Search form

JOSHUA 5

Lebollo. — Paseka e etswa mahwatateng a Jeriko.

1Empa marena wohle a Baamore, a leng ka nqa bophirimela ho Jordane, le marena wohle a Bakanana, a pela lewatle, ha a utlwa kamoo Jehova a pshesitseng metsi a Jordane kateng, pela bana ba Iseraele, ba ba ba tshela, a nyahama dipelo, mme a fela matla ke ho tshaba bana ba Iseraele.

2Mohlang oo, Jehova a re ho Joshua: Iketsetse dithipa tsa mahakwe, mme o bolotse bana ba Iseraele la bobedi. 3Yaba Joshua o iketsetsa dithipa tsa mahakwe, a bolotsa bana ba Iseraele leralleng la mengala. 4Taba ke ena eo Joshua a ba boloditseng ka baka la yona: Batho kaofela ba neng ba tswile Egepeta, ba batona, banna ba ntwa kaofela, ba ne ba timetse tseleng hara nahathothe, ha ba se ba tswile Egepeta. 5Hobane setjhaba sohle, se neng se tswile, se ne se bolotse empa setjhaba sohle se neng se tswaletswe tseleng hara nahathothe, ha ho se ho tswilwe Egepeta, se ne se sa ka sa bolla. 6Hobane bana ba Iseraele ba ne ba tsamaile ka dilemo tse mashome a mane feelleng, letshwele lohle la bahlabani ba tswileng Egepeta la ba la fela, kahobane ba ne ba sa ka ba utlwa lentswe la Jehova; ke bona bao Jehova a neng a ba hlapanyeditse, a re, a ke ke a ba bontsha lefatshe leo Jehova a le abetseng bontata bona ka kano, e leng lefatshe le kollang lebese le dinotshi. 7Bana ba bona bao a neng a ba tsositse tulong tsa bona, ke bona bao Joshua a ba boloditseng; e ne e ntse e le maqai, kahobane ba ne ba sa ka ba bolotswa tseleng. 8Eitse hobane ba qete ho bolotsa setjhaba sohle, ba hlola diahelong tsa bona, ho fihlela ba ba ba fola.

9Jwale, Jehova a re ho Joshua: Kajeno, ke phikolositse sekgobo sa Egepeta, ke se tlositse ho lona. Ka baka leo, nqalo eo e reilwe lebitso la Gilgale (phikoloso), le kajeno. 10Bana ba Iseraele ba emisa Gilgale, ba etsa Paseka ka tsatsi la leshome le metso e mene la kgwedi, nakong ya mantsiboya, mahwatateng a Jeriko. 11Ka tsatsi le hlahlamang Paseka, ba eja koro ya lefatshe leo; ka lona tsatsi leo, ba eja bohobe bo sa lomoswang le diqhome. 12Haele manna, ya fela ka tsatsi le hlahlamang leo ba jeleng koro ya lefatshe leo ka lona; mme bana ba Iseraele ha ba ka ba hlola ba sa ba le manna, ba mpa ba eja dijo tsa lefatshe la Kanana ka lemo seo.

Joshua o teana le molaodi wa makgotla a Jehova.

13Eitse Joshua, ha a le haufi le Jeriko, a emisa mahlo, a tadima, a bona monna a eme mabapa le yena, a tshwere lerumo le tsomotsweng ka letsoho la hae. Joshua a tla pela hae, a re ho yena: Na o wa rona, kapa o wa direng tsa rona na? 14Eo a re: Tjhe, empa ke tlile jwale, ke le molaodi wa makgotla a Jehova. Yaba Joshua o wela fatshe ka sefahleho, a inama, a re ho yena: Morena ka o reng ho mohlanka wa hae? 15Molaodi wa makgotla a Jehova a re ho Joshua: Rola dieta tsa hao maotong a hao, etswe nqalo eo o emeng ho yona e kgethehile. Mme Joshua a etsa jwalo.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index