Search form

LEVITIKE 9

Aarone le bara ba hae ba qala ho hlaba mahlabelo.

1Ka letsatsi la boroba meno e le mmedi, Moshe a bitsa Aarone, le bara ba hae, le baholo ba Iseraele, a re ho Aarone: 2Nka pohwana e be sehlabelo sa sebe, le pheleu ya setjheso, di hloka sekodi tse pedi, mme o di hlabe pela Jehova. 3O tla bolella bana ba Iseraele, o re: Nkang phooko ya sehlabelo sa sebe; le nke le namane le konyana tsa setjheso, e be tse lemo se le seng, tse hlokang sekodi; 4le nke le kgomo le pheleu tsa sehlabelo sa teboho, tse tla hlajwa pela Jehova; le nke le nyehelo e dubilweng ka ole; hobane kajeno, Jehova o tla iponahatsa ho lona.

5Yaba ba tlisa monyako wa tente ya pokano tseo Moshe a di laetseng; phutheho kaofela ya atamela, ya ema pela Jehova. 6Moshe a re: Ke tseo Jehova a di laetseng; di etseng, mme kganya ya Jehova e tla iponahatsa ho lona. 7Moshe a re ho Aarone: Atamela pela aletare, o etse sehlabelo sa hao sa sebe, le setjheso sa hao; o etse le pheko ya hao le ya setjhaba; o etse le setjheso sa setjhaba, le pheko bakeng sa sona, kamoo Jehova a laetseng kateng.

8Yaba Aarone o atamela pela aletare, mme namane a e hlabela sehlabelo sa sebe. 9Bara ba Aarone ba mo tlisetsa madi; a qopetsa monwana wa hae mading, a a bea manakeng a aletare; a ntoo tshollela fatshe aletareng madi a setseng. 10Mafura, le diphio, le mafura a kguto a katlasa sebete, a sehlabelo sa sebe, a a tjhesa aletareng, kamoo Jehova a neng a laetse Moshe kateng. 11Nama le letlalo a di tjhesetsa kantle ho diahelo.

12A ntoo hlaba setjheso; bara ba Aarone ba mo tlisetsa madi, mme a a tshollela aletareng ka nqa tsohle. 13Ba mo hlahisetsa setjheso se diretsweng ka dikarolo tsa sona, le hlooho, mme a di tjhese aletareng. 14A hlatswa diteng le ditlhako, mme a di tjhesa hodima setjheso, aletareng.

15A ntoo hlahisa sehlabelo sa setjhaba; a nka phooko ya sehlabelo sa sebe sa setjhaba; a e hlaba, a e etsa sehlabelo sa sebe, kamoo a neng a entse sa pele kateng. 16A etsa setjheso, mme a ya ka molao wa teng. 17A hlahisa nyehelo, a qotsa ho yona ka seatla, a e tjhesa aletareng kantle ho setjheso sa hosasa. 18A hlaba kgomo le pheleu, e be sehlabelo sa teboho bakeng sa setjhaba; bara ba Aarone ba mo tlisetsa madi, mme a a tshollela aletareng ka nqa tsohle. 19Ba mo tlisetsa le mafura a kgomo le a pheleu, mohatla, le mohlehlo, le diphio, le mafura a kguto a katlasa sebete; 20ba bea mafura hodima difuba, mme a tjhesa mafura aletareng. 21Aarone a tsokotsa difuba tseo le letsoho le letona pela Jehova, e le kabelo e tsokotswang, kamoo Jehova a neng a laetse Moshe kateng.

22Aarone a otlollela matsoho a hae ka nqa setjhabeng, a se hlohonolofatsa; a ntoo theoha ha a se a qetile sehlabelo sa sebe, le setjheso, le sehlabelo sa teboho.

23Moshe le Aarone ba kena tenteng ya pokano, mme ha ba etswa ho yona, ba hlohonolofatsa setjhaba. Yaba kganya ya Jehova e iponahatsa ho setjhaba kaofela. 24Ha tswa mollo pontsheng ya Jehova, wa tjhesa setjheso le mafura aletareng; setjhaba kaofela sa ba sa bona, mme batho ba tshela mehoo ya thabo, ba wela fatshe ka difahleho.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index