Search form

ESEKIELE 36

Iseraele o tla busetswa tulong tsa hae.

1Oho mora motho, o porofetele dithaba tsa Iseraele, o re: Thaba tsa Iseraele, mamelang lentswe la Jehova! 2Morena Jehova o re: Erekaha sera se le boletse ka ho re: Haiaha! diphahama tseno tse sa feleng ke leruo la rona. 3Ha ho le jwalo, o porofete, o re: Morena Jehova o re: Erekaha le entswe lefeella, mme la teelwa hare hore le timele, le tle le ruwe ke masala a ditjhaba, mme le fetohe thusolelo ya melomo le ya maleme, le sekgobo ho ditjhaba; 4ha ho le jwalo, thaba tsa Iseraele, mamelang lentswe la Morena Jehova! Morena Jehova o re ho dithaba le dithabana, ho melapo le dikgutlo, ho dithako tse feela le ho metse e tlohetsweng, e neetsweng kgapo le sesomo sa masala a ditjhaba tse e teetseng hare ka nqa tsohle; 5Morena Jehova o re: Mollong wa poulelo ya ka, kannete ke nyatsa ditjhaba tse ding le Edomo kaofela, tse inkelang lefatshe la ka ho le rua; di thabetse hoo ka pelo yohle, di le kgesa ka moya wohle, hore di le neele kgapo! 6Ha ho le jwalo, porofetela naha ya Iseraele, o re ho dithaba le dithabana, melapo le dikgutlo: Morena Jehova o re: Ke nna enwa; poulelong ya ka le kgalefong ya ka ke a bua, hobane le fela le jere sekgobo sa ditjhaba. 7Ha ho le jwalo, Morena Jehova o re: Ke emiseditse letsoho la ka hodimo; kannete ditjhaba tse le teetseng hare di tla jara sekgobo sa tsona!

8Haele lona, dithaba tsa Iseraele, le tla hlomela mahlomela a lona, le beele setjhaba sa ka sa Iseraele ditholwana tsa lona, hobane se se se le lekgatheng la ho fihla. 9Bonang, ke fela ke ya tla ho lona, ke retelehele ho lona; le tla lengwa, le be le jalwe. 10Ke tla atisa banna ho lona, e leng ho re ntlo yohle ya Iseraele: metse e tla boela e ahuwe, le dithako di tsoswe. 11Ho lona, ke tla ngatafatsa batho le diphoofolo; ba tla ata, le ho ngatafala. Ke tla etsa hore le ahuwe jwaloka mehleng ya lona ya kgale, ke le etse hantle ho feta mehleng ya qalo ya lona; le tle le tsebe hobane ke nna Jehova. 12Ke tla tlisa batho ho lona, e leng ho re setjhaba sa ka sa Iseraele. Ba tla o rua, o tla ba lefa la bona, mme ha o sa tla ba tima bana.

13Morena Jehova o re: Erekaha o bolelwa ka ho re: Wena lefatshe, o ja batho, o tima setjhaba sa heno bana! 14Ha ho le jwalo, ha o sa tla ja batho, ha o sa tla tima setjhaba sa heno bana: ho rialo Morena Jehova. 15Ha nka ke ka hlola ke utlwahatsa dinyefolo tsa ditjhaba ha eno, ha o sa tla jara sekgobo sa ditjhaba, ha o sa tla kgopisa setjhaba sa heno: ho bolela Morena Jehova.

16Lentswe la Jehova la boela la ntlela, la re: 17Mora motho, ba ntlo ya Iseraele ha ba ne ba sa ahile naheng ya bona, ba ne ba e silafatsa ka mekgwa le ka diketso tsa bona; kamoo ditshila tsa mosadi di leng kateng, ho se hlwekeng ha hae, mekgwa ya bona e ne e le jwalo pela ka. 18Mme ke ne ke ba tshollele kgalefo ya ka ka baka la madi ao ba neng ba a tsholotse lefatsheng, le ka baka la hobane ba ne ba le silafaditse ka ditshwantsho tsa bona. 19Ka ba ka ba qhalanyetsa ditjhabeng, ba hasanngwa mafatsheng wohle; ka ba ahlola ka mekgwa ya bona le ka diketso tsa bona. 20Eitse hobane ba fihle ditjhabeng tseo ba fihlileng ho tsona, ba senya lebitso la ka le kgethehileng, ha ho no ho ntse ho thwe ka bona: Bana ke setjhaba sa Jehova, ba tswile lefatsheng la hae. 21Ka mpa ka qenehela lebitso la ka le kgethehileng, leo ba ntlo ya Iseraele ba le sentseng ditjhabeng tseo ba neng ba fihle ho tsona.

22Ha ho le jwalo, ere ho ntlo ya Iseraele: Morena Jehova o re: Ha ke etsetse lona, ntlo ya Iseraele: ke etsetsa lebitso la ka le kgethehileng, leo le le sentseng ditjhabeng tseo le fihlileng ho tsona. 23Le hona ke tla halaletsa lebitso la ka le leholo, le sentsweng hara ditjhaba tseo le le sentseng hara tsona, hore ditjhaba di tle di tsebe hoba ke nna Jehova, mohla nna, ke leng Morena Jehova, ke ikgalaletsang ka lona pela mahlo a tsona. 24Ke tla le lata ditjhabeng, ke le phuthe mafatsheng wohle, ke tle ke le busetse naheng ya heno. 25Ke tla le tshela ka metsi a hlwekileng, hore le tle le ntlafale; ke tla le ntlafatsa, hore le hloke ditshila tsohle tsa lona le ditshwantsho tsohle tsa lona. 26Ke tla le nea pelo e ntjha, ke kenye moya o motjha kahare ho lona; ke tla tlosa pelo ya lejwe nameng ya lona, ke le nee pelo ya nama. 27Ke tla bea moya wa ka hare ho lona, mme ke tla le tsamaisa dikomelong tsa ka, ke etse hore le boloke ditaelo tsa ka, hore le di phethe. 28Le tla aha lefatsheng leo ke neng ke le nee bontata lona, le be setjhaba sa ka, nna ke be Modimo wa lona. 29Ke tla le ntsha ditshileng tsa lona tsohle, mme ke tla mema koro, ke e atise, ke se ke ka hlola ke le romela tlala; 30ke tla atisa ditholwana tsa difate, le se melang masimong, hore le se ke la hlola le jara sekgobo sa tlala hara ditjhaba. 31Mohlang oo, le tla elellwa mekgwa yohle e mebe ya lona le diketso tsa lona tse se nang botle, le ikgobohellwe ka baka la makgopo a lona le la manyala a lona. 32Ke mpa ke sa etse ka baka la lona, ho rialo Morena Jehova; sena se ke se tsejwe ke lona; hlajwang ke dihlong, le swabe ke mekgwa ya lona, ntlo ya Iseraele!

33Morena Jehova o re: Mohla ke le ntlafatsang hore le hloke makgopo a lona, ke tla etsa hore metse e ahuwe, mme dithako di tsoswe. 34Lefatshe le lefeella le tla lengwa, le se ke la hlola le eba lefeella mahlong a bohle ba fetang ka tsela; 35ba tla re: Lefatshe leno, e neng e le lefeella, le fetohile le ka tshimo ya Edene; metse eno, e neng e timeditswe, e entsweng dithako, e heleditsweng, e fetohile diqhobosheane, e ahilwe. 36Kahoo, ditjhaba tse setseng, tse le kopileng ka nqa tsohle, di tla tseba hoba ke nna Jehova ke tsositseng metse e heleditsweng, ke boetseng ke lemile lefeella. Ke nna Jehova ke bolelang seo, ke se etsang.

37Morena Jehova a re: Ke sa tla dumela ho batlelwa ho hong ke ba ntlo ya Iseraele hore ke ba etsetse hona: ke tla ba atisetsa batho ba be ka ka mohlape wa dinku. 38Jwaloka mehlape ya dinku tse kgethetsweng mahlabelo, e leng mehlape ya Jerusalema diphuthehong tsa teng tse mahlonoko, ka mokgwa o jwalo, metse e timeditsweng e tla tlala mehlape ya batho, ba tle ba tsebe hoba ke nna Jehova.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index