Search form

EKSODA 40

1Yaba Jehova o bolella Moshe, a re: 2Ka tsatsi la ho qala la kgwedi ya pele, o tle o hlome tabernakele ya tente ya pokano. 3O tle o kenye ho yona areka ya bopaki, o sireletse areka ka lesira. 4O ntoo tlisa tafole, o e lokisetse tsa yona; o ntoo tlisa kandelare, o lokise dilampi tsa yona. 5Aletare ya kgauta ya dibano, o tla e bea pela areka ya bopaki, o bee lesela le homilweng monyakong wa tabernakele. 6Aletare ya ditjheso yona o tla e bea pela monyako wa tabernakele ya tente ya pokano. 7Hape, o bee morifi pela tente ya pokano le aletare, mme o o tshele metsi. 8Lebala lona o tla le bea ka mathoko, o bee lesela le homilweng monyako wa lebala. 9O tla nka ole ya setlolo, mme ka yona o tlotse tabernakele le tsohle tse ho yona; ka ho etsa jwalo, o tla e kgetha le yona mesebetsi yohle ya yona, mme e tla kgetheha. 10Hape, o tlotse aletare ya ditjheso le mesebetsi yohle ya yona, mme o kgethe aletare; aletare e tla ba ntho e halalelang haholo. 11O tlotse le morifi le sedulwana sa oona, o o kgethe. 12O ntoo atametsa Aarone le bara ba hae monyako wa tente ya pokano, o ba hlatswe ka metsi. 13O be o apese Aarone ka diaparo tse kgethehileng, o mo tlotse, o mo kgethe, hore a tle a etse mosebetsi wa boprista pela ka. 14O atametse le bara ba hae, o ba apese dikojwana, 15o ba tlotse, jwalokaha o tlotsitse ntata bona, hore ba etse mosebetsi wa boprista pela ka; mme tlolo ya bona ho bona e tla ba boprista ba kamehla, melokong ya bona.

16Moshe a etsa jwalo; a etsa tsohle kamoo Jehova a mo laetseng kateng. 17Ka kgwedi ya ho qala ya selemo sa bobedi, ka tsatsi la pele la kgwedi, tabernakele ya hlongwa. 18Moshe a hloma tabernakele, a bea didulwana, a bea le dipolanka, a bea le maballo, a emisa ditshiya. 19Hape, a ala tente hodima tabernakele, mme hodima yona a bea sekgurumetso sa tente, jwalokaha Jehova a ne a laetse Moshe. 20Jwale, a nka bopaki, a bo kenya arekeng; a kenya mejaro arekeng; a ntoo bea sekwahelo hodima areka. 21Yaba o tlisa areka tabernakeleng, a fanyeha lesira le homilweng le kgaolang, a sireletsa jwalo areka ya bopaki, jwalokaha Jehova a ne a laetse Moshe. 22Yaba o isa tafole tenteng ya pokano, lehlakoreng la tabernakele le leng ka nqa leboya, kantle ho lesira, 23a lokisa mahobe pela Jehova, jwalokaha Jehova a ne a laetse Moshe. 24Kandelare yona a e bea tenteng ya pokano, mabapa le tafole, lehlakoreng la tabernakele le leng ka nqa borwa; 25a lokisa dilampi pela Jehova, jwalokaha Jehova a ne a laetse Moshe. 26A ntoo isa aletare ya kgauta tenteng ya pokano, pela lesira; 27teng a tjhesetsa dibano tse monko o monate, jwalokaha Jehova a ne a laetse Moshe. 28Lesela le homilweng lona a le fanyeha monyakong wa tabernakele. 29Aletare ya ditjheso yona a e bea monyakong wa tabernakele ya tente ya pokano, a hlahisa teng mahlabelo a ditjheso le nyehelo, jwalokaha Jehova a ne a laetse Moshe. 30Yaba o bea morifi pakeng tsa tente ya pokano le aletare, a o tshela metsi hore ho tle ho itlhatsuwe teng. 31Moshe, le Aarone, le bara ba hae ba itlhatswa matsoho le maoto; 32enere ha ba kena tenteng ya pokano, leha ba atamela pela aletare, ba ne ba itlhatswa, jwalokaha Jehova a laetse Moshe. 33Hape, a hloma lebala le potang tabernakele le aletare; a fanyeha lesela le homilweng monyako wa lebala; kahoo, Moshe a phetha mosebetsi.

34Yaba leru le kgurumetsa tente ya pokano, mme khanya ya Jehova ya tlala tabernakele. 35Esita le Moshe a sitwa ho kena tenteng ya pokano, hobane leru le ne le dutse hodima yona, le kganya ya Jehova e ne e tletse tabernakeleng.

36Enere ha leru le phahama hodima tabernakele, bana ba Iseraele ba ne ba tloha; ha eba jwalo ho tsamayeng hohle ha bona. 37Empa ha leru le ne le sa phahame, ba ne ba sa tlohe, ho fihlela letsatsi leo le phahamang ka lona. 38Hobane leru la Jehova le ne le le tabernakeleng motshehare, bosiu e be mollo, pontsheng ya ba ntlo yohle ya Iseraele, ho tsamayeng hohle ha bona.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index