Search form

BAAHLODI 17

Setshwantsho se rapelwang ha Mika, Moefraime, le Molevi, moprista wa sona. — Setshwantsho seo se utsuwa ke Badane. — Badane ba hapa Laishe. — Ba emisa setshwantsho teng.

1Monna e mong o ne a le teng thabeng ya Efraime, bitso la hae e le Mika. 2A re ho mmae: Dishekele tsa silefera tse sekete se nang le lekgolo, tse utswitsweng ho wena, tseo o kileng wa rohaka ka baka la tsona, wa di bolela ke le teng, bona, tjhelete tseo di ho nna; ke nna ke neng ke di nkile. Mmae a re ho yena: Mora ka a ke a hlohonolofatswe ke Jehova! 3Eitse hobane a busetse ho mmae shekele tseo tse sekete se nang le lekgolo, mmae a re: Ke kgethela Jehova ditjhelete tseo ka letsoho la ka, hore ka tsona ho etsetswe mora ka setshwantso se betlilweng le setshwantsho se tsholotsweng; ka ho etsa hoo, ke tla di busetsa ho wena. 4Mika a busetsa tjhelete tseo ho mmae, mme mmae a nka dishekele tse makgolo a mabedi, a di nea setsholli; sa di etsa setshwantsho se betlilweng le setshwantsho se tsholotsweng, mme tsa dula tlung ya Mika. 5Monna eo, Mika, o ne a na le ntlo ya modimo; a iketsetsa le efoda le diterafime, mme a kgetha e mong wa bara ba hae, a mmea moprista wa hae.

6Mehleng eo, ho ne ho se morena Iseraeleng; e mong le e mong o ne a iketsetsa kamoo a ratang kateng.

7Ho ne ho na le mohlankana wa Bethlehema-Juda, wa leloko la Juda, e le Molevi, a aheletse hona teng. 8Monna eo a falla motseng wa Bethlehema-Juda, ho ya jaka moo a ka fumanang sebaka teng. A re a sa le leetong la hae, a fihla ha Mika, thabeng ya Efraime. 9Mika a re ho yena: O tswa kae? A re ho yena: Ke Molevi wa Bethlehema-Juda, ke ya jaka moo nka fumanang sebaka teng. 10Mika a re ho yena: Dula le nna, o be ntate le moprista wa ka; nna, ke tla o nea dishekele tse leshome ka selemo se seng le se seng, le diaparo tsa hao le dijo tsa hao. 11Yaba Molevi o kena teng. Molevi a dumela ho dula le monna eo, mme mohlankana eo a ba ho yena jwaloka hoja eka ke e mong wa bara ba hae. 12Mika a bea Molevi, mme mohlankana eo ya eba moprista wa hae, a dula tlung ya Mika. 13Mika a re: Jwale, ke a tseba hobane Jehova o tla nketsa hantle, hobane ke na le moprista wa Molevi.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index