Search form

DILLO TSA JEREMIA 5

Ditsietsi tsa jwale le kgopolo e bohloko ya tse fetileng.

1Hopola, Jehova, seo re hlahetsweng ke sona; tadima, o bone sekgobo sa rona. 2Lefa la rona le ile ho baditjhaba, le matlo a rona ho basele. 3Re entswe dikgutsana tse se nang ntata tsona, bomma rona ba jwaloka bahlolohadi. 4Re nwa metsi a rona ka tjhelete, patsi ya rona re e bona ka theko. 5Re phallelwa habohloko, re kgathetse, mme ha ho phomolo ho rona. 6Re otlolletse matsoho a rona ho Baegepeta le ho Baassiria ho bona bohobe. 7Bontata rona ba sitilwe, ba se ba le siyo, mme rona re jere makgopo a bona. 8Re buswa ke makgoba, ha ho ya re namolelang matsohong a bona. 9Re bokella bohobe ba rona ka ho ipeela lefung pela lerumo la lefeella. 10Letlalo la rona le tlabohile ke bohale ba tlala, jwaloka leifo.

11Ba betile basadi Sione, le barwetsana metseng ya Juda. 12Marena a mang a fanyehwa ke matsoho a bona, sefahleho sa baholo ha se a ka sa hlonephuwa. 13Bahlankana ba jarisitswe malwala, ba batjha ba imetswe ke diphahlo tsa dipatsi. 14Baholo ba hladile lekgotla, bahlankana ba tlohetse dipina tsa bona. 15Thabo ya dipelo tsa rona e fedile, pina ya rona e fetohile mahlomola. 16Moqhaka o wele dihloohong tsa rona; ho madimabe rona, hobane re sitilwe. 17Ka baka leo, dipelo tsa rona di a fela, ka baka la tseo mahlo a rona a fifetse. 18Thaba ya Sione e senyehile, diphokojwe di itsamaela teng.

19Wena, Jehova, o busa ka ho sa feleng, terone ya hao e teng kamehla le mehla. 20Na o ka re lebala ka ho sa feleng? Na o ka re hloboha ka ditshiu tse telele na? 21O re sokollele ho wena, Jehova, etlaba, re sokolohile; o ntjhafatse ditshiu tsa rona, di be jwaloka mehleng ya pele. 22Na o re lahletse ruri na? Na o re hlonametse ka ho fetisa na?

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index