Search form

ESDRASE 7

Esdrase o fihla Jerusalema.

1Kamora tseo, mohla ho busang Artakserksese, morena wa Persia, Esdrase mora Seraia, mora Asaria, mora Hilkia, 2mora Shallume, mora Tsadoke, mora Akitube, 3mora Amaria, mora Asaria, mora Merajothe, 4mora Serahia, mora Ussi, mora Buki, 5mora Abishua, mora Finease, mora Eleasare, mora Aarone, moprista e moholo, ke re, Esdrase eo a tloha Babilona. 6E ne e le mongodi ya masene molaong wa Moshe oo Jehova, Modimo wa Iseraele, a neng a o neile. Morena a mo nea tsohle tseo a di kopileng, kahobane letsoho la Jehova, Modimo wa hae, le ne le le ho yena. 7Ba bang ba bana ba Iseraele, baprista, le Balevi, le dibini, le balebedi ba menyako, le ba Banethinime, ba nyolohela Jerusalema le yena, e le ka selemo sa bosupa sa ho busa ha Artakserksese. 8A fihla Jerusalema ka kgwedi ya bohlano, e le ka selemo sa bosupa sa morena. 9A qala ho tloha Babilona ka la pele la kgwedi ya pele, a fihla Jerusalema ka le qalang kgwedi ya bohlano, kamoo letsoho le molemo la Modimo le nnileng la eba ho yena kateng. 10Hobane Esdrase o ne a sekehetse pelo ya hae ho batla molao wa Jehova le ho etsa ka wona, le ho ruta Baiseraele melao le dikahlolo.

11Ke yona kopi ya lengolo leo morena Artakserksese a kileng a le nea Esdrase, moprista le mongodi, mongodi wa ditaelo tsa Jehova le wa melao ya hae e laetsweng Baiseraele. 12Ha thwe: Ke le Artakserksese, morena wa marena, ke ngolla Esdrase, moprista le mongodi ya phethehileng molaong wa Modimo wa mahodimo. Jwalojwalo. 13Ke laela hore bohle ba mmusong wa ka, bao e leng ba setjhaba sa Iseraele, le baprista ba bona le Balevi, ba ratang ho kgutlela Jerusalema ka thato ya bona le wena, Esdrase, ke re ba ka tsamaya. 14O rongwa ke morena le banna ha hae ba supileng ba lekgotla ho ya hlahloba Juda le Jerusalema, kamoo ho laetsweng molaong wa Modimo wa hao kateng oo o o tshwereng matsohong a hao; 15le ho ya le silefera le kgauta tseo morena le banna ba hae ba lekgotla ba di ntsheditseng Modimo wa Iseraele ka ho rata, oo tulo tsa wona di leng Jerusalema; 16le silefera le kgauta tseo o ka di fumanang seterekeng sohle sa Babilona, hammoho le dimpho tse tla ntshetswa ntlo ya Modimo o Jerusalema ke setjhaba le baprista ka ho rata ha bona. 17Ka baka leo, o ke o phakise o reke ka tjhelete tseo dipoho, le dipheleu, le dikonyana, le dinyehelo tsa tsona le dino tsa tsona, mme o di hlahise aletareng ya ntlo ya Modimo wa lona o Jerusalema. 18Haele silefera le kgauta tse ka salang, wena le banabeno le tla sebetsa ka tsona ka thato ya Modimo wa lona, kamoo ho tla bona lona kateng. 19Haele mesebetsi eo o e neilweng ya tshebeletso ya ntlo ya Modimo wa hao, o e bee pontsheng ya Modimo o Jerusalema. 20Tse ding tse ka batlelwang ntlo ya Modimo wa hao, tseo o tshwanetseng ho di ntsha o hle o di nke tlung ya bobolokelo ya morena. 21Mme nna ke le morena Artakserksese, ke laela lona bohle ba mose wane ho noka, ba bolokang matlotlo a ka, hore le phakise le etse kahohle kamoo Esdrase, moprista le mongodi ya masene molaong wa Modimo wa mahodimo o tla kopa kateng, 22ho kgutla talenteng tse lekgolo tsa silefera, le dikoreng tse lekgolo tsa koro, le dibatheng tse lekgolo tsa veine, le dibatheng tse lekgolo tsa ole, ka letswai le se nang ho ngolwa bongata. 23Tsohle tse laetsweng ke Modimo wa mahodimo di ke di etsetswe ntlo ya Modimo wa mahodimo ka mokgwa o phethehileng, hore kgalefo ya wona e tle e se ke ya eba hodima mmuso le morena le bara ba hae. 24Hape, re a le tsebisa hore, haele baprista bohle, le Balevi, le dibini, le balebedi ba menyako, le Banethinime, le bahlanka ba ntlo eo ya Modimo, ba se ke ba ntshiswa lekgetho, leha e le sethabathaba, kapa kabelo. 25Haele wena, Esdrase, ka bohlale ba Modimo wa hao boo o nang le bona, o ke o bee baahlodi le bahlahlobi ba ahlolang setjhaba sohle se mose wane ho noka, e leng bohle ba tsebang melao ya Modimo wa hao; haele e mong le e mong ya sa e tsebeng, le mo rute yona. 26Mang le mang ya sa etseng ka molao wa Modimo wa lona le ka molao wa morena, a ahlolwe kapele, kapa a bolawe, kapa a lelekwe, kapa ho jewe ntho tsa hae, kapa a hlahlelwe teronkong.

27Ho bokwe Jehova, Modimo wa bontata rona, ya beileng taba tse kalo, pelong ya morena tsa hore ho kgabiswe ntlo ya Jehova ya Jerusalema, 28ya mphumanisitseng mohau ho morena, le ho banna ba hae ba lekgotla, le ho mahosana wohle a matla a morena! Haele nna, ka nna ka ipha matla, kamoo letsoho la Jehova, Modimo wa ka, le neng le ntse le le ho nna kateng; ka ba ka phutha baholo ba Iseraele, hore ba nyolohe hammoho le nna.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index