Search form

DIPESALEME 105

Thoko e rokang Modimo kamoo o sireleditseng setjhaba sa wona kateng mehleng ya boholoholo.

1Rorisang Jehova, le rapele lebitso la hae; tsebisang diketso tsa hae hara ditjhaba. 2Mo roriseng ka dipina tsa lona, le nahane mehlolo ya hae kaofela! 3Ithoriseng ka lebitso la hae le halalelang; pelo tsa ba batlang Jehova a di ke di thabe! 4Batlang Jehova le matla a hae, le batle sefahleho sa hae kamehla! 5Hopolang mehlolo ya hae eo a e entseng, le meeka ya hae, le dikahlolo tse tswileng molomong wa hae, 6lona, lesika la Abrahama, mohlanka wa hae; lona, bana ba Jakobo, bakgethwa ba hae!

7Jehova ke yena Modimo wa rona; dikahlolo tsa hae di aparela lefatshe lohle. 8O hopola selekane sa hae ka ho sa yeng kae, le lentswe leo a le laoletseng meloko e sekete: 9e leng selekane seo a neng a se hlabe le Abrahama, le kano eo a neng a e ane ho Isaaka, 10eo a kileng a e etsa komelo e tiileng ho Jakobo, le selekane se sa feleng ho Iseraele, 11a re: Ke tla o nea lefatshe la Kanana, e be kabelo ya lefa la lona. 12Enere ba eso ho be bakae, ba sa fokotse, e sa le basele, ho lona, 13ba ntse ba sepela le ditjhaba le mebuso le merabe, 14ha a ka a lesa motho ho ba tuba, a laela marena ka baka la bona, a re: 15Se ameng batlotsuwa ba ka, le se ke la etsa baporofeta ba ka hampe.

16Yaba o biletsa naha eo tlala, a honyetsa kotlo yohle ya bohobe. 17A romela motho ho ba etella pele; Josefa a rekelwa ho ba mofo ya ruwang. 18Ba tshwasa maoto a hae ka difate, a phela jwalo ditshepeng, 19ho fihlela mohla taba tseo a neng a di boletse di hlahang, mme lentswe la Jehova la mo leka. 20Morena wa Egepeta a romela ho mo lokolla, mmusi wa ditjhaba a mo bulela monyako wa teronko, 21a mmea morena wa ntlo ya hae, le mmusi wa maruo wohle a hae, 22hore a tle a tlame mahosana a hae kamoo a ratang kateng, a rute matona a hae bohlale. 23Ebile moo Iseraele a fihlang Egepeta, mme Jakobo a ba mojaki naheng ya Kama. 24Jehova a atisa setjhaba sa hae haholo, sa eba matla ho fetisa dira tsa sona. 25A fetola pelo tsa bona, ba ba ba hloya setjhaba sa hae, ba rera timelo ya bahlanka ba hae.

26A roma Moshe, mohlanka wa hae, le Aarone, eo a neng a mo kgethile; 27ba etsa meeka hara bona, le mehlolo naheng ya Kama. 28A romela lefifi, a hlahisa botsho, ba se ke ba hana lentswe la hae. 29A fetola metsi a bona madi, a fedisa dihlapi tsa bona. 30Fatshe la bona la tlala dihohwana, tsa kena le ka matlung a marena a bona. 31A bolela, mme ha tla dintsintsi le dinta dinaheng tsohle tsa bona. 32A etsa dipula tsa bona sefako, a romela le malakabe a mollo naheng ya bona. 33A otla merara ya bona le difeiye tsa bona, a robakanya difate tsa naha ya bona. 34A bolela, mme ha tla tsie, tsie e sa balweng, 35e kileng ya qeta jwang kaofela ba naha, ya bo qeta le tse bewang ke masimo a bona. 36A otla le matsibolo kaofela naheng ya bona, e leng sehlooho sa bonna ba bona.

37A ba ntsha ba nkile disilefera le dikgauta, ho se motho ya kgathalang melokong ya bona. 38Baegepeta ba thabela ho tloha ha bona, hobane ba ne ba tshwerwe ke letsoso la bona. 39A phutholla leru ho ba sireletsa, le mollo ho ba bonesetsa bosiu. 40Yare ha ba kopa, a romela dikwekwe, a ba kgorisa ka bohobe ba lehodimo. 41A patsola lefika, mme metsi a kolla ho lona, a matha feelleng ka diphororo. 42Hobane o ne a hopotse lentswe la hae le kgethehileng, a hopotse le Abrahama, mohlanka wa hae. 43A etsa hore setjhaba sa hae se tlohe ka thabo, le bakgethwa ba hae ka nyakallo. 44A ba fa mafatshe a dijhaba, ba inkela mesebetsi ya merabe; 45ba tle ba boloke ditaelo tsa hae, mme ba ye ka melao ya hae. Bokang Jehova!

BIBELE e Halalelang

© 1909, 1961 Bible Society of South Africa. Used by permission. All rights reserved.

More Info | Version Index