Search form

ESEKIELE 26

Ho porofetwa tse tla hlahela Tire le Sidone.

1Eitse ka selemo sa leshome le motso o mong, ka la pele ho kgwedi, lentswe la Jehova la ntlela, la re: 2Mora motho, erekaha Batire ba tlakile Jerusalema ka ho re: Haiaha! kgoro ya ditjhaba e heleditswe, dintho di ya tla ho nna, ke tla ena, hobane motse o sentswe? 3Ka baka leo, Morena Jehova o re: Bona, ke tla o futuhela, Tire; ke tla o nyollela ditjhaba tse ngata, ka mokgwa oo lewatle le nyollang maqhubu a lona. 4Di tla heletsa marako a Tire, di dihe ditora tsa hae; ke tla fiela lerole la hae, ke mo etse lefika le hlobotseng. 5O tla fetoha nqalo eo ho alwang matlowa ho yona hara lewatle, hobane ho boletse nna: ho rialo Morena Jehova; o tla neelwa ho tlatlapuwa ke ditjhaba. 6Baradi ba hae, ba leng naheng ya hae, ba tla bolawa ka lerumo, ba tle ba tsebe hoba ke nna Jehova.

7Hobane Morena Jehova o re: Bonang, ke tla lata Nebukadresare, morena wa Babilona, morena wa marena, leboya, ke mo tlise Tire, a tle ka dipere, le makoloi, le bapalami, le setjhaba, le sera se seholo. 8O tla bolaya ka lerumo baradi ba hao ba naheng ya hao, a be a o teele hare ka lerako le potang, mme a o tjhekele ditutudu, a o emisetse thebe. 9O tla neela dipheleu tsa hae marakong a hao, a heletse ditora tsa hao ka dibetsa tsa hae. 10Lerole la bapalami ba hae le tla o apesa ka baka la bongata ba bona; modumo wa bapalami ba hae, le wa mabidi a hae, le wa makoloi a hae, o tla reketlisa marako a hao, mohla a kenang ka dikgoro tsa hao, jwalokaha ho kenwa motse o entsweng sekgeo. 11Ka ditlhako tsa dipere tsa hae, o tla hata diterata tsa hao tsohle; setjhaba sa hao o tla se bolaya ka lerumo, ditshiya tse thata tsa hao di helehele fatshe. 12Ba tla hapa maruo a hao, ba tlatlape mesebetsi ya hao ya kgwebo; ba tla qhaqholla marako a hao, ba ripitle matlo a hao a matle, ba lahlele majwe a hao le difate tsa hao le lerole la hao metsing. 13Ke tla kgaoletsa modumo wa dipina tsa hao, mme ha ho sa tla hlola ho utluwa modumo wa diharepa tsa hao. 14Ke tla o etsa lefika le hlobotseng; o tla fetoha nqalo eo ho alwang matlowa ho yona: ha o sa tla tsoswa; hobane ho buile nna Jehova: ho rialo Morena Jehova.

15Morena Jehova o re ho Tire: Ha ke re, dihlekehleke di tla reketliswa ke modumo wa ho wa ha hao, le ke ho bobola ha ba hlabilweng, le ke polao e tla etswa ha hao? 16Marena wohle a lewatle a tla theoha diteroneng tsa wona; a tla hlobola dikobo tsa wona, a lahle diaparo tsa wona tse homilweng; a tla apara tshoho, a dule fatshe a ntse a sisimoha, a maketse ke wena. 17Ba tla o binela kodiyamalla, ba re ho wena: O timetse jwang, wena ya neng a hahilwe hara mawatle, wena motse o tumileng, o neng o le matla lewatleng, wena le bohle ba ahileng ha hao, ba neng ba tshajwa ke bohle ba ahileng pela lewatle?18Jwale, dihlekehleke di tla sisimoha tsatsing la ho wa ha hao; dihlekehleke tse lewatleng di tla tshoswa ke bofelo ba hao.

19Hobane Morena Jehova o re: Mohla ke o etsang lesupi le tshwanang le metse e se nang ba ahileng ho yona, mohla ke o nyollelang bodiba, mme metsi a maholo a o aparela, 20ke tla o lahlela hammoho le ba theohelang sehokong, ho ditjhaba tsa kgale, ke o ahise lefatsheng le tebileng, masuping a sa feleng, hammoho le ba theohetseng sehokong, hore o tle o se ke wa hlola o ahuwa: athe ke tla bea kganya lefatsheng la ba utlwang. 21Ke tla o etsa lefeela, mme ha o sa tla ba teng; o tla batlwa, mme ha o sa tla fumanwa le ka mohla o le mong: ho rialo Morena Jehova.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index