Search form

NUMERE 28

Dinako tsa ho etsa mahlabelo.

1Jehova a bua le Moshe, a re: 2Laela bana ba Iseraele, o re ho bona: Sehlabelo sa ka le sejo sa ditjheso tsa ka tse nang le monko o monate ho nna, le bone hore le ntlhahisetse tsona ka nako ya tsona.

3Ere ho bona: Ke sena setjheso seo le tla se hlahisetsa Jehova: Ka tsatsi le leng le le leng le tla hlahisa dikonyana tse tona tse pedi tse se nang sekodi, tse lemo se le seng, e nne e be setjheso sa kamehla. 4O tla hlaba konyana e nngwe hosasa, e nngwe mantsiboya; 5nyehelo e be ya boshome ba efa ya lefi la phofo le dubilweng tekanyong ya bone ya hine ya ole e hlwekileng. 6Ke setjheso sa kamehla se nnileng sa hlahiswa thabeng ya Sinai; ke sehlabelo se tjheswang ka mollo, se monko o monate ho Jehova. 7Tshelo e tla ba ya karolo ya bone ya hine hodima konyana ya hosasa; tshelo ya veine e hlwekileng o tla e etsetsa Jehova nqalong e halalelang. 8O tla hlaba konyana ya bobedi mantsiboya, e ena le nyehelo le tshelo tse jwaloka tsa hosasa; ke sehlabelo se tjheswang ka mollo, se monko o monate ho Jehova.

9Ka tsatsi la Sabatha, le tla hlaba konyana tse tona tse pedi tse lemo se le seng, tse se nang sekodi; le tla hlahisa nyehelo ya boshome ba bobedi ba efa ya lefi la phofo le dubilweng ka ole, le yona tshelo ya yona. 10Ke sona setjheso sa Sabatha, sa Sabatha e nngwe le e nngwe, kantle ho setjheso sa kamehla le tshelo ya sona.

11Qalong ya dikgwedi tsa lona, le tla hlahisetsa Jehova setjheso sa dipohwana tse pedi, le pheleu e le nngwe, le dikonyana tse tona tse supileng tse lemo se le seng, tse se nang sekodi; 12le nyehelo ya pohwana e nngwe le e nngwe, e leng karolo tse tharo tsa boshome ba lefi la phofo le dubilweng ka ole; 13le nyehelo ya pheleu, e leng karolo tse pedi tsa boshome ba lefi la phofo le dubilweng ka ole; le nyehelo ya konyana e nngwe le e nngwe, e leng karolo e le nngwe ya boshome ba lefi la phofo le dubilweng ka ole. Ke setjheso, ke sehlabelo se tjheswang ka mollo, se monko o monate ho Jehova. 14Ditshelo e tla ba halofo ya hine ka pohwana; le karolo ya boraro ya hine ka pheleu; le karolo ya bone ya hine ka konyana. Ke sona setjheso sa qalo ya kgwedi, sa kgwedi e nngwe le e nngwe, sa dikgwedi tsohle tsa selemo. 15Ho tla hlabelwa Jehova phooko, e be sehlabelo sa sebe, kantle ho setjheso sa kamehla le tshelo ya sona.

16Ka kgwedi ya pele, ka tsatsi la leshome le metso e mene la kgwedi, e tla ba Paseka ya Jehova. 17Ka tsatsi la leshome le metso e mehlano la kgwedi, mokete o tla ba teng. Ka matsatsi a supileng ho tla jewa mahobe a se nang ditomoso. 18Ka tsatsi la pele, le tla ba le phutheho e kgethehileng; le ke ke la etsa mosebetsi le o mong ka lona. 19Le tla etsetsa Jehova sehlabelo se tjheswang ka mollo, e be setjheso, ka pohwana tse pedi, le pheleu, le dikonyana tse tona tse supileng tse se nang sekodi, tse lemo se le seng. 20Le tla di ekeletsa ka nyehelo ya lefi la phofo le dubilweng ka ole, e ba karolo tse tharo tse boshome ka pohwana, le karolo tse pedi tsa boshome ka pheleu, 21le karolo e le nngwe ya boshome ka konyana e nngwe le e nngwe ya tse supileng. 22Le tla hlaba phooko, e be sehlabelo sa sebe, le tle le etsetswe pheko. 23Le tla hlahisa mahlabelo ao, kantle ho setjheso sa hosasa, e leng setjheso sa kamehla. 24Le tla a hlahisa ka tsatsi le leng le le leng, ka matsatsi a supileng, e be sejo sa sehlabelo se tjheswang ka mollo, se monko o monate ho Jehova. 25Di tla hlahiswa kantle ho setjheso sa kamehla le tshelo ya sona. Ka tsatsi la bosupa, le tla ba le phutheho e kgethehileng, mme le ke ke la etsa mosebetsi le o mong ka tsatsi leo.

26Ka tsatsi la dithakangwaha, ha le hlahisetsa Jehova nyehelo e ntja, e leng ka mokete wa lona wa diveke, le tla ba le phutheho e kgethehileng; le ke ke la etsa mosebetsi le o mong ka lona. 27Le tla hlahisa, e be setjheso se monko o monate ho Jehova, dipohwana tse pedi, le pheleu, le dikonyana tse tona tse supileng tse lemo se le seng. 28Le tla di ekeletsa ka nyehelo ya lefi la phofo le dubilweng ka ole, e be karolo tse tharo tsa boshome ka poho, le karolo tse pedi tsa boshome ka pheleu, 29le karolo e le nngwe ya boshome ka konyana e nngwe le e nngwe ya tse supileng. 30Le tla hlaba phooko, le tle le etsetswe pheko. Le tla hlahisa mahlabelo ao, kantle ho ditjheso tsa kamehla le dinyehelo tsa tsona. 31Konyana tsa lona le tla kgetha tse se nang sekodi, mme le tla hlahisa le ditshelo tsa tsona.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index