Search form

ESEKIELE 27

1Lentswe la Jehova la boela la ntlela, la re: 2Oho mora motho, o phokolele Tire kodiyamalla, o re ho Tire: 3Wena ya dutseng dikgorong tsa lewatle, ya hwebang le ditjhaba tsa dihlekehleke tse ngata, Morena Jehova o re: Oho Tire, o ne o re: Ke phethehile botleng. 4Meedi ya hao e bodibeng ba mawatle. Dihahi tsa hao di o entse botle bo phethehileng. 5Di hahile mahlakore a hao ka dikiprese tsa Senire, di nkile dikedare tsa Lebanone ho etsa sefate sa hao sa dikepe;6di entse masokwana a hao ka dieike tsa Bashane; ditulo tsa hao di di entse ka dinaka tsa ditlou tse hometsweng difateng tsa bokise tsa dihlekehleke tsa Kittime. 7Ka lene e ntle e homilweng ya Egepeta o ne o entse masela a hao le folaga ya hao, purepera le sekarelata sa dihlekehleke tsa Elisha o di nketse masela a hao a dilepello. 8Ba ahileng Sidone le Arfade e ne e le bona basoki ba hao; ha eno, Tire, ho ne ho ena le ba bohlale ba hao; e ne e le bona batsamaisi ba hao. 9Ha eno, o ne o na le baholo ba Gebale le ba bohlale ba thibang mapetso a hao; ha eno, ho no ho ena le dikepe tsohle tsa lewatle, le batho ba tsona, ho tla sebetsa kgwebo ya hao. 10Makgotleng a hao, ho no ho ena le Bapersia, le Balude, le Baputhe, bao e neng e le bahlabani ba hao; ha eno ba ne ba fanyeha thebe le heleme; ke bona bao e neng e le bokgabane ba hao. 11Bana ba Arfade hammoho le makgotla a hao ba ne ba eme marakong a hao kahohle; diqhenqha di ne di le ditoreng tsa hao, di fanyehile dithebe tsa tsona marakong a hao kahohle; ke tsona tse neng di phethisisa botle ba hao.

12Tarshishe o ne a hweba le wena ka mesebetsi e mefutafuta; ba teng ba ne ba anaya tsa hao ka silefera, le tshepe, le tine, le loto. 13Jafane, Tubale le Mesheke le bona ba ne ba hweba le wena, ba tlisitse meya ya batho le mesebetsi ya koporo ho rekisa ka yona. 14Ba tswang tlung ya Togarma ba ne ba ananya tsa hao ka dipere, le bapalami, le diesele. 15Bana ba Dedane ba ne ba hweba le wena; dihlekehleke tse ngata di ne di le matleng a hao ho hweba le wena, di o lefa ka meno a ditlou le motsweri. 16Baarame ba ne ba hweba le wena ho reka mesebetsi ya hao e mengata, ba ananya tsa hao ka karbunkele, le sekarelata, le masela a homilweng, le lene, le dikorale, le dirubise. 17Le Bajuda le ba naha ya Iseraele ba ne ba hweba le wena le bona, ba ananya tsa hao ka koro ya Minnithe, le maqebekwane, le dinotshi, le ole, le balsame. 18Ba Damaseka ba ne ba hweba le wena, ba reka mesebetsi ya mefutafuta ka veine ya Helbone, le boya bo benyang. 19Bafedane le Bajafane ba ne ba ananya tsa hao ka masela a lohilweng, tshepe e kgabisitsweng, kassia, le lehlaka le nkgang hamonate di le teng ho tseo o hwebang ka tsona. 20Dedane o ne a ananya tsa hao ka mephoso e etsang ditleleki tsa ho palama. 21Baarabia, le marena wohle a Kedare le bona ba ne ba le matleng a hao ho hweba le wena, ba rekisa ka dikonyana, le dipheleu, le diphooko. 22Bahwebi ba Sheba le ba Raema le bona ba ne ba hweba le wena, ba ananya tsa hao ka dinoko tse kgethehileng, le mahakwe a mefutafuta, le kgauta. 23Karane, le Kanne le Edene, le bahwebi ba Sheba, le Baassiria, le Bakilmade, ba ne ba hweba le wena. 24Ba ne ba hweba le wena lepatlelong la hao la thekiso ka dikgabiso, le dimantlele tsa purepera, le masela a homilweng, le matlole a tletseng masela a bekenyang, a tlamilweng, a tiisitsweng ka mehala. 25Dikepe tsa Tarshishe di ne di sebedisa kgwebo ya hao. Ke kahoo o enneng, o bileng o itlotlisitse hara bodiba ba mawatle.

26Empa basoki ba hao ba o isitse metsing a maholo; moya wa botjhabela o o robile hara bodiba ba mawatle. 27Mesebetsi ya hao le dikananyo tsa hao, batho ba dikepe tsa hao le batsamaisi ba tsona, ba thibang mapetso a dikepe tsa hao, ba o sebedisang kgwebo ya hao, le bahlabani bohle ba hao ba leng ha eno, hammoho le matshwele wohle a hao a leng ha eno, ba tla wela bodibeng ba mawatle tsatsing la ho wa ha hao. 28Ka modumo wa mehoweletso ya batsamaisi ba dikepe tsa hao, mabopo a tla reketla, 29bohle ba sokang ka masokwana, le batho ba dikepe, le batsamaisi ba tsona, ba tla theoha dikepeng tsa bona, ba eme fatshe. 30Ba tla lla ka wena, ba bokolle habohloko, ba ithuntshe dihlooho ka lerole, ba bidikane moloreng. 31Ba tla ipeola dihlooho ka wena, ba ikgahlole ka masela a mahwashe; ba tla o llela ka pelo tse babang, ba etse bofifi bo bohloko; 32dillong tsa bona, ba tla o binela kodiyamalla, ba tla bina kodiyamalla, ba re: Ke ofe motse o neng o le jwaloka Tire, jwaloka motse wona o seng o timetse hara lewatle? 33O ne o kgorisa ditjhaba tse ngata ka tsa kgwebo ya hao tse tswang mawatleng; o ne o entsha marena a lefatshe, ka bongata ba mesebetsi ya hao le ba kgwebo ya hao. 34Jwale, haele mona o bolailwe, o bile o timeletse mawatleng, o tebile madibeng a metsi, kgwebo ya hao le matshwele wohle a neng a le ha hao, di timetse le wena. 35Bohle ba ahileng dihlekehlekeng ba tshohile ka wena; marena a bona a qhaqhasela ke ho tshoha, difahleho tsa wona di a tlakasela. 36Haele bahwebi ba ditjhaba tse ding, ba tea melodi ka wena; o entswe lefeela, mme ha o sa tla ba teng le ka mohla o le mong.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index