Search form

BAHEBERU 5

1Hobane moprista e moholo, leha e le ofe le ofe, ya nkwang hara batho, o ye a beelwe batho dinthong tsa tshebeletso ya Modimo, a tle a hlahise dinyehelo le mahlabelo ka baka la dibe; 2mme o na le matla a ho hauhela ba sitilweng ke ho se tsebe le ke ho timellwa, kahobane le yena o dikilwe ke mefokolo. 3Ke ka baka leo a tshwanetseng ho hlahisa mahlabelo ka baka la dibe tsa hae, jwalokaha a etsa ka baka la dibe tsa setjhaba.

4Hape, ha ho motho ya ka inkelang kabelo eo e hlomphehang, haese ya e bileditsweng ke Modimo, jwaloka Aarone. 5Esitile Kreste le yena ha a ka a inea kganya ya boprista bo boholo, empa o e neilwe ke ya itseng ho yena: O Mora ka, ke o tswetse kajeno. 6Jwalokaha lengolong le leng ho itswe: Wena, o moprista ka ho sa feleng, ka mokgwa wa Melkisedeke.

7Ke Jesu eo, mehleng ya nama ya hae, ya kileng a hlahisa, ka mohoo o moholo le ka meokgo, merapelo ya hae e bohloko ho ya neng a ka tseba ho mo lwela lefung; mme eitse hobane a utluwe, ka baka la borapedi ba hae, 8leha e ne e le Mora, o ithutile kutlo ka tse bohloko tse mo hlahetseng. 9Mme jwale, ha a phethehile, o entswe moetsi wa poloko e sa feleng ho bohle ba mo utlwang, 10mme Modimo o mmoletse hore ke moprista e moholo, ka mokgwa wa Melkisedeke.

11Bakeng seo, re na le taba tse ngata tseo re ka di bolelang, empa di thata ho hlaloswa, ka hobane le fetohile ba botswa ho mameleng. 12Hobane ekabeba ke kgale le le baruti, athe le sa ntse le tshwanelwa ke ho rutwa ditaba tsa bonyenyane, tseo taba tsa Modimo di qalwang ka tsona; mme le fetohile batho ba tshwanelwang ke ho fepjwa ka lebese, e seng ka dijo tse tiileng. 13Hobane e mong le e mong ya fepjwang ka lebese, o sitwa ho ikutlwela lentswe la ho loka; kahobane e sa le ngwana; 14empa dijo tse tiileng ke tsa banna ba tiileng, e leng bao dikelello tsa bona di lemaletseng ho kgetha ho hotle le ho hobe, ke ho sebediswa hona.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index