Search form

GENESE 14

Abrame o hlola marena. — Melkisedeke.

1Yare mehleng ya Amrafele, morena wa Shineare, le Arioke, morena wa Ellasare, le Kedorlaomere, morena wa Elame, le Tideale, morena wa Gojime, 2marena ao a futuhela Bera, morena wa Sodoma, le Birsha, morena wa Gomora, le Shineabe, morena wa Adma, le Shemeebere, morena wa Tseboime, le morena wa Bela, ke ho re, wa Tsoware. 3Marena ana kaofela a kgahlana lehwatateng la Sidime, moo kajeno e leng Lewatle la Letswai. 4Ka dilemo tse leshome le metso e mmedi, a ne a busitswe ke Kedorlaomere, empa ka lemo sa leshome le metso e meraro a kweneha. 5Yaba ka selemo sa leshome le metso e mene, Kedorlaomere a tla le marena a nang le yena, mme ba hlola ba Refaime Ashterothe-Karnaime, le Bazuzime Hame, le Baemime Shave-Kiryathaime, 6le Bahore, thabeng ya bona ya Seire, ho isa eikeng e Parane, haufi le lefeella. 7Ba ba ba kgutla, ba tla Ene-Mishpathe, ke ho re, Kadeshe, ba qhala Baamaleke le Baamore ba ahileng Hatsatsone-Thamare, naheng yohle ya bona. 8Yaba ho tswa morena wa Sodoma, le morena wa Gomora, le morena wa Adama, le morena wa Tseboime, le morena wa Bela, ke ho re, wa Tsoware, mme a laola makgotla a wona lehwatateng la Sidime; 9a re a lwantsha Kedorlaomere, morena wa Elame, le Tideale, morena wa Gojime, le Amrafele, morena wa Shineare, le Arioke, morena wa Ellasare: marena a mane a lwantsha marena a mahlano. 10Lehwatata la Sidime le ne le na le mekotikoti ya bitume, mme eitse ha marena a Sodoma le a Gomora a baleha, a wela ho yona, mme ba phonyohang ba balehela thabeng. 11Yaba ho hapjwa maruo wohle a Sodoma le a Gomora, le dijo tsohle tse teng, ha kgutlwa. 12Ha nkwa le Lota, mora moena Abrame, ya neng a ahile Sodoma, le maruo a hae kaofela, ha tsamauwa.

13Yaba ho fihla mobalehi e mong, a bolella Abrame, Moheberu, ya ahileng dieikeng tsa Mamre, Moamore, ngwanabo Eshkole le Anere, ba neng ba ena le selekane le Abrame. 14Eitse ha Abrame a utlwa hoba ngwanabo o tshwerwe, a phalla le batho ba hae ba hlakisitseng ba makgolo a mararo a leshome le metso e robileng meno e mmedi, ba tswaletsweng ka tlung ya hae, mme a ba tebela, a ba a fihla Dane. 15Yaba o arola makgotla a hae, a ba patela bosiu, yena le bahlanka ba hae, a ba hlola, a ba tebela ho isa Khoba, ka ho le letshehadi ho Damaseka. 16A kgutla le maruo kaofela; a ba a kgutla le Lota, ngwanabo, le maruo a hae, a ba a tla le basadi le batho.

17Yaba morena wa Sodoma o tswa ho ya mo kgahlanyetsa, ha a kgutla, a se a hlotse Kedorlaomere le marena a neng a na le yena; mme a mo fihlela lehwatateng la Shave, ke ho re, lehwatata la morena.

18Melkisedeke, morena wa Saleme, a tlisa bohobe le veine. E ne e le yena moprista wa Modimo o hodimodimo. 19A mo hlohonolofatsa, a re: Ho hlohonolofatswe Abrame ke Modimo o hodimodimo, monga mahodimo le lefatshe! 20Ho rokwe Modimo o hodimodimo, o neetseng dira tsa hao matsohong a hao!

Yaba Abrame o mo abela karolo ya leshome ya ntho tsohle.

21Morena wa Sodoma a re ho Abrame: Nnee batho, o inkele maruo. 22Empa Abrame a araba morena wa Sodoma, a re: Ke emisitse letsoho la ka ho Jehova, Modimo o hodimodimo, monga mahodimo le lefatshe, 23hore, leha e le tshwele, leha e le leqhwele la seeta, nke ke ka nka letho la hao, o tle o se ke wa re: Ke fumisitse Abrame. 24Haese feela see bahlanka ba se jeleng, le kabelo ya banna ba ileng le nna, Boanere, le Eshkole, le Mamre, bona ba ke ba nke kabelo ya bona.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index