Search form

ESAIA 10

1Ho madimabe ba beang melao e sa lokang, le bangodi ba ngolang mangolo a hloriso; 2ho amoha mafutsana tokelo ya wona, le ho hlakola tokelo ya bafumanehi ba setjhaba sa ka, ho etsa bahlolohadi kgapo ya bona, le ho ja dikgutsana. 3Na le tla etsa jwang mohla letsatsi la tekolo, le mohla sefefo se tlang se etswa hole? Le tla balehela ho mang ho batla thuso, le bee letlotlo la lona kae? 4Ha ho a sala letho haese ho kokobetswa hara ba tlamilweng; ba tla wa hara ba bolailweng. Leha ho le jwalo, bohale ba hae bo ke ke ba kgutla, le letsoho la hae le sa ntse le otlolohile.

Baassiria ba tla kokobetswa. — Dinako tsa Messia.

5Ho madimabe Assiria, thupa ya bohale ba ka, leha ke beile molamu wa kgalefo ya ka matsohong a hae! 6Ke mo rometse ho lwantsha setjhaba se kgopo, ke mo laetse ho ya lwantsha setjhaba seo ke se halefetseng, a tle a hape dintho tsa sona, a rue letlotlo, a se hatakele jwaloka diretse tsa mmila. 7Empa yena ha a lemohe hobane ho dutse jwalo, ha a lemohe pelong ya hae hobane ho jwalo, empa se ka pelong ya hae ke ho senya le ho fedisa ditjhaba tse ngata. 8Hobane o re: Matona a ka na hase marena kaofela a tsona na? 9Ha ke re, Kalno o sentswe jwaloka Karkemishe, le Hamathe jwaloka Arpade, le Samaria jwaloka Damaseka na? 10Jwalokaha letsoho la ka le ile ho fihla mebusong ya medimo, leha ditshwantsho tsa yona di ne di fetisa tsa Jerusalema le tsa Samaria, 11na nke ke ka etsa Jerusalema le medimo ya hae jwalokaha ke entse Samaria le ditshwantsho tsa hae na?

12Etlare hobane Morena a qete mosebetsi wohle wa hae thabeng ya Sione le Jerusalema, ke tla otla morena wa Assiria ka baka la ditholwana tsa boikgohomoso ba pelo ya hae, le ka baka la boikgantsho ba mahlo a hae. 13Hobane o itse: Ke entse hoo ka matla a letsoho la ka le ka bohlale ba ka, etswe ke hlalefile, ke suthisitse meedi ya ditjhaba, ke ikgapetse matlotlo a tsona, mme jwaloka mohale ke rapaladitse ba dutseng diteroneng. 14Letsoho la ka le hapile menono ya ditjhaba jwalokaha ho nkuwa ntlo ya nonyana; jwalokaha ho bokellwa mahe a tlohetsweng, ke ipokelletse lefatshe kaofela jwalo, mme ha ho ya kileng a sisinya mapheo, ya ahlamisitseng molomo, a lla. 15Na selepe se ka ithoka ho ya remang ka sona na? Le sakga na e ka ithorisa ho ya sakgang ka yona na? Teng, ho ka ba jwaloka hoja thupa e ka sisinya letsoho la ya e emisang, kapa lere le ka emisa hoo e seng sefate.

16Ka baka leo, Morena, Jehova wa makgotla, o tla otisa dinatla tsa Assiria; tlasa kganya ya hae ho tla tjha ho kang ho tjha ha mollo. 17Lesedi la Iseraele le tla fetoha mollo, Mohalaledi wa hae e be kgabo e tla tjhesa le ho fedisa meutlwa le dibajwa tsa hae, di tjhe ka tsatsi le le leng feela. 18O tla tjhesa kganya ya moru wa hae le ya masimo a hae jwalo, ho fele moya le mmele, ho be jwaloka motho ha a kula, a kgathala. 19Difate tsa moru wa hae tse tla sala, e tla ba tse ka balwang, le ngwana a ka tseba ho ngola palo ya tsona.

20Mohlang oo, masala a Iseraele le ba phonyohileng ba ntlo ya Jakobo ha ba sa tla hlola ba tshepa mohlorisi wa bona, empa ba tla tshepa Jehova, Mohalaledi wa Iseraele, ka nnete yohle ya bona. 21Masala, ke re, masala a Jakobo, a tla sokolohela ho Modimo o matla. 22Hobane leha setjhaba sa hao, Iseraele, se ka lekana le lehlabathe la lewatle, e tla ba masala a sona feela a tlang ho sokoloha; tefetso e rerilweng e tiile, e tla tsholoha ka ho loka. 23Hobane naheng yohle Morena, Jehova wa makgotla, o tla romela tshenyo eo a e rerileng.

24Ka baka leo, Morena, Jehova wa makgotla, o re: Wena setjhaba sa ka se ahileng Sione, o se ke wa tshoha Assiria, leha a o otla ka thupa, a emisitse molamu ho wena, jwalokaha ho kile ha etswa Egepeta. 25Hobane ho se ho se hokae, kgalefo ya ka e tla feta, bohale ba ka bo kgelohele ho ya ba timeletsa. 26Jehova wa makgotla o tla tlisa phafa hodima Assiria, jwalokaha a kile a otla Midiane lefikeng la Orebe, a emise thupa ya hae hodima lewatle, jwalokaha a entse Egepeta. 27Mehleng eo, boima ba Assiria bo tla tloswa lehetleng la hao, le joko ya hae molaleng wa hao, joko e robehe ka baka la ho nona ha hao.

28Jo! Assiria o se a le Ajathe, o feta ka Migrone, o siya diphahlo tsa hae Mikmashe. 29O se a fetile ka lekgalo; bosiu o bo hlola Geba; ba Rama ba tshohile, ba Gibea-Saule ba balehile. 30Wena moradi wa Gallime, o bokolle; Laishe, iponele; Anathothe, o madimabe! 31Ba Madmena ba qhalane, ba ahileng Gebime ba baleha ka dintho tsa bona. 32Ka lona letsatsi lena o se a tla fihla Nobe, mme ka letsoho la hae o tla supa thaba ya moradi wa Sione, leralla la Jerusalema.

33Bonang, Morena, Jehova wa makgotla, o tla roba makala a sefate seo ka matla a maholo, a matenya a tla rengwa, a phahamileng a kokobetswe. 34O tla rema boteteano ba moru ka tshepe, Lebanone o tla dihuwa ke Ya matla.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index