Search form

NUMERE 20

Ho shwa ha Miriame. — Metsi a Meriba. — Kotlo ya Moshe. — Ho shwa ha Aarone.

1Phutheho yohle ya bana ba Iseraele ya fihla lefeelleng la Tsine ka kgwedi ya pele, mme setjhaba sa emisa Kadeshe. Miriame a shwela teng, mme a epelwa teng.

2Ho ne ho se metsi teng a ka nowang ke phutheho; yaba e lwantsha Moshe le Aarone. 3Ba tsekisa Moshe, ba re: Hoja ra timela mohla banababo rona ba timelang pela Jehova! 4Na ke ka baka lang le tlisitseng phutheho ya Jehova lefeelleng lena, hore re shwele teng, rona le makgomo a rona? 5Na ke ka baka lang le re ntshitseng Egepeta, la re tlisa bakeng sena se sebe na? Hase naha eo re ka e lemang, ha ho difate tsa feiye ho yona, leha e le tsa morara, leha e le tsa garanata, leha e le metsi a ka nowang.

6Moshe le Aarone ba tloha phuthehong, ba ya monyako wa tente ya pokano. Ba wa ka difahleho tsa bona; mme kganya ya Jehova ya ba hlahela.

7Jehova a bua le Moshe, a re: 8Nka lere la hao, mme le bitse phutheho, wena le ngwaneno Aarone; le tla bua le lefika pontsheng ya bona, mme ho tla tswa metsi ho lona; o tla ba ntshetsa metsi lefikeng, mme o tla nosa phutheho le dintho tsa yona. 9Yaba Moshe o nka lere la hae le neng le le pela Jehova, jwalokaha Jehova a mo laetse. 10Moshe le Aarone ba biletsa phutheho pela lefika. 11Moshe a re: Mamelang he, lona bahanyetsi! A hleka re tla le ntshetsa metsi lefikeng lena na? Moshe a ntoo emisa letsoho la hae, a otla lefika habedi ka lere la hae. Metsi a tswa a le mangata; batho ba enwa le tsona dintho tsa bona.

12Yaba Jehova o re ho Moshe: Kahobane le sa ka la dumela ho nna, la nkgalaletsa mahlong a bana ba Iseraele, le ke ke la finyeletsa phutheho ena lefatsheng leo ke le neileng lona.

13Ke wona metsi a Meriba, moo bana ba Iseraele ba hanyeditseng Jehova; ke hona moo a ikgalaleditseng ka ho bona.

14Moshe ha a le Kadeshe, a romela manqosa ho morena wa Edomo, a re ho yena: Ho itswe ke ngwaneno Iseraele: O tseba mahlomola wohle ao re bileng le wona. 15Bontata rona ba ne ba theohele Egepeta, mme ra dula teng halelele. Empa Baegepeta ba re tubile, rona le bontata rona. 16Ra howeletsa ho Jehova, a utlwa lentswe la rona. A roma lengeloi, mme a re ntsha Egepeta. Bona, re se re le Kadeshe, motse o pheletsong ya naha ya hao. 17O re dumelle ho feta ka naha ya hao; re ke ke ra tsamaya hara masimo, leha e le hara merara, mme re ke ke ra nwa metsi a didiba tse tjhekilweng; re tla ya ka mmila o phatlaletseng, re sa kgelohele ho le letona, kapa ho le letshehadi, ho fihlela re etswa meeding ya hao. 18Edomo a re: O ke ke wa ba wa feta ha ka; ha o ka leka, ke tla tswa, ke o kgahlanyetse ka lerumo. 19Bana ba Iseraele ba re ho yena: Re tla nyoloha ka mmila o phatlaletseng; ha nna le mehlape ya ka re ka nwa metsi a hao, ke tla a lefa; ha ho ho hong, haese hore ke fete ka maoto a ka. 20A fetola, a re: O ke ke wa ba wa feta. Jwale Edomo a tswa ho mo kgahlanyetsa ka batho ba bangata le ka letsoho le matla. 21Edomo a hana jwalo ho dumella bana ba Iseraele ho feta naheng ya hae. Yaba Iseraele o a kgeloha.

22Phutheho yohle ya bana ba Iseraele ya tloha Kadeshe, ya tla thabeng ya Hore. 23Mme moo, thabeng ya Hore, moeding wa naha ya Edomo, Jehova a re ho Moshe le Aarone: 24Aarone o sa ya orosetswa ho ba tjhaba sa hae; hobane a ke ke a kena fatsheng leo ke le neang bana ba Iseraele, ka baka la hobane le kile la hanyetsa taelo ya ka metsing a Meriba. 25Nka Aarone le mora hae Eleasare, mme o ba nyolosetse thabeng ya Hore. 26O tla hlobodisa Aarone dikobo tsa hae, o di apese Eleasare, mora hae. 27Ke moo Aarone a tla shwela teng, a orohe. Moshe a etsa tseo Jehova a mo laetseng tsona. Ba nyolohela thabeng ya Hore mahlong a phutheho kaofela. 28Moshe a hlobodisa Aarone dikobo tsa hae, a di apesa Eleasare, mora hae. Aarone a shwela moo, qhoweng ya thaba. Mme Moshe le Eleasare ba theoha thabeng. 29Phutheho yohle ha e bona hoba Aarone o shwele, ntlo yohle ya Iseraele ya llela Aarone ka matsatsi a mashome a mararo.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index