Search form

JOBO 20

Phetolo ya bobedi ya Tsofare.

1Yaba Tsofare wa Naama o fetola, a re: 2Mehopolo ya ka, bakeng sena, e tla mponela phetolo, le hona ke sitwa ho itshwara maikutlong a ka. 3Ke utlwile dikgalemelo tse ntlhabisang dihlong, empa kelello ya ka e nnea karabo.

4Na ha o tsebe hoba, esale kgalekgale, haesale motho a bewa lefatsheng, 5thabo ya molotsana e fela kapele, le ho nyakalla ha ya kgopo e le ha motsotso o le mong feela? 6Le hoja a ka hola ho isa lehodimong, hlooho ya hae ya fihla marung, 7leha ho le jwalo, o tla fela jwaloka lethete la hae, ka ho sa feleng; ba mmoneng ba tla re: O kae? 8O tla feta jwaloka toro, mme a ke ke a hlola a fumanwa; a timele jwaloka pono ya bosiu. 9Le mahlo a kileng a mmona, ha a sa tla hlola a mmona; ditulo tsa hae ha di sa tla boela di mmone. 10Bara ba hae ba tla kgathatswa ke mafutsana, matsoho a hae a tla tshwanela ho busetsa leruo la hae. 11Masapo a hae a tletse matla a botjha, athe jwale a tla robala le yena leroleng. 12Leha bolotsana bo ne bo le monate molomong wa hae, mme a bo patile katlasa leleme la hae, 13a bo bolokile, a hanne ka bona, a bo bolokile mahalapeng a hae, 14dijo tseo di tla fetoha maleng a hae, e be mahloko a marabe kahare ho yena. 15O metsitse menono, mme jwale o tshwanetse ho e hlatsa; Modimo o ya e ntsha mpeng ya hae. 16O antse mahloko a marabe, mme leleme la qowane le tla mmolaya. 17Mahlo a hae ha a sa tla thabela melatswana, leha e le melapo, leha e le dinokana tsa dinotshi le lebese. 18O tla busetsa ditlatlapilweng tsa hae, a ke ke a di rua. O tla busetsa tse lekanang le tseo a di tlatlapileng, mme ha a sa tla di thabela. 19Hobane o tubile basenyehi, o ba lahlile; mme leha a sentse matlo ka mano, ha a ka ke a a tsosa. 20Erekaha a sa tsebe ho kgolwa kateng ho yena, o tla sitwa ho pholosa seo a se ratang. 21Ha ho letho le phonyohang meharong ya hae; ka baka leo, boiketlo ba hae bo ke ke ba tiya. 22O tla hloka, leha maruo a hae a mo atetse haholo; matsoho a ba tujwang a tla mo wela hodimo. 23Modimo ke wona o tlang ho kgorisa mpa ya hae, o tla mo otla ka tjheso ya kgalefo ya wona, o e nese hodima nama ya hae. 24Leha a ka balehela sebetsa sa tshepe, seqha sa koporo se tla mo hlaba. 25O ya ntsha motsu mmeleng wa hae, tshepe e hadimang e tswe nyokong ya hae; o fedile o tshwerwe ke botshabeho ba lefu. 26Lefifi le tshabehang e tla be letlotlo la hae; mollo o sa butswelwang ke motho o tla mo tjhesa, o fedise se setseng ka tenteng ya hae. 27Lehodimo le tla senola bokgopo ba hae, mme lefatshe le tla tsoha ho mo qosa. 28Maruo a ntlo ya hae a tla timela, a tla feta ka letsatsi la kgalefo ya Modimo. 29Ke yona kabelo ya molotsana e tswang ho Modimo, le lefa le beetsweng yena ke Modimo.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index