso e robileng meno e le mmedi; bophara ba lesela ya eba tse nne; masela wohle a etswa ka tekanyo e le nngwe. 10Ha rokellwa masela a mahlano hammoho, mme ha rokellwa masela a mang a mahlano. 11Ha etswa mahokelo a purepera mophethong wa lesela le leng, ntlheng ya masela a rokeletsweng; ha etswa jwalo hape mophethong wa lesela, le ntlheng ya masela a mang a rokeletsweng. 12Ha etswa mahokelo a mashome a mahlano leseleng le leng, hape ha etswa mahokelo a mashome a mahlano ntlheng ya lesela le qetellang a mang a rokeletsweng, hore mahokelo a bape. 13Ha etswa dikgoketsane tse mashome a mahlano tsa kgauta, ha kopanngwa masela hammoho ka dikgoketsane; ka mokgwa o jwalo tabernakele ya eba ntho e phethehileng.

14Hape, ha etswa masela a boya ba podi a ho etsa tente ya tabernakele; ha etswa masela e leshome le motso o mong. 15Bolelele ba lesela ya eba ditswe tse mashome a mararo; bophara ba lesela ya eba ditswe tse nne; masela ao a leshome le motso o mong a etswa ka tekanyo e le nngwe. 16Ha rokellwa masela a mahlano hammoho, ha boela ha rokellwa masela a tsheletseng kahosele. 17Ha etswa mahokelo a mashome a mahlano mophethong wa lesela le ntlheng ya masela a mang a rokeletsweng hammoho; hape, ha etswa mahokelo a mashome a mahlano mophethong wa lesela le qetellang masela a mang a rokeletsweng hammoho. 18Hape, ha etswa dikgoketsane tsa koporo ho kopanya tente, hore e etse ntho e le nngwe.

19Tente ya etsetswa sekgurumetso sa matlalo a dipheleu a tlotsitsweng ka bofubedu; le sona sa apeswa ka sekgurumetso sa matlalo a diqibi.

20Ha etswa dipolanka tsa tabernakele ka fate tsa leoka, hore e tsebe ho ema; 21bolelele ba polanka ya eba ditswe tse leshome, bophara ba polanka ya eba setswe se nang le halofo. 22Polanka e nngwe le e nngwe ya etsetswa dimapo tse pedi tse bapileng. Dipolanka tsohle tsa tabernakele tsa etswa jwalo le tsona. 23Ha etswa dipolanka tsa tabernakele tse mashome a mabedi ka nqa borwa; 24ha etswa didulwana tsa silefera tse mashome a mane, tsa bewa tlasa dipolanka tse mashome a mabedi; polanka e le nngwe ya eba le didulwana tse pedi le dimapo tse pedi tsa tsona, mme polanka e nngwe ya eba le didulwana tse pedi le dimapo tse pedi tsa tsona. 25Lehlakore la bobedi la tabernakele, le ka nqa leboya, la etsetswa dipolanka tse mashome a mabedi, 26le didulwana tsa tsona tsa silefera tse mashome a mane; polanka e nngwe ya eba le didulwana tse pedi, e nngwe hape polanka ya eba le didulwana tse pedi. 27Haele motseo wa tabernakele, ka nqa bophirimela, wa etsetswa dipolanka tse tsheletseng. 28Le dikgutlo tsa tabernakele tse motsheo, tsa etsetswa dipolanka tse pedi. 29Tsa kopanngwa katlase, hape tsa kopanngwa le kahodimo ka mofapo; dipolanka tse pedi tsa dikgutlo tse pedi tsa etswa jwalo. 30Ha ho le jwalo, ha etswa dipolanka tse robileng meno e le mmedi le didulwana tsa tsona tsa silefera; didulwana tsa eba leshome le metso e tsheletseng, tsa eba ka bobedi tlasa polanka e le nngwe, tsa eba ka bobedi tlasa polanka e nngwe hape. 31Hape, ha etswa maballo a sefate sa leoka, ha etswa a le mahlano dipolankeng tsa lehlakore le leng la tabernakele; 32hape, maballo a eba mahlano lehlakoreng la bobedi la tabernakele; le motsheo ka nqa bophirimela, maballo a eba mahlano dipolankeng tsa tabernakele. 33Ha etswa le leballo le mahareng, ho tiisa dipolanka mahareng a tsona le ho di kopanya. 34Dipolanka tsa manehwa ka kgauta, le mehwele ya tsona ya etswa ka kgauta, mme tsa kenngwa maballo a tsona; le wona maballo a manehwa ka kgauta.

35Yaba ho etswa lesira la purepera le sekarelata, le krimsone, le lene e ntle e lohilweng, ka mokgwa wa mosebetsi o homilweng ka dikerubime; 36la etsetswa tshiya tse nne tsa sefate sa leoka, mme tsa manehwa ka kgauta; tsa eba le dikgoketsane tsa kgauta, mme tsa tshollelwa didulwana tse ne tsa silefera.

37Monyako wa tente wa etsetswa lesela le lepeletseng, la purepera, le sekarelata, le krimsone le lene e ntle e lohilweng, 38e le mosebetsi o homilweng; ha etswa le ditshiya tsa lona tse hlano le dikgoketsane tsa tsona, mme ha manehwa dihlooho tsa tsona le dithupa tsa tsona ka kgauta, mme didulwana tsa tsona tse hlano tsa etswa ka koporo.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index