Search form

ESEKIELE 45

1Etlare ha le aba lefatshe ho etsa mafa, le arolele Jehova karolo, karolo e kgethehileng ya naha; e be bolelele bo ditswe tse dikete tse mashome a mabedi a metso e mahlano, le bophara bo ditswe tse kete tse leshome; e tla halalela hohle ho isa moeding wa yona. 2Sehalalelo se tla arolelwa sebaka sa ditswe tse makgolo a mahlano ka bolelele, le tswe tse makgolo a mahlano ka bophara, baka se mahlakore a mane a lekanang, hammoho le sebaka se bophara bo tswe tse mashome a mahlano se potang kahohle. 3Ka ho ya ka tekanyo eo, o tla lekanya sebaka se bolelele bo ditswe tse dikete tse mashome a mabedi a metso e mene le bophara bo ditswe tse dikete tse leshome; bakeng seo, ho tla ema sehalalelo seo e leng sehalaledisiso. 4Ke yona karolo ya naha e tla kgethwa; e tla ba ya baprista ba tla sebetsa mosebetsi wa sehalalelo, ba atamelang ho etsa tshebeletso ya Jehova; e tla ba setsha sa matlo a bona le nqalo e kgethehileng ya ho haha sehalalelo.

5Ho ntoo lekanngwa sebaka sa ditswe tse dikete tse mashome a mabedi a metso e mehlano boleleleng le sa ditswe tse kete tse leshome bophareng; e tla ba sa Balevi; haele ba etsang tshebeletso ya ntlo, ba tla rua dikamore tse mashome a mabedi ho yona.

6Haele naha e tla abelwa motse, e tla etsa sebaka se bophara bo ditswe tse kete tse hlano le bolelele bo ditswe tse dikete tse mashome a mabedi a metso e mehlano, ho sika le naha e abetsweng sehalalelo; e tla ba naha ya ntlo yohle ya Iseraele.

7Naha ya morena e tla ba ka kwano ho naha e arotsweng ya sehalalelo; le ho e tla ruwa ke motse, mabapa le naha e arotsweng ya sehalalelo le kapele ho naha e ruilweng ke motse, ho tloha nqeng ya bophirimela ho yona ho leba ka nqa bophirimela, le ho tloha nqeng ya botjhabela ho yona ho leba ka nqa botjhabela; bolelele ba karolo eo bo tla lekana le bolelele ba karolo ya leloko, ho tloha moeding wa bophirimela, ho tlisa moeding wa botjhabela. 8E tla ba yona naha ya hae, leruo la hae Iseraeleng; mme marena a setjhaba sa ka ha a sa tla tuba setjhaba sa ka, a mpa a tla nea ntlo ya Iseraele naha, ka ho ya ka meloko ya yona.

9Morena Jehova o re: Oho, marena a Iseraele, ho lekane! Tlosang bothata le tshenyo, etsang ka taelo le ka ho loka; le se ke la hlola le leleka setjhaba sa ka: ho bolela Morena Jehova.

10Ebang le sekala se lokileng, le efa e lokileng, le bathe e lokileng. 11Efa le bathe di be le tekanyo e le nngwe, hore bathe e tle e lekane le karolo ya leshome ya homere, efa le yona e lekane le karolo ya leshome ya homere; tekanyo ya tsona e tla lekanngwa ka homere. 12Haele shekele, e tla etsa gera tse mashome a mabedi. Mine ya lona e tla ba dishekele tse mashome a mabedi, e nngwe e be dishekele tse mashome a mabedi a metso e mehlano e nngwe e be dishekele tse leshome le metso e mehlano.

13Kabelo eo le tla e abela morena e be karolo ya botshelela ya efa ka homere e le nngwe ya koro, le karolo ya botshelela ya efa ka homere e le nngwe ya harese.

14Molao bakeng sa ole, bakeng sa bathe ya ole, ke hore ho ntshwe karolo ya leshome ya bathe ka kore, eo e leng homere ya bathe tse leshome, etswe bathe tse leshome di etsa homere. 15Ho ntshwe nku e le nngwe ho tse makgolo a mabedi naheng e noseditsweng ya Iseraele, ho etsa dinyehelo, le ditjheso le mahlabelo a teboho, ho ba etsetsa pheko ka tsona: ho bolela Morena Jehova. 16Setjhaba sohle sa lefatshe se tla ntshetsa eo e leng morena Iseraeleng kabelo eo. 17Haele morena, ke yena ya tla batlela mekete, le dikgwedi tse thwasang, le Disabatha, le diphutheho tsohle tsa ntlo ya Iseraele, ditjheso le dinyehelo le ditshelo. Ke yena ya tla hlaba sehlabelo sa sebe, le nyehelo, le setjheso, le mahlabelo a teboho, ho etsetsa ntlo ya Iseraele pheko ka tsona.

18Morena Jehova o re: Kgweding ya pele, ka tsatsi la ho qala la kgwedi, o tla nka pohwana e se nang sekodi, ka yona o hlatswe sehalalelo. 19Moprista o tla nka madi a mang a sehlabelo sa sebe, a a bee dikoseneng tsa monyako wa ntlo; le dintlheng tse nne tsa moqhaka wa aletare, le dikoseneng tsa monyako wa lebala le kahare. 20O tla boela o etse jwalo ka la bosupa la kgwedi ka baka la ya fositseng le ka baka la sethoto, mme le tla etsetsa ntlo pheko.

21Ka kgwedi ya pele, ka letsatsi la leshome le metso e mene la kgwedi, le tla ba le Paseka, mokete wa matsatsi a supileng; ho tla jewa mahobe a se nang ditomoso. 22Tsatsing leo, morena o tla itlhabela yena le ho hlabela setjhaba sohle sa lefatshe poho ka mokgwa wa sehlabelo sa sebe. 23Hape, ka matsatsi a supileng a mokete, o tla hlabela Jehova dipoho tse supileng le dipheleu tse supileng tse se nang sekodi, ka mokgwa wa ditjheso, ka tsatsi le leng le le leng ho matsatsi ao a supileng; hape, a hlabe phooko ka tsatsi le leng le le leng, e le sehlabelo sa sebe. 24Nyehelo ya hae, o tla tlisa efa ka poho e nngwe le e nngwe, le efa ka pheleu e nngwe le e nngwe; haele ole, o tla ntsha hine ka efa.

25Ka kgwedi ya bosupa, ka letsatsi la leshome le metso e mehlano la kgwedi, mohla mokete, o tla hlaba ntho di le ding ka matsatsi a supileng: sehlabelo se le seng sa sebe, setjheso se le seng, nyehelo e le nngwe, le ole e lekaneng.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index