Search form

NUMERE 2

Molao wa ho emisa diahelo.

1Jehova a bua le Moshe le Aarone, a re: 2Bana ba Iseraele ba tla hloma ditente tsa bona mabapa le difolaga tsa matlo a bontata bona, e mong le e mong haufi le folaga ya hae. Ba tla di hloma ba teetse tente ya pokano hare, malebana le yona.

3Ka nqa botjhabela, pela tente, ho hlongwe folaga ya ntlo ya Juda, ka lekgotla la yona; ke morena wa banna ba Juda, Nasone, mora Amminadabe, 4le lekgotla la hae, ka ba ngotsweng ba bona, bana ba dikete tse mashome a supileng a metso e mene, tse nang le makgolo a tsheletseng. 5Pela hae, ho hlome ba leloko la Issaskare; ke morena wa banna ba Issaskare, Nethaneele, mora Tsuare, 6le lekgotla la hae, ka ba ngotsweng ba hae, banna ba dikete tse mashome a mahlano a metso e mene, tse nang le makgolo a mane; 7le ba leloko la Sabulone, e leng morena wa bana ba Sabulone, Eliabe, mora Helone, 8le lekgotla la hae, ka ba ngotsweng ba hae, banna ba dikete tse mashome a mahlano a metso e supileng, tse nang le makgolo a mane. 9Bongata jwa ba ngodilweng, ba diahelo tsa ntlo ya Juda, ya eba dikete tse lekgolo le le leng le nang le mashome a robileng meno e le mmedi a metso e tsheletseng, tse nang le makgolo a mane, ka palo ya makgotla a bona. Ke bona ba tla tloha pele.

10Ka nqa borwa, ho hlongwe folaga ya ntlo ya Rubene, ka makgotla a yona; ke morena wa bana ba Rubene, Elitsure, mora Shedeure, 11le lekgotla la hae, ka ba ngotsweng ba hae, ba dikete tse mashome a mane a metso e tsheletseng, tse nang le makgolo a mahlano. 12Pela hae, ho hlome ba leloko la Simeone; ke morena wa bana ba Simeone, Shelumiele, mora Tsurishaddai, 13le lekgotla la hae, ka ba ngotsweng ba hae, ba kete tse mashome a mahlano a metso e robileng mono o le mong, tse nang le makgolo a mararo; 14le ba leloko la Gade; ke morena wa bana ba Gade, Eliasafe, mora Reuele, 15le lekgotla la hae, ka ba ngotsweng ba hae, ba kete tse mashome a mane a metso e mehlano, tse nang le makgolo a tsheletseng a nang le mashome a mahlano. 16Bongata jwa ba ngodilweng, ba diahelo tsa ntlo ya Rubene, ya eba dikete tse lekgolo le le leng le nang le mashome a mahlano a motso o mong, tse nang le makgolo a mane a nang le mashome a mahlano, ka palo ya makgotla a bona. Ke bona ba tlang ho tloha ba bobedi.

17Jwale, ho ntoo tloha tente ya pokano le Balevi, ba le mahareng a matlo a mang; ba tla tsamaya ka mokgwa oo ba emisang ka wona, e mong le e mong ka ho boloka baka sa hae, tlasa folaga ya habo.

18Ka nqa bophirimela, ho hlongwe folaga ya ntlo ya Efraime, ka makgotla a yona; ke morena wa bana ba Efraime, Elishama, mora Ammihude, 19le lekgotla la hae, ka ba ngotsweng ba hae, ba dikete tse mashome a mane, tse nang le makgolo a mahlano. 20Pela hae, ho hlome ba leloko la Manasse; ke morena wa bana ba Manasse; Gamaliele, mora Pedahtsure, 21le lekgotla la hae, ka ba ngotsweng ba hae, ba kete tse mashome a mararo a metso e mmedi, tse nang le makgolo a mabedi; 22le ba leloko la Benjamine; ke morena wa bana ba Benjamine Abidane, mora Gideoni, 23le lekgotla la hae, ka ba ngotsweng ba hae, ba kete tse mashome a mararo a metso e mehlano, tse nang le makgolo a mane. 24Bongata jwa ba ngodilweng, ba diahelo tsa ntlo ya Efraime, ya eba dikete tse lekgolo le le leng le metso e robileng meno e le mmedi, tse nang le lekgolo le le leng, ka palo ya makgotla a bona. Ke bona ba tlang ho tloha ba boraro.

25Ka nqa leboya, ho hlongwe folaga ya ntlo ya Dane, ka makgotla a yona; ke morena wa bana ba Dane, Akiesere, mora Ammishaddai, 26le lekgotla la hae, ka ba ngotsweng ba hae, ba kete tse mashome a tsheletseng a metso e mmedi tse nang le makgolo a supileng. 27Ba tlang ho hloma pela hae, ke ba leloko la Asere; ke morena wa bana ba Asere, Pagiele, mora Okrane, 28le lekgotla la hae, ka ba ngotsweng ba hae, ba kete tse mashome a mane a motso o mong, tse nang le makgolo a mahlano; 29le ba leloko la Nefthali; ke morena wa bana ba Nefthali, Akira, mora Enane, le lekgotla la hae, ka ba ngotsweng ba hae, ba kete tse mashome a mahlano a metso e meraro, tse nang le makgolo a mane. 30Bongata jwa ba ngodilweng, ba diahelo tsa ntlo ya Dane, ya eba dikete tse lekgolo le le leng le nang le mashome a mahlano a metso e supileng, tse nang le makgolo a tsheletseng. 31Ke bona ba tlang ho tloha ba ho qetella le difolaga tsa bona.

32Ke bona bao bana ba Iseraele, ba kileng ba ngolwa ka matlo a bontata bona. Bongata jwa ba ngodilweng ba matlo ao, ka makgotla a bona, ya eba dikete tse makgolo a tsheletseng a metso e meraro, tse nang le makgolo a mahlano a mashome a mahlano. 33Empa Balevi ha ba ka ba ngollwa hara bana ba Iseraele, kamoo Jehova a neng a laetse Moshe kateng. 34Bana ba Iseraele ba etsa tsohle kamoo Jehova a di laetseng Moshe kateng. Ba ne ba emisa jwalo mabapa le difolaga tsa bona, mme ba ne ba tloha jwalo, e mong le e mong ka ntlo ya hae le ka ntlo ya bontatae.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index