Search form

NUMERE 10

Diterompeta tse pedi tsa silefera.

1Yaba Jehova o bua le Moshe, a re: 2O iketsetse diterompeta tse pedi tsa silefera. O di etse ka silefera e teilweng. Di tla o thusa ho mema phutheho le ho laela makgotla hore a tlohe. 3Etlare ha di letswa, phutheho yohle e tla bokana ho wena monyako wa tente ya pokano. 4Ha ho letswa e le nngwe feela, marena, e leng dihlooho tsa dikete tsa Iseraele, a tla phuthehela ho wena. 5Etlare ha le di letsa haholo, makgotla a ka nqa botjhabela a tla tloha. 6Etlare ha le boela le di letsa haholo la bobedi, makgotla a ka nqa borwa a tla tloha; di tla letswa haholo hore makgotla a tlohe. 7Etlare ha le mema phutheho, le tla di letsa, empa e seng ka modumo o moholo. 8Bara ba Aarone, baprista, ba tla letsa diterompeta; ke taelo e sa feleng ho lona le ho meloko ya lona. 9Etlare ha le eya ntweng fatsheng la lona, le ya lwantsha dira tse le qalang, le tla letsa diterompeta haholo, mme le tla hopolwa pela Jehova, Modimo wa lona, mme le tla namolelwa matsohong a dira tsa lona. 10Matsatsing a lona a ho thaba, mohla mekete ya lona, le thwasong ya dikgwedi tsa lona, le tla letsa diterompeta, le ntse le hlahisa ditjheso tsa lona, le mahlabelo a lona a teboho, mme le tla hopolwa jwalo pela Modimo wa lona. Ke nna Jehova, Modimo wa lona.

Baiseraele ba tloha Sinai.

11Ka tsatsi la mashome a mabedi la kgwedi ya bobedi, ka selemo sa bobedi, leru la phahama, la tloha tabernakeleng ya bopaki; 12bana ba Iseraele ba tloha lefeelleng la Sinai, ka lenaneo la ho tsamaya leo ba neng ba le laetswe; mme leru la ema lefeelleng la Parane. 13Ya eba hona ba qalang ho tloha ka taelo ya Jehova, eo ba e neilweng ka Moshe.

14Folaga ya ntlo ya bana ba Juda ya tloha pele: ba tloha ka makgotla a bona; lekgotla la Juda le ne le laolwa ke Nasone, mora Amminadabe; 15lekgotla la leloko la bana ba Issaskare le ne le laolwa ke Nethaneele, mora Tsuare; 16lekgotla la leloko la bana ba Sabulone le ne le laolwa ke Eliabe, mora Helone.

17Tabernakele ya qhaqhollwa: yaba bara ba Gershone le bara ba Merari ba tloha, ba jere tabernakele.

18Yaba folaga ya ntlo ya Rubene e a tloha; ba tloha ka makgotla a bona; lekgotla la Rubene le ne le laolwa ke Elitsure, mora Shedeure; 19lekgotla la leloko la bana ba Simeone le ne le laolwa ke Shelumiele, mora Tsurishaddai; 20lekgotla la leloko la bana ba Gade le ne le laolwa ke Eliasafe, mora Deuele.

21Bakehathe ba tloha le bona, ba jere dintho tse kgethehileng; mme ho ne ho emiswa tabernakele, ba ntse ba lebeletswe ho fihla.

22Yaba folaga ya ntlo ya bana ba Efraime e a tloha; ba tloha ka makgotla a bona; lekgotla la Efraime le ne le laolwa ke Elishama, mora Ammihude; 23lekgotla la leloko la bana ba Manasse le ne le laolwa ke Gamaliele, mora Pedahtsure; 24lekgotla la leloko la bana ba Benjamine le ne le laolwa ke Abidane, mora Gideoni.

25Yaba ho tloha folaga ya ntlo ya bana ba Dane; ba tloha ka makgotla a bona, e le serao sa makgotla kaofela; lekgotla la bona le ne le laolwa ke Akiesere, mora Ammishaddai; 26lekgotla la leloko la bana ba Asere le ne le laolwa ke Pagiele, mora Okrane; 27lekgotla la leloko la bana ba Nefthali le ne le laolwa ke Akira, mora Enane.

28Ke lona lenaneo leo bana ba Iseraele ba tsamaileng ka lona, ka makgotla a bona; ba tloha jwalo.

29Moshe a re ho Hobabe mora Reuele, Momidiane, mohwehadi wa Moshe: Re a tloha, re ya sebakeng seo Jehova a itseng: Ke tla le nea sona. Tloo le rona; re tla o etsa hantle; hobane Jehova o itse o tla etsa Iseraele hantle. 30A mo arapa, a re: Nke ke ka ya, empa ke tla kgutlela lefatsheng la heso, le ho banabeso. 31Mme Moshe a re: Ke a o rapela, o se ke wa re tlohela, hobane o tseba moo re tla emisa teng feelleng, mme o tla ba mahlo a rona. 32Ha o etla le rona, molemo ofe le ofe oo Jehova a tla re etsetsa wona, le rona re tla o etsetsa wona.

33Ba tloha thabeng ya Jehova; ba tsamaya ka matsatsi a mararo; mme areka ya selekane sa Jehova ya ba etella pele sebaka sa matsatsi a mararo, e ba batlele moo ba tla phomola teng.

34Enere ha ba tloha moo ba neng ba emisitse teng, leru la Jehova le ne le le hodima bona motshehare. 35Ha areka e ne e tloha, Moshe o ne a re: Raoha, Jehova; dira tsa hao a di ke di qhalwe! mme ba o hloileng, a ba ke ba balehe pela sefahleho sa hao! 36Mme ha areka e ne e ema, o ne a re: Jehova, kgutlela diketeketeng tsa dikete tsa Iseraele!

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index