Search form

JONASE 3

Jonase o ya hlaba mokgosi Ninive. — Baninive ba baka.

1Lentswe la Jehova la tlela Jonase la bobedi, la re: 2Tloha, o ye Ninive, motseng o moholo, mme teng o tumise ditaba tseo ke o bolellang tsona.

3Yaba Jonase o tloha, a ya Ninive, ka taelo ya Jehova. Ninive e ne e le motse o moholo pela Modimo, o tsamauwang matsatsi a mararo. 4Jonase a qala ho kena motseng, a etsa leeto la letsatsi le le leng, a ntse a howa, a re: Kamora matsatsi a mashome a mane, Ninive o tla timetswa.

5Yaba batho ba Ninive ba dumela Modimo, ba bea letsatsi la ho itima dijo, ba apara bohle masela a mahwashe, ho qala ka e moholo wa bona ho isa ho e monyenyane. 6Le yena morena wa Ninive, ha taba tseo di fihla ho yena, a tloha teroneng ya hae, a hlobola kobo ya hae, a apara lesela le mahwashe, a dula moloreng. 7Mme ha tsebiswa, ha tumiswa kahohle Ninive, ka taelo ya morena le ya matona a hae, ha thwe: Ho se ke ha eba letho, kapa motho, leha e le phoofolo, kapa dikgomo, leha e le dinku, tse ka jang letho; di se ke tsa fula, di se ke tsa enwa metsi; 8batho le diphoofolo di mpe di apare masela a mahwashe, batho ba ke ba howeletse ka matla ho Modimo, mme e mong le e mong a furalle metsamao ya hae e mebe le bokgopo bo matsohong a hae. 9Ho tseba mang? Mohlomong Modimo o tla re utlwa, o kgutle, o kgutle bohaleng ba kgalefo ya wona, re se ke ra timela.

10Eitse ha Modimo o bona ho etsa ha bona, kamoo ba sokolohang metsamaong ya bona e mebe kateng, Modimo le wona wa kgutla bobeng boo o neng o itse o tla bo etsa ho bona, mme ha o a ka wa bo etsa.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index