Search form

NUMERE 33

Maeto a Baiseraele haesale ba tloha Egepeta, ho tla fihla mahwatateng a Moabe.

1Ke ana maeto a bana ba Iseraele haesale ba etswa naheng ya Egepeta, ka makgotla a bona a neng a tsamaiswa ke Moshe le Aarone. 2Moshe a ngola maeto a bona ho tloha nqalong e nngwe ho isa ho e nngwe ka taelo ya Jehova. Ke ana maeto a bona, kamoo ba tsamaileng kateng:

3Ba tloha Ramsese ka kgwedi ya pele, ka tsatsi la leshome le metso e mehlano la kgwedi ya pele. Ka tsatsi le hlahlamang la Paseka, bana ba Iseraele ba tswa ka matla pontsheng ya Baegepeta kaofela, 4ha Baegepeta ba ntse ba epela matsibolo wohle, ao Jehova a a bolaileng hara bona, mohla Jehova a neng a hlahise dikahlolo hodima medimo ya bona.

5Bana ba Iseraele ba tloha Ramsese, ba emisa Sukkothe. 6Ba tloha Sukkothe, ba emisa Ethame, pheletsong ya lefeella. 7Ba tloha Ethame, ba kgelohela nqa Pi-Hahirothe, malebana le Baale-Tsefone, mme ba emisa pela Migdole. 8Ba tloha Pi-Hahirothe, ba fetela ka nqa lefeelleng ba tshetse lewatle; ba tsamaya matsatsi a mararo feelleng la Ethame, ba emisa Mara. 9Ba tloha Mara, ba fihla Elime; teng, Elime, ho ne ho le didiba tse leshome le metso e mmedi tsa metsi, le difate tsa dipalema tse mashome a supileng; mme ba emisa teng. 10Ba tloha Elime, ba emisa pela Lewatle le Lefubedu. 11Ba tloha Lewatleng le Lefubedu, ba emisa feelleng la Sine. 12Ba tloha feelleng la Sine, ba emisa Dofka. 13Ba tloha Dofka, ba emisa Alushe. 14Ba tloha Alushe, ba emisa Refidime, moo setjhaba se sa kang sa fumana metsi a ho nwa. 15Ba tloha Refidime, ba emisa feelleng la Sinai.

16Ba tloha feelleng la Sinai, ba emisa Kibrothe-Hattaava. 17Ba tloha Kibrothe-Hattaava, ba emisa Hatserothe. 18Ba tloha Hatserothe, ba emisa Rithma. 19Ba tloha Rithma, ba emisa Rimmone-Peretse. 20Ba tloha Rimmone-Peretse, ba emisa Libna. 21Ba tloha Libna, ba emisa Rissa. 22Ba tloha Rissa, ba emisa Kehelatha. 23Ba tloha Kehelatha, ba emisa thabeng ya Shafere. 24Ba tloha thabeng ya Shafere, ba emisa Harada. 25Ba tloha Harada, mme ba emisa Makhelothe. 26Ba tloha Makhelothe, ba emisa Takathe. 27Ba tloha Takathe, ba emisa Tara. 28Ba tloha Tara, ba emisa Mithka. 29Ba tloha Mithka, ba emisa Hashmona. 30Ba tloha Hashmona, ba emisa Moserothe. 31Ba tloha Moserothe, ba emisa Bene-Jaakane. 32Ba tloha Bene-Jaakane, mme ba emisa Hore-Hagidgade. 33Ba tloha Hore-Hagidgade, ba emisa Jothbatha. 34Ba tloha Jothbatha, ba emisa Abrona. 35Ba tloha Abrona, ba emisa Etsione-Gebere. 36Ba tloha Etsione-Gebere, ba emisa feelleng la Tsine; ke Kadeshe.

37Ba tloha Kadeshe, ba emisa thabeng ya Hore, pheletsong ya lefatshe la Edomo. 38Moprista Aarone a nyolohela thabeng ya Hore, ka taelo ya Jehova; a shwela teng, ka tsatsi la pele la kgwedi ya bohlano, ka selemo sa mashome a mane sa ho tswa ha bana ba Iseraele naheng ya Egepeta. 39Mohla Aarone a shwang thabeng ya Hore, o ne a ena le dilemo tse lekgolo le le leng le nang le mashome a mabedi a metso e meraro.

40Morena Arade, Mokanana, ya neng a ahile naheng ya Kanana, ka nqa borwa, a utlwa hore bana ba Iseraele ba ya fihla.

41Ba tloha thabeng ya Hore, ba emisa Tsalmona. 42Ba tloha Tsalmona, ba emisa Punone. 43Ba tloha Punone, ba emisa Obothe. 44Ba tloha Obothe, ba emisa Ije-Abarime, moeding wa Moabe. 45Ba tloha Ije-Abarime, ba emisa Dibone-Gade. 46Ba tloha Dibone-Gade, ba emisa Almone-Diblathaime. 47Ba tloha Almone-Diblathaime, ba emisa thabeng tsa Abarime, pela Nebo. 48Ba tloha thabeng tsa Abarime, ba emisa mahwatateng a Moabe, pela Jordane, mabapa le Jeriko. 49Ba emisa pela Jordane, ho tloha Bethe-Jeshimothe ho isa Abele-Sittime, mahwatateng a Moabe.

50Jehova a bua le Moshe mahwatateng a Moabe, pela Jordane, mabapa le Jeriko, 51a re: Bolella bana ba Iseraele, o re ho bona: Etlare hobane le tshele Jordane, mme le kene naheng ya Kanana, 52le tla lelekisa pela lona baahi bohle ba naha, le senye ditshwantsho tsohle tsa bona tsa majwe, le senye ditshwantsho tsohle tsa bona tse tsholotsweng, mme le senye dinqalo tsohle tsa bona tse diphahameng. 53Le tla hapa naha, mme le tla ikahela ho yona; hobane ke le neile naha, e tle e be leruo la lona. 54Le tla arolelana naha ka lotho, ka palo ya matlo a lona: ba leng bangata, le tla ba nea karolo e kgolo, mme ba seng bakae le tla ba nea karolo e nyenyane. E mong le e mong o tla rua seo a se abetsweng ke lotho, mme le tla se amohela, e be lefa la lona ka meloko ya bontata lona. 55Empa ha le sa lelekise baahi ba naha pela lona, bao le ba tlohetseng ba tla ba jwaloka meutlwa mahlong a lona, le ditsenene mahlakoreng a lona; ba tla le patisa naheng eo le ikahelang ho yona. 56Se tlang ho etsahala, ke hoba ke tla etsa lona seo ke neng ke rerile ho ba etsa sona.

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index