Search form

JOBO 16

Jobo o boela a ikarabela ho Elifase.

1Jobo a fetola, a re: 2Ditaba tse jwaloka tseo ke se ke kgotshe tsona; kaofela ha lona le batshedisi ba kgathatsang. 3Dipolelo tsa lefeela na di fedile na? Kapa se o arabisang hathata jwalo keng? 4Le nna, ke ne nka bua jwaloka lona, hoja le dutse ditulong tsa ka; nka be ke loha ditaba hodima lona, ka oma ka hlooho ho lona; 5nka be ke le matlafisa ka molomo wa ka, ka le tiisa ka ho bebenya ha melomo ya ka.

6Leha nka bua, bohloko ba ka bo ke ke ba kgutsa; mme leha nka lesa, nka bona thuso kae? 7E, o mphokodisitse hampe, ... o ripitlile ntlo ya ka kaofela; 8o ntshwere ka thata, mme hoo ke paki e nqosang, ho ota ha ka ho ema ho nketselletsa, le ho nqosa pontsheng. 9Ke haholwa ke kgalefo ya wona; o ikentse sera ho nna, o phuranya meno ho nna; eo e leng sera ho nna o ntlhaba ka mahlo a bohale. 10Ba ahlamile melomo ya bona hampe hodima ka, ba ntshoma, ba ntjabela marameng; ba teane hammoho ho ntwantsha. 11Modimo o nneetse matsohong a ba bolotsana, o nkakgetse diatleng tsa ba babe.

12Ke ne ke phela hantle, empa o nthobile; o ntshwere ka molala, o nthobakile; o mpeile sebeo sa ho phosa ha wona. 13Metsu ya wona e nkwetse hodimo, e etswa nqa tsohle; o ntlhabile matheka, o se na mohau; wa tsholla nyoko ya ka fatshe; 14wa nntsha leqeba hodima leqeba, wa mphallela jwaloka mohale. 15Ke apesitse letlalo la ka ka lesela le mahwashe, mme ka silafatsa lenaka la ka ka lerole. 16Sefahleho sa ka se rurusitswe ke dillo, botsho ba lefu bo apesitse dintshi tsa ka. 17Leha ho le jwalo, ha ke pate letho le sa lokang letsohong la ka, thapelo ya ka e hlwekile.

18Wena, lefatshe, o se ke wa pata madi a ka! mohoweletso wa ka o se ke wa kgutsa! 19Le jwale, bonang, paki ya ka e mahodimong, mme molatoledi wa ka o nqalong tse hodimodimo. 20Leha metswalle ya ka e fetohile basomi, mahlo a ka a lebile ho Modimo ka meokgo; 21hore o emele motho ho Modimo, le ngwana motho ho metswalle ya hae; 22hobane ho sa tla feta dilemo tse seng kae, ke ntoo ikela ka tsela eo nke keng ka kgutla ka yona.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index