Search form

JOBO 12

Jobo o ikarabela hape.

1Jobo a boela a fetola, a re: 2Kannete, lona le banna! mme bohlale bo ya shwa le lona? 3Le nna hle ke na le pelo jwaloka lona, ha ke monyenyane ho lona! Ditaba tseo, ke mang ya sa di tsebeng na? 4Ke fetohile sesomo ho metswalle ya ka, ha ke kopa thuso ho Modimo; e, ke sesomo ke le ya lokileng, ya se nang molato. 5Bomadimabe bo loketswe ke nyediso, ha ho hopola baiketli; o lebeletse eo leoto la hae le batlang ho thella. 6Boiketlo bo ditenteng tsa basenyi, kgotso e teng ho ba sa reng letho ka Modimo, bao matla a bona e leng modimo wa bona.

7O mpe o botse dikgomo, di tle di o rute; le dinonyana tsa lehodimo, di tle di o bolelle! 8Mohlomong o botse lefatshe, le tle le o rute, le dihlapi tsa lewatle, di tle di o qaqisetse. 9Ka tsona tsohle, ke mang ya ka hanang ho bona hoba letsoho la Jehova le entse ntho tseo kaofela; 10eo meya ya tse phelang kaofela e leng letsohong la hae, le phefumoloho ya batho bohle? 11Ha ke re, tsebe e ka nna ya kgetha dipolelo, jwaloka mahalapa ha a tseba ho kgetha dijo na? 12Maqheku a na le bohlale, dilemo tse ngata di na le kutlwisiso.

13Ho wona Modimo ho dutse bohlale le matla; o na le kelello le kutlwisiso. 14Bona, ha o senya, ha ho ya ka tsosang; ha o ka kwalla motho, ha ho ya ka mo bulelang. 15Bona, o thibela metsi, a pshe; o boele o a tlohele, mme lefatshe le senyehe. 16Ho wona ho dutse matla le bohlale; ya kgelohileng le ya kgelosang ba matleng a wona. 17O isa baeletsi kgolehong ba hlobodisitswe, o tsietsa baahlodi; 18o roba molamu wa marena, o tlama matheka a wona ka mehala. 19O isa baprista kgolehong ba hlobodisitswe, o diha ba matla; 20ba tsebang ho bua o ba hlokisa ditaba, o amoha baholo kahlolo; 21o tshela dihlong hodima mahosana, o lokolla senyepa sa ba matla. 22O senola makunutu a patilweng lefifing; o hlahisa moriti wa lefu leseding. 23O atisa ditjhaba, o boele o di senye; o namisa ditjhaba, o boele o di kgutlisetse morao. 24O tlosa kutlwisiso ho marena a ditjhaba; o ba dikadikisa dibakeng moo tsela e leng siyo; 25ba phopholetsa lefifing ho se lesedi, mme o ba diadieisa jwaloka batho ba tahilweng.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index